Danyil 2 - Hanunuu

Kay Tagin-up ni Nabukudunusur

¹ Sa ikadwa pag timpu sa kay maghari ni Nabukudunusur, kapira ginan siya nanagin-up. Nagpaaburidu gid sa kanya kay manga tagin-up, nakan unman siya makaturug.

² Ipinatawag niya kay manga manugsalumangka, pandaniwan, pangiwaan, hanggan manga manughula, hampay itultul nida ti manga tagin-up niya.

³ Pagka rinmas-ug sida magkun ti hari sa kanda, “Nanagin-up aku ag magpaaburidu gid inda sa kangku, nakan ipinatawag niku kamu dahil gustu niku maalaman nu hintay kay ibug sabihun tunda pag tagin-up.”

⁴ Nagsagut ti manga manughula sa hari sa pamagaw Aramiku, “Mahal Hari, mana lumawig kanmu buhi. Tultuli kami kanmu manga manugsirbi sa kanmu tagin-up, ag sabihun nimi sa kanmu kay ibug sabihun.”

⁵ Magkun ti hari sa kanda, “Inda kang pasya: Nu balaw niyu mahulaan nu hintay kang tagin-up ag kay ibug sabihun inda, pamulud-puludun niku kanyu manga bilug ag ipadaut kanyu manga balay.

⁶ Dapat nu mahulaan niyu kang tagin-up ag mitultul kay ibug sabihun inda, pirimyuhan niku kamu ag pakan-an daka pag kadayawan. Ta, hulai yi niyu ag tultulan kay ibug sabihun.”

⁷ Nagsagut maan sida sa hari, “Mahal Hari, sabihan lang sa kanmi kanmu tagin-up bag-u itultul nimi sa kanmu kay ibug sabihun.”

⁸ Nagbagaw ti hari, “Alam niku pagpadugay-dugayun lang niyu ti udas dahil alam niyu tupadun gid niku kang sinabi sa kanyu,

⁹ kuntay nu balaw niyu mahulaan ag mitultul kang tagin-up, parusahan gid niku kamu angay sa kang sinabi. Nagkausa kamu mamudil sa kangku dahil mag-isip kamu barang magbag-u waya kang isip. Hulai yi niyu nu hintay kang tagin-up hampay maalaman niku kuntay madunung gid kamu magtultul kay ibug sabihun inda.”

¹⁰ Nagsagut sida sa hari, “Unman gid may tawu sa buu kalibutan ti makabwat sa kanmu paghagadun. Ag unman diman may hari, una kabitay waya kay kapangyarihan, magsugu sa manga manugsalumangka, pandaniwan, una manughula ti makabuwat katida.

¹¹ Makuri gid kanmu paghagadun, Mahal Hari. Ti manga diyus lang gid ti makabwat katida, dapat unman sida mag-uli kaibahan sa manga tawu.”

¹² Dahil sa kanda isinagut, masyadu gid kay pangagalit hari. Bag-u nagsugu siya kuntay panmatya ti tanan manga dunungin sa Babilunya.

¹³ Pagka ipinaluwang ti sugu kuntay ti manga dunungin panmatyun, hinanap si Danyil hanggan kay manga kaibahan hampay matyun diman.

^14-15 Bag-u nagpakihampang si Danyil sa kan Aryuk sa kapitan manga bantay hari. Tunda si Aryuk imaw ti sinugu hari sa pagmatay sa manga dunungin pag manga tawu sa Babilunya. Madahan nagpaingana si Danyil sa kanya, “Hayga nagsugu kainda kabuyat ti hari?” Nakan tinultulan siya ni Aryuk sa nangyari.

¹⁶ Pagkatapus, nag-atag si Danyil sa hari ag nanuyu magkun, “Pakan-i aku udas hampay mitultul niku kay ibug sabihun kanmu tagin-up.”

¹⁷ Nagpasnu ti hari, nakan rargu nuli si Danyil bag-u tinultulan niya kay manga kaibahan sida ni Ananiyas, ni Misail ag ni Asariyas tungkul sa nangyari.

