Danyil 12 - Hanunuu

Itinultul Anghil ti tungkul sa Uryan pag Udas

¹ Magkun waya ti ga tawu, “Sa ati pag udas, rumas-ug si Mikail, ti makapangyarihan pag takinan mag-apin sa kanmu manga kasimanwa. Makuri gid ti kahamtangan sa ati pag udas. Tunda pag kakurian udwaya nalakawan ginan sa nitindug ti nasyun Israil. Dapat iribri di sa kakurian kanmu manga kasimanwa kay ngaran nakalista sa ribru.

² Buhiun ti tanan nagkaramatay. Ti iba sa kanda makatanggap buhi unman may katapusan, dapat ti iba saadan ag ipauli sa kakay-ahan unman may katapusan.

³ Tunda pag manga nakaintindi sa katutuuhanan ag magtudlu sa manga tawu mangabuhi sa matadlung dum-ag parihu sa manga pamgasan sa langit unman may katapusan.

⁴ Dapat Danyil, siraduha lang dap inda pag ribru ag danga dapu pagsabihan sa manga tawu inda pag barita tugka sa ud rumas-ug ti katapusan. Habang unman waya inda pag-itultul, mayamu ti manipag sa pag-intindi sa manga magpangyari.”

⁵ Pagka nasabi niya tunda, may nakitan waya gid aku duwa ka tawu matindugan sa baliw-baliw pangpang sapa.

⁶ Ti usa sa kanda nagpaingana sa tawu nakarutay linu matindugan sa tungud baliwa saruy sapa, “Kabitay nguna kadugay bag-u matapus inda pag makadululaw pag manga magpangyari?”

⁷ Ipinaabwat tawu nakarutay linu kay duwa ka kamang ag nasaydan niku nanumpa siya sa ngaran Diyus buhi unman may katapusan. Magkun siya, “Matapus inda pagkalawuy tulu ka timpu may tunga, nu matapus yi ti kakurian manga nasakupan Diyus.”

⁸ Unman niku nasalman kay sagut, nakan pinaingana niku siya, “Duy, hintay gid lugud ti mangyari?”

⁹ Nagsagut siya, “Danyil, paglakaw yi kawu, dahil kay sagut sa kanmu paingana lihim lang ag balaw kailangan itultul tugka sa ud rumas-ug ti katapusan.

¹⁰ Mayamu ti manga magkilala sa katutuuhanan ti lumpiyuhun kanda buhi, ag makaintindi sida sa manga pagsabihun niku pag bagay. Dapat ti manga daut pagparargu sa pagbuwat kadautan, ag unman sida makaintindi sa manga pagsabihun niku pag bagay.

¹¹ “Lumawuy ti 1,290 ka sirang ginan sa udas pag-ampara sa sirang-sirang pag handug ag pagpauli manga mayagting pag bagay imaw ti kadahilanan pabay-anan ti Balay Diyus tugka sa rumas-ug ti katapusan.

¹² Mapalad ti mag-alagad ag masawad tugka sa lumawuy ti 1,335 ka sirang.

¹³ “Ag kawu Danyil, pararguhan kanmu pagbuwatun. Mamatay kawu, dapat buhiun di maan kawu sa uryan pag sirang hampay matanggap nimu ti pirimyu inalistu para sa kanmu.”