Danyil 11 - Hanunuu

¹ “Katpung un-an timpu kay paghari ni Daryu taga Midya, aku ti nag-awat ag nagkampi kan Mikail.”

Ti manga Hari sa Ihiptu ag sa Sirya

² “Taynguna, itultul niku sa kanmu ti katutuuhanan: May tulu waya ka hari ti humari sa Pirsiya. Ti ikap-at pag hari dumasun sa kanda mas mayaman waya kaysa kanda. Sa panab-anan niya kayamanan, bumaliw makapangyarihan siya ag udyukan niya ti iba kaharian kuntay labanan ti kaharian Grisya.

³ Bag-u may usa waya gid ka makapangyarihan pag hari ti rumas-ug. Mayamu nasyun kay sakupun ag buwatun niya kay gustu buwatun.

⁴ Nu makapangyarihan yi siya, madaut kay kaharian ag matunga sa upat ka suuk kalibutan, dapat balaw kay manga katawuhan ti humari. Ti manga umilis sa kanya pag hari balaw yi pumarihu sa kanya pag pamahala. Bul-un kay kaharian ag iayaw sa iba.

⁵ “Ti hari Ihiptu bumaliw makapangyarihan. Dapat usa sa kay manga takinan ti bumaliw mas makapangyarihan kaysa kanya. Aban tunda pag takinan humari ag bumaliw makapangyarihan kay kaharian.

⁶ Pagkalawuy pira ka timpu, mangarampihan inda pag duwa ka kaharian. Nakan ipaasawa hari Ihiptu kay anak babayi sa hari Sirya. Dapat unman dumugay ti kapangyarihan babayi hanggan ti kapangyarihan hari Sirya. Dahil sa ati pag udas, matyun ti babayi hanggan kay asawa ag anak, hanggan diman ti magsirbi sa kanya.

⁷ “Aban, ti patar-ari babayi humari sa kaharian Ihiptu. Siya ti umilis sa kay ama. Girahun niya ti manga sundalu hari Sirya ag suldun ti may alad batu pag banwa. Lumaban siya sa kanda ag manalu siya.

⁸ Darahun niya pabalik sa Ihiptu ti manga diyus-diyusan nida hanggan ti mahalaga pag kasiyunan buwat sa gintu ag pilak. Sa sulud pira ka timpu, unman yi siya man-gira sa hari Sirya.

⁹ Dapat sa uryan, girahun hari Sirya ti hari Ihiptu, dapat matalu inda pag hari ag muli sa kay sadili banwa.

¹⁰ “Manipun mayamu pag sundalu ti manga anak hari Sirya hampay mangalistu sa paglaban. Ti usa sa kanda man-gira ga baha balaw maampara. Man-gira siya tugka sa may alad batu banwa hari Ihiptu.

¹¹ Dahil sa pangagalit hari Ihiptu, labanan niya ti hari Sirya ag taluhun niya ti kayamuan sundalu.

¹² Sa kay pagpanalu, manpayabang siya ag mayamu waya gid kay panmatyun, dapat unman dumugay kay pagkamarapanalu.

¹³ Dahil manipun maan ti hari Sirya mas mayamu waya gid pag manga sundalu kaysa kabag-u. Pagkalawuy pira ka timpu, man-gira maan siya kaibahan kay mayamu ag armadu gid pag manga sundalu.

¹⁴ “Sa ati katpung pag udas, mayamu ti lumaban sa hari Ihiptu. Usa yi sa kanda kanmu manga kasimanwa Israilita maraisug. Buwatun nida inda angay sa katupadan pangakakitun, dapat matalu di sida.

¹⁵ Girahun hari Sirya ti usa ka banwa kaharian Ihiptu. Sangputun nida inda ag suldun. Unman gid may mabwat ti manga sundalu kaharian Ihiptu hanggan ti pinakamadunung pag manga sundalu, dahil balaw nida kaya taluhun ti kalaban.

¹⁶ Nakan buwatun hari Sirya ti una hintay kay gustu buwatun, ag unman gid may makaampara sa kanya. Sakupun niya ti marinu pag daga Israil, ag lubus inda ipasirung sa kay kapangyarihan.

¹⁷ Magsiguradu gid ti hari Sirya gumira sa kaharian Ihiptu sa buu kabisugan niya kaharian. Pakampi dap siya sa hari Ihiptu ag ipaasawa kay anak sa hari, hampay sa panab-anan niya anak matalu ti kaharian sa Ihiptu. Dapat unman mitarus kay gayak.

¹⁸ Nakan ti manga banwa lang dapu sa arani dagat ti girahun hari Sirya, ag mayamu kay sakupun. Dapat amparahun usa ka takinan kay magpakay-a sa iba, ag mangay-a gid ngap siya.

¹⁹ Nakan muli siya sa may alad batu pag manga banwa sa kay nasyun. Dapat matalu siya, ag imaw yi tunda kay katugkaan.

²⁰ “Ti umilis sa kanya pag hari sumugu usa ka may katungkulan manukut buhis sapilitan hampay madugangan ti kayamanan kaharian. Dapat ud dumugay mamatay inda pag hari, balaw sa labanan ngatay sa may nangisug sa kanya.

²¹ “Ti umilis sa kanya pag hari balaw kagalang-galang pag tawu ag unman may karampatan maghari. Lang madi katida, kadaka niya agawun ti kaharian sa panab-anan daya.

²² Mayamu pag kalaban sundalu kay matyun hanggan yi ti pangulu manughandug.

²³ Pumakampi siya sa mayamu nasyun, dapat dayaun niya sida sa uryan. Bumaliw siya makapangyarihan una diit lang kay kaharian.