¹⁸ Sinabihan sida ni Danyil kuntay, “Mandarangin kita hampay kaawaan kita Diyus sa langit, ag maalaman nita kay ibug sabihun tagin-up hari, hampay balaw kita matyun kaibahan ti iba waya pag manga dunungin pag tawu sa Babilunya.”

¹⁹ Sa ati pag yabi, ipinaalam Diyus sa kan Danyil ti tagin-up hari hanggan kay ibug sabihun sa panab-anan pangakakitun. Ag dinayaw ni Danyil ti Diyus sa langit.

²⁰ Magkun siya, “Ti Diyus madunung ag makamaskihan; dayawun nita siya unman may katapusan.

²¹ Siya ti magbag-u sa manga panahun. Siya ti mag-udyuk nu si unu ti humari ag siya diman ti mag-ilis sa kanya. Siya ti magpakaun kadunungan sa manga dunungin.

²² Pag-ipaliwanag niya ti ibug sabihun madalum pag manga bagay makuri masalman. Sa kanya ti karayawan, alam niya nu hintay ti ati sa kadudulman.

²³ Diyus niku manga ginurang, pagdayawun niku kawu ag pagpasalamatan. Kawu ti nagpakaun sa kangku kadunungan ag kabisugan. Ag ipinakaun nimu kanmi paghagadun sa kanmu sa panab-anan pagpaalam nimu sa kanmi kay ibug sabihun tagin-up hari.”

Itinutul ni Danyil ti Tagin-up Hari

²⁴ Bag-u binmalik si Danyil sa kan Aryuk, imaw ti sinugu hari sa pagmatay sa manga dunungin pag manga tawu sa Babilunya. Nagbagaw si Danyil sa kanya, “Danga dapu pagmatya ti dunungin pag manga tawu, nu unman ibahi dapu aku sa hari bag-u itultul niku sa kanya kay ibug sabihun niya tagin-up.”

²⁵ Nakan nag-apura dinara ni Aryuk si Danyil sa hari. Magkun si Aryuk, “Mahal Hari, may nakitan duy aku bihag ginan sa Huda ti makatultul nu hintay kay ibug sabihun kanmu tagin-up.”

²⁶ Pinaingana hari si Danyil pag-ingarnan diman Biltisasar, “Itultul aw nimu sa kangku nu hintay kang tagin-up ag sabihun kay ibug sabihun?”

²⁷ Sinmagut si Danyil, “Mahal Hari, unman may una si unu pag madunung, una pandaniwan, una manugsalumangka, ngatay manughula ti makatultul sa kanmu tagin-up.

²⁸ Dapat may Diyus sa langit makapaliwanag manga madalum pag katutuuhanan. Mahal Hari, sa panab-anan nimu tagin-up, ipinaalam Diyus sa kanmu nu hintay ti mangyari sa aratubangun. Taynguna itultul niku sa kanmu ti manga pangakakitun kanmu nakitan sa tagin-up.

²⁹ “Katpung maturugan kawu, Mahal Hari, nanagin-up kawu tungkul sa manga mangyari sa aratubangun. Ipinasandam Diyus sa kanmu ti manga madalum pag katutuuhanan.

³⁰ Ag kanmu tagin-up ipinasandam Diyus sa kangku, balaw kuntay sa mas madunung aku sa iba manga tawu, nu unman hampay maitultul niku sa kanmu ag masalman nimu nu hintay kay ibug sabihun ti magpaaburidu sa kanmu naisipan.

³¹ “Kanmu tagin-up kaindaay: May nakitan kawu usa ka daka pag tinawu-tawu matindugan sa kanmu atubangan. Masyadu masilaw ag madala bantayun.

³² Kay ulu lunsay gintu ag kay dubdub hanggan kamang pilak, kay tiyan galang hanggan yi kay balangbang,

³³ kay manga kapusgan baul ag kay manga lulud baul ag lutuk.

³⁴ Habang mabantayan kawu sa tinawu-tawu, may usa ka batu nagipak, balaw tawu ti naggipak. Nidugsak inda pag batu sa baul ag lutuk pag lulud diyus-diyusan, bag-u narunut kay manga lulud.

