Binwat 8 - Hanunuu

¹ Pinasnuan yi waydi ni Saulu hampay matyun yi ngani si Istiban. Ati katpung pag sirang nag-umpisa ti mahigpit pag-unuunu laban sa iglisya sa Hirusalim. Purya lang ti manga apustul, ti tanan manga nagsarig sa kan Hisus nangalat yi sa tanan rugar sa Hudiya hanggan sa Samarya.

Inunu-unu ni Saulu ti Iglisya

² May manga tawu maka-diyus imaw ti naglubung sa kan Istiban, masyadu gid sida namung-aw sa kanya.

³ Dapat ay pinakurian di gid ni Saulu ti iglisya. Sinaka niya ti kada balay bag-u kinarudkud niya ti manga nagsarig sa kan Hisus, una lalaki una babayi bag-u kay ipinapirisu.

Itinudlu ti Mayad pag Barita sa Taga Samarya

⁴ Pagka nangalat yi ti manga nagsarig sa kan Hisus, itinudlu ngap nida ti Bagaw Diyus una naan sida pag nakalakaw.

⁵ Si Pilipi nag-ati sa banwa Samarya bag-u nagtudlu siya tungkul sa kan Kiristu sa manga tawu ati.

⁶ Pagka naalaman manga tawu kan Pilipi manga adal ag pagka nakitan waydi nida ti manga makadululaw pag buwat niya, lalu gid nagpatingi sida tanan sa kay manga pagsabihun.

⁷ Dahil nagluwas namagrit daka ti manga labang ginan sa mayamu tawu kanda inapuan. Mayamu diman pag manga tawu lunu una pilay pinaayad waydi.

⁸ Nakan nakabaya gid ungud ti manga tawu ati pag banwa.

⁹ May usa ka lalaki kay ngaran si Simun. Kaybi waya ginan nagpadulaw-dulaw siya sa manga taga Samarya dahil sa kay salumangka. Pag-akuun niya siya may dunung.

¹⁰ Pinakidnugan siya tanan-tanan tawu, una may kangaranan una unman, magkun sida, “Inda pag lalaki ti pagsabihun daka kay kapangyarihan, kapangyarihan ngap Diyus.”

¹¹ Dugay yi pag timpu nagpadulaw-dulaw siya sa manga tawu dahil sa kay salumangka nakan ngani namatingi gid mayad sida sa kanya.

¹² Dapat ay pagka itinudlu ngani ni Pilipi ti Mayad pag Barita tungkul sa kay paghari Diyus, hanggan tungkul sa kay kapangyarihan ni Hisu-Kiristu, nagsarig yi ngap ti manga tawu sa kan Kiristu bag-u sida itinulbaw una lalaki una babayi.

¹³ Hanggan si Simun nagsarig waydi sa Panginuun. Pagka siya itinulbaw yi, pirmi siya magkuyug sa kan Pilipi. Naglingut gid siya sa manga tanda hanggan sa manga makadululaw buwat ni Pilipi.

¹⁴ Naalaman manga apustul ati sa Hirusalim ti manga tawu taga Samarya nagtanggap sa Bagaw Diyus. Nakan sinugu nida sida ni Pidru ni Huwan atag sa Samarya.

¹⁵ Pagka rinmas-ug sa Samarya sida ni Pidru ni Huwan, idinarangin nida ti manga nagsarig sa kan Hisus hampay matanggap waydi nida ti Ispiritu Banal.

¹⁶ Dahil sida tanan udwaya sinuldan Ispiritu Banal. Itinulbaw di waya sa danum ipinasakup sa ngaran Panginuun Hisus.

¹⁷ Dapat pagka kinup-an sida kamang nida ni Pidru ni Huwan, tinanggap ngapu nida ti Ispiritu Banal.

¹⁸ Nakitan diman ni Simun, pag-ipakaun maaw ti Ispiritu sa tawu nu siya kinup-an kamang manga apustul. Nakan magkaibug yi mana siya magpakaun kuwarta sa kanda ni Pidru.

¹⁹ Magkun siya, “Pakan-i waydi niyu aku tunda pag kamaskihan hampay nu kup-an niku kamang una hintay pag tawu, makatanggap diman siya sa Ispiritu Banal.”

²⁰ Sinabi ni Pidru sa kanya magkun, “Kailangan ipadamhak sa kamatayan kanmu kuwarta hanggan kawu, dahil kanmu banta hantup kuntay mabalyuhan kuwarta inda pag karampatan kay pakaun Diyus.

²¹ Unman kawu may karampatan makaawat sa inda pag buruwatun, dahil kanmu tagipusuun unman malumpiyu sa kay magbantay Diyus.

²² Nakan ngani kailangan iampu nimu inda pag kadautan. Pagdarangin duy kawu sa Panginuun hampay patawadun niya kawu sa inda pag daut kagustuhan nimu naisipan.