²⁴ Sa unman pagsarigan manga tawu, kadaka niya girahun ti maunlad pag rugar usa ka purubinsiya. Buwatun niya ti unman nabwat kaybi niya manga ginurang. Ayaw-ayawun niya sa kay manga nasakupan ti manga naagaw niya pag bagay sa girahan. Maggayak waya siya man-gira sa may manga alad batu pag banwa, dapat sa dag-ud lang pag udas.

²⁵ “Kaibahan ti mayamu niya pag manga sundalu, mangungud siya sa paglaban sa hari Ihiptu. Dapat lumaban sa kanya ti hari Ihiptu may mayamu pag manga sundalu armadu gid. Matalu ti hari Ihiptu dahil sa daut pandaraya niya manga kalaban sa kanya.

²⁶ Matyun siya niya sadili tawuhan. Nakan matalu kay manga sundalu, mayamu sa kanda ti magkaramatay.

²⁷ “Magkarasundu inda pag duwa ka hari dapat parihu sida mamuludilan ag mangisip daut laban sa usa kag sa usa. Balaw manalu kanda gayak laban sa usa kag sa usa dahil balaw waya maras-ug ti nakatagka pag kaudasan.

²⁸ Muli ti hari Sirya sa kay ulian dara ti mayamu nab-ul pag kayamanan sa girahan. Dapat bag-u siya nuli, unu-unuhun dap niya ti manga nasakupan Diyus hanggan kanda rilihiyun. Ag pagkatapus, bag-u di siya nuli sa kay ulian.

²⁹ “Sa itinagka pag udas, girahun maan niya ti kaharian Ihiptu, dapat ti mangyari balaw yi parihu sa kabag-u.

³⁰ Dahil girahun siya manga barku taga Kitim. Ag dahil sa kadalaan, pumabalik siya ag ibuhus niya kay pangagalit sa nasakupan Diyus hanggan sa kanda manga rilihiyun, dapat magmabuut siya sa manga nagpatlikud sa kanda rilihiyun.

³¹ “Suguun hari Sirya ti manga sundalu hampay uringan ti Balay Diyus sangput alad batu. Paapasun niya ti sirang-sirang pagsagda ag ipauli ti mayagting pag bagay imaw kay kadahilanan mapabay-anan ti Balay Diyus.

³² Lukuhun niya ti manga napatlikud sa kanda rilihiyun hampay bumwat balaw mayad. Dapat ungdun siya labanan manga tawu marig-un sa Diyus.

³³ “Ti manga nakaintindi sa katutuuhanan manudlu sa mayamu tawu, dapat ay unu-unuhun sida sa sulud pira ka sirang. Ti iba sa kanda matyun sa baladaw ngatay sunugun, ag ti iba bihagun ngatay bul-un kanda manga kasiyunan.

³⁴ Sa panahun pag-unuunuhun sida, pira lang ti mangawat sa kanda, dapat mayamu ti manguyug sa kanda manga balaw tapat pag tawu.

³⁵ Unu-unuhun ti iba ka nakaintindi sa katutuuhanan hampay bumaliw lunsay ag malumpiyu kanda buhi tugka sa rumas-ug ti katugkaan itinagka pag panahun.

³⁶ “Buwatun hari Sirya una hintay kay gustu buwatun. Kilalan-un niya kay sadili abwat man sa tanan diyus, ag puyaan niya ti Diyus abwat man sa tanan pag diyus. Magmarapanalu siya tugka sa udas ipakakit Diyus kay pangagalit, dahil kailangan gid mangyari ti manga bagay ihinanda Diyus mangyari.

^37-38 Unman niya pagkilalan-un ti manga diyus niya manga ginurang ngatay ti diyus pagmahalun manga babayi. Bagkus ngap, kilalan-un niya kay sadili abwat man sa kanda tanan. Unman siya may pagpahalagahan diyus purya sa diyus maggira sa manga may sangput alad batu pag banwa. Kilalan-un niya inda pag diyus ti balaw kilala niya manga ginurang. Handugan niya inda gintu, pilak, mahalaga pag manga batu, ag iba waya mahalaga pag manga pamakaun.

³⁹ Girahun niya ti pinakamabisug pag manga banwa sa awat tunda pag diyus balaw kilala niya manga ginurang. Parangalan niya ti manga magmayad sa kanya pag tawu sa panab-anan pag-ayaw sa kanda kapangyarihan mamahala sa mayamu tawu. Ag pakan-an niya sida daga bilang pirimyu.

⁴⁰ “Sa uryan panahun, lumaban ti hari Ihiptu sa hari Sirya. Dapat girahun siya hari Sirya may manga kalisa ag manga manugkabayu hanggan mayamu manga barku. Girahun niya ga baha ti kayamuan nasyun ag panmatyun.

⁴¹ Girahun niya hanggan ti marinu pag daga Israil, ag mayamu pag tawu ti mamatay. Dapat makapalagiw ti Idum, ti Muab, hanggan ti manga takinan Amun.

⁴² Mayamu pag nasyun kay girahun, usa yi ti Ihiptu.

⁴³ Apuun niya ti manga gintu, manga pilak, hanggan ti tanan kayamanan Ihiptu. Sakupun diman niya ti Libya hanggan ti Itiyupya.

⁴⁴ Dapat may manga barita ginan sa butlakan hanggan sa kanaway ag imaw ti makapakulba sa kanya. Nakan ngani mangungud siya man-gira sa subra pag isug, ag mayamu pag tawu kay panmatyun.

⁴⁵ Mamatindug siya marinu pag turda hari sa tab-anan dagat ag banal pag bantud. Dapat mamatay siya unman gid may mangawat sa kanya.”