³⁵ Rargu nidugsak ti tinawu-tawu buwat sa baul, lutuk, galang, pilak, ag gintu. Bag-u nagbaliw wadi upa sa girik-an pag-ipayag durus una naan tag. Dapat ti batu nidugsak sa lulud diyus-diyusan nagbaliw daka pag bantud nagsakup sa buu kalibutan.

³⁶ “Katida kanmu tagin-up, ag kaindaay kay ibug sabihun:

³⁷ Mahal Hari, kawu ti pinakaabwat sa tanan pag hari. Binwat kawu hari nita Diyus sa langit, ag pinakan-an niya kawu kapangyarihan hanggan kabisugan, ag kadayawan.

³⁸ Ipinasakup niya sa kanmu ti manga tawu, manga hayup, manga manuk, una naan katpung sida. Kawu kay ibug sabihun tunda pag ulu gintu diyus-diyusan.

³⁹ “Ti dumasun sa kanmu pag kaharian balaw parihu kay kapangyarihan sa kanmu pag kaharian. Kay ikatlu pag kaharian imaw ti pag ipahalimbawa sa galang pag bahagi diyus-diyusan, kay kapangyarihan niya kaharian sumakup sa buu kalibutan.

⁴⁰ Bag-u kay sunud imaw ti ikap-at pag kaharian parihu sa baul. Imaw ti baul magrunut sa tanan, inda pag kaharian manrunut sa iba ka manga kaharian.

⁴¹ Ti manga lulud diyus-diyusan buwat sa baul ag lutuk kay ibug sabihun madwa ti kaharian. Dapat pumirmaminti inda mapag-un, dahil nakitan nimu kay manga lulud diyus-diyusan may lakay baul.

⁴² Ti manga ituturu baul ag lutuk pag lulud kay ibug sabihun inda may bahagi kaharian mapag-un ag may bahagi waydi kaharian balaw magpag-un.

⁴³ Ti pagminsan baul ag lutuk kay ibug sabihun waydi magkausa kay manga takinan sa inda pag kaharian sa panab-anan pag-arasawan-an. Dapat balaw dumugay kanda pagkarausa, parihu ngani sa baul ag lutuk balaw mahimu minsanun.

⁴⁴ “Sa ati pag panahun manga hari, ti Diyus sa langit pumatindug usa ka kaharian unman gid magpu hanggan aban. Balaw gid inda matalu iba kaharian, nu unman papasun waya ngap niya ti tanan kaharian ag pihu pumirmaminti inda hanggan aban.

⁴⁵ Parihu ngani sa kanmu nakitan pag batu nagipak ginan sa bantud (dapat balaw tawu ti naggipak) ti nagrunut sa diyus-diyusan baul, galang, lutuk, pilak, hanggan gintu. “Mahal Hari, ipinasandam duy makamaskihan pag Diyus sa kanmu nu hintay ti mangyari aban sa aratubangun. Imaw tida kanmu tagin-up hanggan kay ibug sabihun. Tutuu gid ti tanan niku sinabi.”

⁴⁶ Nagluhud si Hari Nabukudunusur hampay parangalan si Danyil. Bag-u nagsugu siya kuntay pagsagda ag pagsunug kamangyan sa kan Danyil.

⁴⁷ Magkun siya sa kan Danyil, “Dahil sa kanmu pagtultul sa kang tagin-up ag pagtultul kay ibug sabihun, tutuu gid kanmu Diyus imaw ti higit makapangyarihan sa tanan pag diyus. Siya ti kailangan kilalan-un pag Panginuun manga hari. Ag siya lang gid ti makatultul manga madalum pag manga katutuuhanan.”

⁴⁸ Bag-u inayawan hari si Danyil mayamu mararinu pag manga pamakaun. Bag-u ipinauli diman niya siya sa abwat pag katungkulan bilang takinan sa buu banwa Babilunya ag takinan tanan manga madunung ati.

⁴⁹ Hinampang ni Danyil ti hari kuntay buwatun sida ni Sadrak, ni Misak, ag ni Abidnigu manga kaawat niya sa pagpanguna sa banwa Babilunya. Bag-u nagpasnu diman ti hari. Si Danyil pirmaminti sa balay hari.