Binwat 9 - Hanunuu

Sa kay Nagpasakup ni Saulu sa Panginuun

¹ Dapat ay si Saulu tinalung sa isug, kay gid gustu matyun ti manga tuludluan Panginuun. Nakan nag-ati siya sa pangulu manughandug sa Balay Diyus.

² Nanhagad siya manga surat hampay ipakilala siya sa manga pangulu simbahan manga Hudiyu ati sa banwa Damasku. Bag-u nu ati yi siya ag nu may makitan siya manga tawu, una lalaki una babayi magsunud sa bag-u itinudlu ni Kiristu, mahimu kay dakpun bag-u darahun tag sa Hirusalim.

³ Nighit yi ngani si Saulu atag sa Damasku. Pagka udyi arayu ti banwa Damasku, bigla may nagrayaw ginan sa langit sa kay libut ni Saulu.

⁴ Nisubsub siya sa daga bag-u nakadnug siya may magbagaw sa kanya magkun, “Saulu, Saulu, hayga pag-unuunuhun nimu aku?”

⁵ Nagpaingana si Saulu, “Si unu kawu, Panginuun?” Bag-u may sinmagut sa kanya magkun, “Aku si Hisus kanmu pag-unuunuhun.

⁶ Pagbangun yi kawu, pag-ati kawu sa banwa bag-u may sumabi ati sa kanmu tungkul sa kanmu kailangan buwatun.”

⁷ Kan Saulu manga kaibahan mapat-ungan lang unman nag-ingay dahil nadnugan nida may magbagaw, dapat unman sida may nakitan una hintay.

⁸ Nagbangun ngani si Saulu. Pagka nagmuklat kay mata, unman maghiling. Nakan inabat nida siya atag sa banwa Damasku.

⁹ Sulud tulu ka sirang unman maghiling kay mata ag unman siya nagkaun nag-inum.

¹⁰ Ati sa Damasku may usa ka tawu nagsarig diman sa kan Hisus, kay ngaran si Ananiyas. Napakakit ti Panginuun sa kanya bag-u kay sinabi magkun, “Ananiyas.” Sinmagut si Ananiyas magkun, “Inda di aku, Panginuun.”

¹¹ Sinabi Panginuun sa kanya, “Pag-ati kawu tag sa karsada Matadlung ag paingan-a nimu sa balay ni Hudas ti usa ka lalaki taga Tarsu kay ngaran si Saulu. Magdarangin siya kainda.

¹² May ipinakakit aku sa kanya may nagsaka usa ka tawu kay ngaran si Ananiyas, nagkupa kay kamang sa kanya hampay humiling maan kay mata.”

¹³ Dapat nagsabi si Ananiyas magkun, “Panginuun, mayamu yi tawu nagtultul sa kangku tungkul sa tunda pag tawu. Mayamu gid pag kadautan ti binwat niya kunu laban sa manga magpasakup sa kanmu ati sa Hirusalim.

¹⁴ Taynguna nagsitay siya sa Damasku, may karampatan siya ginan sa manga pangulu manughandug sa Balay Diyus hampay dakpun niya ti tanan manga magsamba sa kanmu.”

¹⁵ Magkun maan ti Panginuun sa kan Ananiyas, “Pag-ati duy kawu, dahil pinili ngap niku si Saulu hampay siya sumirbi sa kangku hampay ipakilala niya kang makamaskihan pag ngaran sa manga balaw Hudiyu, sa manga hari hanggan sa nasyun Israil.

¹⁶ Ipaalam diman waydi niku sa kanya ti tanan niya kailangan tiisun sa kay magpakilala sa kangku sa manga tawu.”

¹⁷ Nag-ati ngani si Ananiyas. Pagka siya sinmaka yi sa balay, kinup-an niya kamang si Saulu, magkun, “Patar-ari Saulu, ti Panginuun ti nagsugu sa kangku, si Hisus yi ngani, imaw ti napakakit sa kanmu sa kanmu maglakaw sitay tabug. Nakan sinugu niya aku sitay tag sa kanmu hampay humiling maan kanmu mata ag hampay kawu lubus suldan Ispiritu Banal.”

¹⁸ Susun may ga nalkab ginan sa kan Saulu mata bag-u maghiling yi siya. Linmakaw siya rargu napatulbaw.

¹⁹ Bag-u siya nagkaun nagbisug maan kay bilug. Dinmayun dapu si Saulu balaw dugay sa manga patar-ari siyun sa Damasku.

Nanudlu si Saulu sa Damasku

²⁰ Susun nagsaka siya sa simbahan manga Hudiyu, nanudlu siya tungkul sa kan Hisus magkun, “Siya yi ngani ti Anak Diyus.”

²¹ Ti tanan tawu nakadnug sa kanya naglingut gid. Magkun sida, “Unman aw lugud inda yi ngani pag tawu ti namapas sa manga magsamba sa kan Hisus sa Hirusalim? Nagsitay ngani kabay siya hampay dakpun niya tunda pag manga tawu bag-u darahun tabug sa manga pangulu manughandug sa Balay Diyus.”

²² Dapat ay amat-amat lalu waya malinaw kan Saulu paliwanag. Naglingut ti manga Hudiyu nangulian sa Damasku dahil marig-un kay nagtultul tungkul sa kan Hisus siya yi ti Pinili Diyus Manugribri pag Hari.

