Danyil 10 - Hanunuu

Ti Pangakakitun ni Danyil sa Pangpang Sapa Tigris

¹ Sa ikatlu pag timpu paghari ni Sayrus sa Pirsiya, may ipinasandam tultulanun sa kan Danyil pag-ingarnan diman Biltisasar. Tutuu ti tultulanun, tungkul inda sa laun pag girahan. Nasalman ni Danyil ti tultulanun dahil ipinaliwanag inda sa kanya sa panab-anan usa ka pangakakitun.

² Kaindaay ti nangyari angay sa kan Danyil: Ati katpung pag udas, tulu ka duminggu kang magpanruku.

³ Unman gid aku nangaun masarap pag karan-un ngatay taguban, unman diman aku nanginum intus, ag unman diman aku namauli pamanglu sa kang bilug tugka sa matapus ti tulu ka duminggu.

⁴ Sa ika-24 pag sirang un-an bulan, matindugan aku ati sa pangpang daka Sapa Tigris.

⁵ May nakitan aku ati ga tawu may rutay linu ag may huragkus lunsay gintu.

⁶ Kay bilug magkislap parihu sa usa ka mahalaga pag batu. Kay uyahun masinglaw parihu sa kilat, ag kay mata magduag parihu sa apuy. Kay manga kamang ag lulud magkislap ga kiniskisan galang, ag kay busis mabisug gid ga iringayan kadamlan tawu.

⁷ Aku wata gid ti nakakit tunda pag pangakakitun. Kang manga kaibahan unman nakakit tunda, dapat napatagu sida dahil sa kadalaan.

⁸ Nakan aku wadi gid usa ti nasawad magbantay sa tunda pag makadululaw pag pangakakitun. Nanlapsi gid aku ag linubayan.

⁹ Bag-u nasaydan niku nagbagaw tunda pag tawu. Habang magbagaw siya, nabul-an aku malay ag nisubsub sa daga.

¹⁰ Hiniyaptan niya aku ag inawatan makaluhud dahil pagtakigan kang kamang ag tuud.

¹¹ Magkun siya, “Danyil, pagmahalun kawu Diyus. Pagtindug kawu ag pagpatingi mayad sa kang sabihun sa kanmu, dahil ipinadara aku Diyus atay sa kanmu.” Pagka nagsabi siya kaati, tinmindug aku pagtakigan.

¹² Magkun waya siya sa kangku, “Danyil, danga kawu magkadala. Sa un-an di waya pag sirang sa kanmu pagpakumbaba sa Diyus ag sa kanmu kagustuhan masalman ti manga pangakakitun, sinagut yi Diyus kanmu darangin. Nakan nagsitay aku nagdara sagut sa kanmu darangin.

¹³ Dapat balaw aku rargu nakaras-ug sitay dahil sa sulud 21 ka sirang inampara aku takinan kaharian Pirsiya. Mayad lang inawatan aku ni Mikail, takinan manga anghil, dahil aku lang ti naglaban sa takinan Pirsiya.

¹⁴ Taynguna, inda yi aku hampay itultul sa kanmu nu hintay ti mangyari sa kanmu manga kasimanwa Israilita sa aratubangun, dahil kanmu pangakakitun tungkul inda sa mangyari aban.”

¹⁵ Habang magbagaw siya sa kangku, napayuk-ub aku ag unman nakabagaw.

¹⁶ Tunda pag bilang ga tawu ti naghikap sa kang bibig nakan nakabagaw maan aku. Magkun aku sa kanya sa matindugan sa kang atubangan, “Duy, naaburidu gid aku ag nabul-an kabisugan dahil sa tunda pag nakitan niku pangakakitun.

¹⁷ Kabitay aku makahampang sa kanmu udyi aku may kabisugan, harus unman yi aku makaarup?”

¹⁸ Nakan kas-a waya niya aku hinikap ag binmalik kang kabisugan.

¹⁹ Magkun siya sa kangku, “Kawu pagmahalun Diyus, danga kawu magkadala ngatay magkaarimputu. Pagpakabisug ag pagpakarig-un kawu.” Pagka nasabi niya tunda sa kangku, binmaskug maan aku. Magkun aku sa kanya, “Pararguhan duy kanmu pagbagawun, dahil pinabisug yi nimu aku.”

²⁰ Nagsagut siya, “Bumalik duy aku hampay labanan ti takinan Pirsiya. Pagkatapus tunda pag labanan, rumas-ug maan ti takinan Grisya. Dapat alam aw nimu nu hayga aku nagsitay sa kanmu?

²¹ Nagsitay aku hampay itultul sa kanmu ti nakasurat sa Ribru Katutuuhanan. Sa kang maglaban, unman may iba nangawat sa kangku nu unman si Mikail lang gid, ti takinan Israil.