Danyil 1 - Hanunuu

Si Danyil ag Kay manga Kakilala sa Babilunya

¹ Sa ikatlu pag timpu sa kay maghari ni Hihuyakim sa Huda, ginira ni Hari Nabukudunusur taga Babilunya hanggan niya manga sundalu ti Hirusalim.

² Binihag niya si Hari Hihuyakim angay sa kagustuhan Panginuun. Bin-ul diman niya ti iba pag manga kagamitan sa Balay Diyus ag dinara sa Babilunya. Ag ipinauli niya inda sa haramnuan gamit ati sa balay diyus-diyusan niya.

³ Bag-u sinugu ni Hari Nabukudunusur si Aspinas, ti takinan niya manga may kangaranan kuntay pagpili manga pira ka kalay-awan ginan sa manga bihag nida taga Israil, ginan sa lahi hari ag paggalangun pag manga magtal-anakan.

⁴ Kailangan inda sida marinu gid, makurasug, madunung, maliksi ag madali tudluan, hampay angay sida sa pagsirbi sa hari. Binilinan diman niya si Aspinas kuntay tudlui sida pamagaw hanggan panurat manga taga Babilunya.

⁵ Nagsugu diman ti hari kuntay ginan sa kay sadili karan-unun ag irinmun ti ipakaun sa kanda sirang-sirang. Pagkalawuy tulu ka timpu magpaanad, bag-u di sida sumirbi sa kanya.

⁶ Kaibahan sa manga napili sida ni Danyil, ni Ananiyas, ni Misail hanggan ni Asariyas ginan sa lahi ni Huda.

⁷ Inilisan ni Aspinas kanda manga ngaran. Si Danyil si Biltisasar, si Ananiyas si Sadrak, si Misail si Misak, ag si Asariyas si Abidnigu.

⁸ Dapat nagpasya si Danyil balaw siya mangaun karan-unun hari hanggan manginum kay irinmun, hampay balaw siya mauringan. Nakan nagpakihampang siya sa kan Aspinas kuntay danga siya pagpakan-i tunda pag karan-unun hanggan irinmun.

⁹ Pinahintulutan Diyus magmabuut si Aspinas sa kan Danyil ag nagpasnu sa kay pag-ipakihampang.

¹⁰ Dapat magkun si Aspinas sa kanya, “Magkadala aku sa hari. Siya ti nagpili nu hintay ti ipakaun hanggan ipainum sa kanyu, nu makitan niya balaw mabisug kanyu bilug nu ipaparihu sa iba manga kan-akan, barang ipamatay niya aku.”

¹¹ Nagbagaw rargu si Danyil sa ipinaguwardiya ni Aspinas, ti man-asikasu sa kanya hanggan sa kanda ni Ananiyas, ni Misail, ag ni Asariyas,

¹² “Malu, subuki niyu kami pakan-i lang upi ag painmi danum sa sulud sampulu ka sirang.

¹³ Pagkatapus, paparihuan kami sa iba manga kan-akan magkaun karan-unun hari. Nu hintay kanmu makitan sa uryan, bahala kawu nu hintay ti gustu nimu buwatun sa kanmi.”

¹⁴ Nakan nagpasnu siya ag sinubukan sida sa sulud sampulu ka sirang.

¹⁵ Pagkalawuy sampulu ka sirang, nakitan ngani mas mabintug waya kanda bilug nu ipaparihu sa manga kan-akan magkaun karan-unun hari.

¹⁶ Nakan ipinarargu yi lang guwardiya ti pag-ayaw upi hanggan danum sa halip karan-unun ag irinmun hari.

¹⁷ Pinakan-an Diyus inda pag upat ka kan-akan kadunungan lalu yi gid sa tuhay-tuhay pag manga barasahun ag manga kaalaman. Bukud waya sa inda, pinakan-an niya si Danyil kadunungan sa pagtultul manga pangakakitun hanggan manga tagin-up.

¹⁸ Pagkalawuy tulu ka timpu kay nagtudlu sa kanda angay sa sinabi ni Hari Nabukudunusur, dinara sida ni Aspinas sa kanya.

¹⁹ Naghampang ti hari sa kanda, ag nakitan hari sa tanan nida manga kan-akan unman may pumarihu sa kanda ni Danyil, ni Ananiyas, ni Misail hanggan ni Asariyas. Nakan sida ti napili mansirbi sa kanya.

²⁰ Sa tanan ipinaingana hari sa kanda, nakitan niya kanda kadunungan sampulu ka dubli sa kadunungan manga manugsalumangka hanggan pandaniwan sa buu niya kaharian.

²¹ Nagparargu sa pagsirbi si Danyil sa kaharian Babilunya tugka sa un-an pag timpu sa kay maghari ni Sayrus.