²³ Pagka dugay namululungan yi ti manga Hudiyu hampay matyun si Saulu,

²⁴ dapat naalaman niya kanda paggayakun. Sirang yabi pagpuutan nida siya sa manga puwirtahan alad batu banwa hampay siya kanda mana matyun.

²⁵ Nakan pagka yabi yi napasukad siya sa basad balulang bag-u itinuntun siya niya manga tuludluan atag sa luwas alad batu.

Si Saulu sa Hirusalim

²⁶ Pagka rinmas-ug si Saulu sa Hirusalim, kay mana gustu magpaminsan sa manga napasakup sa kan Kiristu. Dapat magkadala sida sa kanya. Unman sida naniwala kuntay si Saulu usa yi waydi ka nakapasakup sa kan Hisus.

²⁷ Bag-u inawatan siya ni Birnabi, inibahan niya si Saulu tag sa manga apustul bag-u itinultul ni Birnabi nu kabitay ti Panginuun napakakit sa kan Saulu ag naghampang sa kanya sa kay katpung maglakaw atag sa Damasku. Magkun waya si Birnabi, “Unman paman magkadala si Saulu, nanudlu ngap siya tungkul sa makamaskihan pag ngaran ni Hisus ati sa Damasku.”

²⁸ Nakan si Saulu napaminsan gid sa manga patar-ari sa Hirusalim sa tanan nida buruwatun. Unman gid siya magkadala, nanudlu di siya tungkul sa makamaskihan pag ngaran Panginuun.

²⁹ Naghampang diman siya ag nagdibati sa manga Hudiyu kanda pamagaw Giriyigu, dapat nangisug sida ag naghanap paraan hampay matyun siya.

³⁰ Pagka naalaman manga patar-ari ti gayak manga Hudiyu, itinibu nida si Saulu atag sa Sisariya. Magkun sida sa kanya, “Pag-uli dapu duy kawu sa Tarsu.”

³¹ Nakan ngani may kahusayan maan dapu ti iglisya sa buu daga Hudiya, sa Galiliya hanggan sa Samarya. Pinarig-un Ispiritu Banal ti iglisya. Nagyamu ti manga nagsarig sa kan Hisus. Mag-ugali sida maggalang sa Panginuun.

Nag-ati si Pidru sa Banwa Lida ag sa Banwa Hupi

³² Ati katpung namalibutan si Pidru sa tanan rugar hampay magduaw sa manga nagsarig sa kan Hisus. Nag-ati diman siya sa manga patar-ari sa banwa Lida.

³³ Pagka ati si Pidru sa Lida, may nakitan siya usa ka lalaki kay ngaran si Iniyas. Pilay tunda pag tawu. Sulud walu yi ka timpu maigyaan siya sa amak.

³⁴ Bag-u sinabi ni Pidru sa kanya, “Iniyas, pagpaayadun yi kawu kainda ni Hisu-Kiristu. Pagbangun yi kawu, luhuta yi kanmu amak.” Susun tinmindug yi ngani si Iniyas.

³⁵ Nakitan gid siya tanan tawu mag-uli sa banwa Lida hanggan sa Sarun, nakan nagsarig diman sida sa Panginuun.

³⁶ Sa Hupi may usa ka babayi sakup diman sa kan Hisus. Kay ngaran si Tabita. (Sa Giriyigu kay ngaran si Durkas, kay ibug sabihun, Karasyaw.) Masipag gid ungud siya sa magbuwat mayad, pirmi diman siya mag-awat sa manga makuri.

³⁷ Pagka dugay nasakit si Tabita rargu namatay. Pagka kanda dinamay yi danum, ibinugtang nida ti bangkay sa sulud-sulud sa ikadwa pag ugpu salug.

³⁸ Arani lang ti Lida sa Hupi pag banwa. Nakan pagka naalaman manga patar-ari ati sa Hupi si Pidru, nagsugu sida duwa ka tawu tag sa kan Pidru may bilin magkun, “Pagsitay yi duy kawu sa kanmi kadali.”

³⁹ Nagkuyug ngani si Pidru sa kanda. Pagka rinmas-ug siya sa Lida, dinara nida siya atag sa sulud-sulud sa ikadwa pag ugpu salug. Nagpakarani diman sa kan Pidru ti tanan manga babayi buranday, ipinakakit nida sa kanya ti rutay kay ipinaalu ni Durkas sa kanda kay di waya buhi.

⁴⁰ Ipinalwas dapu ni Pidru sida tanan bag-u siya linmuhud nandarangin. Bag-u nag-atubang siya sa bangkay kay sinabi magkun, “Tabita, pagbangun yi duy kawu.” Minmuklat yi ngani kan Tabita manga mata. Pagka nakitan niya si Pidru, siya tinmukaw.

⁴¹ Hiniyaptan ni Pidru kay kamang bag-u kay inawatan si Tabita kay ipinatindug. Bag-u tinawag niya ti manga patar-ari lalu hanggan ti manga babayi buranday, ipinakakit niya sa kanda si Durkas nabuhi yi maan.

⁴² Inda pag nangyari sa kan Durkas nibantug sa buu banwa Hupi nakan mayamu tawu nagsarig diman sa Panginuun.

⁴³ Nadugay waya si Pidru ati sa Hupi nagdayun siya sa balay usa ka manugtimpala sa paknul, kay ngaran si Simun.