²³ Dahil mag-akitan niku subra masyadu kanmu maghirak, ga pirisu kawu ginapus nimu kasalanan.”

²⁴ Bag-u sinabi ni Simun sa kanda ni Pidru ni Huwan magkun, “Idarangin duy niyu aku sa Panginuun hampay balaw mana mangyari sa kangku ti kanyu sinabi kuntay midamhak aku.”

²⁵ Pinaanyuan waya nida ni Pidru ti manga patar-ari ati sa banwa, itinudlu waya nida ti bagaw Panginuun sa kanda. Bag-u sida nighit, nuli maan tabug sa Hirusalim. Sa kanda maglakaw, itinultul waya nida ti Mayad pag Barita sa manga tawu sa mayamu pag manga baryu sa daga Samarya.

Si Pilipi ag ti Pinunu Taga Itiyupya

²⁶ Bag-u sinabi usa ka anghil Panginuun sa kan Pilipi magkun, “Paghiwat yi duy pag-ati kawu sa salatan baliwa. Nu rumas-ug kawu sa pagsalakan ginan sa Hirusalim tabug sa banwa Gasa, pagsunsun kawu siti pag dalan.” Sa pangawakawaan tunda pag dalan.

²⁷ Linmakaw yi ngani si Pilipi. May tawu ngani ati sa dalan, usa ka pinunu taga Itiyupya. Manug-asikasu siya tanan kasiyunan ni Kandasi, ibug sabihun ni Rayna taga Itiyupya. Nag-ati tunda pag pinunu tag sa Hirusalim hampay magsamba sa Diyus.

²⁸ Nakitan siya ni Pilipi sa dalan, sa katpung mag-uli yi maan siya atabug sa Itiyupya, masakyan sa kay kalisa. Magbasa siya sa Ribru ni Purupita Isayas.

²⁹ Bag-u sinabi Ispiritu sa kan Pilipi, “Pagpakarani pagkuyug kawu sa tunda pag kalisa.”

³⁰ Nakan nalagiw si Pilipi kay tinakud ti karusa bag-u nadnugan niya ti pinunu magbasa sa Ribru ni Purupita Isayas. Bag-u namaingana si Pilipi sa pinunu magkun, “Magkasalman aw nimu ti kahulugan tungkul sa kanmu pagbasahun asan?”

³¹ Nagsagut ti pinunu magkun, “Kabitay pag masalman niku inda nu unman may tawu magpaliwanag sa kangku?” Bag-u ipinasakay niya si Pilipi sa kay kalisa, pinatukaw sa kay arani.

³² Inda ngani ti bahagi sa Banal Kasuratan kay pagbasahun magkun, “Parihu ga karanidu unman mag-ingay nu darahun tag sa kay maratyan, una ga anak karanidu unman mag-ingay sa atubangan manug-uguy, katunda diman siya, unman gid siya nag-ingay.

³³ Binul-an yi lang siya halaga udyi may nagpabliwa sa kanya. Unman may mitultul tungkul sa kay linahi, dahil binugtas kay kinabuhi sitay sa babaw daga.”

³⁴ Bag-u namaingana ti pinunu sa kan Pilipi magkun, “Kang gustu mana maalaman sa kanmu, si unu nguna ti pagturunuhun ni Purupita Isayas, ngatay kay sadili aw ngatay iba tawu?”

³⁵ Bag-u ginan sa inda ngani pag bahagi Banal Kasuratan itinultul ni Pilipi sa pinunu ti Mayad pag Barita tungkul sa kan Hisus.

³⁶ Sigi di gid kanda lakaw karusa. Pagka dugay nakaras-ug sida sa may danum. Nakan sinabi pinunu sa kan Pilipi magkun, “May danum atay. May ampara aw nguna sa kang magpatulbaw?”

³⁷ Magkun si Pilipi, “Mahimu gid kawu pumatulbaw nu ilinubus nimu kanmu tagipusuun sa pagsarig sa Panginuun.” Sinabi pinunu magkun, “Magsarig aku sa kan Hisu-Kiristu, siya yi ti Anak Diyus.”

³⁸ Pinat-ung pinunu ti karusa bag-u nagdugsun sida duwa ginan sa karusa atag sa danum bag-u itinulbaw siya ni Pilipi.

³⁹ Pagka napatakas sida ginan sa danum, bin-ul Ispiritu Banal si Pilipi. Madi udyi mag-akitan si Pilipi magbaya di gid ti pinunu, nagparargu gid kay lakaw.

⁴⁰ Si Pilipi waydi napatangad sa banwa yi Asdud. Sa kay maglakaw ati, itinudlu niya ti Mayad pag Barita sa tanan manga banwa hanggan sa ud nakaras-ug sa Sisariya.