Danyil 3 - Hanunuu

Nagsugu si Nabukudunusur kuntay Sambahun ti Tinawu-tawu

¹ Bag-u nagpabuwat si Hari Nabukudunusur tinawu-tawu gintu. 60 ka luk-an siku kay abwat ag 6 ka luk-an siku waydi kay lapad inda. Ipinatindug niya inda sa ratag Dura ati sa banwa Babilunya.

^2-3 Pagkatapus ipinatawag ni Hari Nabukudunusur ti manga gubirnadur, manga miyur, manga kumisyunir, manga manugpaanyu, manga tagahamnu, manga manughusay, manga takinan, ag ti iba waya manga manugtarabahu sa manga banwa hampay manluwang sa pagtalaga sa tinawu-tawu. Pagka siyun yi sida matindugan sa atubangan tinawu-tawu,

⁴ nanringgit ti manugbarita, “Kamu pag manga ginan sa tuhay-tuhay pag nasyun, ag linahi, hanggan pamagaw,

⁵ nu masaydan niyu ti tunug budyung, palawta, kudyapi, alpa, ag iba waya pag manga pamatunug, pagluhud kamu ag pagsamba sa tinawu-tawu gintu ipinatindug ni Hari Nabukudunusur.

⁶ Una si unu ti balaw sumamba iyamut sa maglabdaban pag pugun.”

⁷ Nakan pagka nasaydan nida ti tunug manga pamatunug, nagluhud sida ag nagsamba sa tinawu-tawu gintu.

⁸ Sa tunda pag udas, may pira ka taga Babilunya ti nagpakarani sa hari ag isinumbung nida ti manga Hudiyu.

⁹ Magkun sida sa kan Hari Nabukudunusur, “Mana lumawig kanmu buhi, Mahal Hari!

¹⁰ Unman aw nagsugu kawu una si unu ti makadnug sa tunug manga pamatunug pagluhud ag pagsamba sa tinawu-tawu gintu,

¹¹ ag ti unman sumamba iyamut sa maglabdaban pag pugun?

¹² Dapat unman nagsunud sa kanmu sugu ti manga Hudiyu sida ni Sadrak, ni Misak, ag ni Abidnigu, ti pinili nimu manguna sa banwa Babilunya. Unman sida maggalang sa kanmu manga diyus, ag unman sida magsamba sa kanmu ipinatindug tinawu-tawu gintu.”

¹³ Pagka tunda nadnugan hari masyadu gid kay pangagalit. Nakan ipinatawag niya sida ni Sadrak, ni Misak, ag ni Abidnigu.

¹⁴ Pagka rinmas-ug sida, pinaingana sida hari, “Tutuu aw unman kamu maggalang sa kang manga diyus ag unman kamu magsamba sa kang ipinatindug pag tinawu-tawu gintu?

¹⁵ Taynguna pagbilinan niku kamu pagsamba sa tinawu-tawu nu masaydan niyu ti tunug manga pamatunug. Dahil nu unman, iyamut kamu sa maglabdaban pag pugun. Bantayan nita nu may diyus manribri sa kanyu ginan sa kang kamang.”

¹⁶ Nagsagut sida tulu, “Mahal Hari, unman kami may masabi tungkul sa siti.

¹⁷ Nu imaw yi gid waydi ti mangyari, iribri di kami Diyus nimi pagsirbihan ginan sa maglabdaban pag pugun. Iribri di niya kami ginan sa kanmu kamang.

¹⁸ Dapat nu unman gid waydi niya kami iribri, gustu nimi maalaman nimu, balaw gid kami mansirbi sa kanmu manga diyus ngatay mansamba sa kanmu ipinatindug pag tinawu-tawu gintu.”

¹⁹ Dahil sa kanda sagut, nag-amat di kay pangagalit hari sa kanda, ag makitan inda sa kay uyahun. Nakan nagsugu siya kuntay painita waya gid ti pugun makapitu ka bisis.

²⁰ Bag-u sinugu niya kay pinakamabisug pag manga sundalu kuntay gapusa sida ni Sadrak, ni Misak, ni Abidnigu ag yamtan sa maglabdaban pag pugun.

²¹ Nakan ginapus ngani sida balaw linukas kanda rutay, ag iyinmut sa maglabdaban pag pugun.

²² Dahil pinainit gid masyadu ti pugun angay sa mahigpit pag sugu hari, namatay ti nagyamut pag manga sundalu sa kanda dahil sa alinghaw apuy.

²³ Ag sida tulu magapusan nidugsak sa basad maglabdaban pag pugun.

²⁴ Habang magbantay si Hari Nabukudunusur kadaka siya tinmindug ag masyadu nadulaw. Nagpaingana siya sa kay manga manugpamahala, “Unman aw lugud tulu lang ka tawu kanta ginapus ag iyinmut sa apuy?” Sinmagut sida, “Hu, Mahal Hari.”

²⁵ Magkun ti hari, “Bantayi niyu! Upat ti mag-akitan niku maglakaw-lakaw sa basad apuy. Unman yi sida magapusan ag unman sida magkairub. Ag kay usa sa kanda ga usa ka diyus.”

²⁶ Nakan nagpakarani si Nabukudunusur sa puwirtahan maglabdaban pag pugun bag-u nagtawag, “Sadrak, Misak, ag Abidnigu, manga suruguun Kaabwat-abwatan pag Diyus, pagluwas kamu asan ginan! Abala kamu!” Bag-u nagluwas ngani sida tulu ginan sa basad apuy.

²⁷ Bag-u nagtiripun sa kanda ti manga gubirnadur, manga miyur, manga kumisyunir, ag ti iba waya pag manga takinan hari. Ag nakitan nida unman sida nairub apuy. Una ngani kanda buhuk hanggan rutay unman gid nairub, una di hungaw anus unman gid.

²⁸ Nakan magkun ti hari, “Dayawun ti Diyus nida ni Sadrak, ni Misak, ag ni Abidnigu. Ipinadara niya kay anghil hampay iribri kay manga suruguun magsarig sa kanya. Malu sida unman nagsunud sa kang sugu, pinalabi waya nida ti iyamut sa apuy kaysa mansamba sa una hintay pag diyus purya sa kanda Diyus.

²⁹ Nakan pag-isugu niku una si unu pag tawu una naan pag nasyun hanggan linahi, ngatay pamagaw ti mamagaw daut laban sa Diyus nida ni Sadrak, ni Misak, ag ni Abidnigu pamuldun kay bilug ag dautun kay manga balay. Dahil unman gid may iba diyus manribri parihu ga kanda Diyus.”

³⁰ Ag pinakan-an hari sida ni Sadrak, ni Misak, ag ni Abidnigu mas abwat gid pag katungkulan sa banwa Babilunya.