Binwat 7 - Hanunuu

Kay Sagut ni Istiban sa manga Pinunu

¹ Bag-u nagpaingana ti pangulu manughandug sa Balay Diyus sa kan Istiban magkun, “Tutuu aw tida?”

² Bag-u nagsagut si Istiban magkun, “Kamu duy pag manga kaparihu niku Hudiyu ag manga paggurangunun sa nasyun, pagpatingi kamu. Ti Diyus makamaskihan sa tanan napakakit sa kanta ginurang sa kan Abraham kay di waya sa Misuputamya ag udwaya nangulian sa banwa Haran.

³ Ati katpung sinabi kabay Diyus sa kan Abraham magkun, ‘Kawu pag-ighit yi ginan sa kanmu daga, ginan sa kanmu manga katawuhan. Pag-ati yi kawu sa daga kang itudlu sa kanmu.’

⁴ Nakan nighit si Abraham ginan sa daga manga Kaldiyu ag nangulian siya sa Haran. Pagka namatay yi kay ama, ipinatalad siya Diyus sitay tag pag daga, sa kanyu pag-ulian taynguna.

⁵ Madi katida, unman siya pinakan-an Diyus daga ati katpung una di ga raprapa lang kay kadaka. Dapat itinaratu ngap Diyus sa kan Abraham inda pag daga ipakaun ngani sa kanya hampay kanya yi hanggan sa kay manga minamat una bukun yi siya. Dapat ati katpung udwaya may anak si Abraham.

⁶ “Inda ti sinabi Diyus magkun, ‘Kanmu minamat aban tabug sa iba daga hampay umistar ati. Baliwun gid ngap sida panawuhun manga tawu ati pag daga. Pakurian sida ati sa sulud upat ka gatus timpu.

⁷ Ati pag nasyun kanda sirbihan, kang waydi pakan-an aban daka pag kakurian.’ Bag-u sinabi Diyus, ‘Pagka dugay umighit sida ati ginan pag daga bag-u sumamba sida sa kangku sitay sa inda pag rugar.’

⁸ Tinalaghut Diyus kay taratu sa kan Abraham. Ti pagturi kay tanda sa taratu. Nakan pagka inanak yi kan Abraham anak si Isaak, tinuri niya ti anak sa ikawalu pag sirang. Kumun diman kay binwat ni Isaak sa kay anak sa kan Hakub. Katunda diman waydi kay binwat ni Hakub sa kay sampulu may duwa ka anak lalaki, imaw yi ngani kanta kaapu-apuhan.

⁹ “Pagka dugay nainggit kanta manga kaapu-apuhan sa kanda patar-ari sa kan Husi, nakan kanda ipinabili siya hampay panawuhun yi siya ati sa daga Ihiptu. Dapat balaw siya pinabay-anan Diyus.

¹⁰ Binawi di niya si Husi ginan sa tanan niya kakurian ag pinakan-an siya kadunungan hanggan mabuut pag ugali sa atubangan ni Paraun, hari manga taga Ihiptu. Nakabaya gid si Paraun sa kan Husi, nakan pinili niya si Husi hampay gubirnadur siya sa Ihiptu hanggan sa tanan niya kasiyunan hari.

¹¹ Pagka dugay nakurian gid ti manga tawu dahil sa lun-us una sa daga Ihiptu una hanggan sa Kanaan. Udyi may mag-akitan karan-unun kanta manga ginurang.

¹² Nakan ngani pagka nabaritaan ni Hakub may tirigu maaw pag karan-unun ati sa Ihiptu, sinugu niya ati tabug kanta manga ginurang.

¹³ Pagka sa ikadwa nida pagbalik ati sa Ihiptu, nagpakilala si Husi sa kay manga patar-ari bag-u naalaman yi waydi ni Paraun tungkul sa kan Husi manga ama manga patar-ari.

¹⁴ Nagpasugu si Husi ipinabuul niya kay ama si Hakub hanggan kay manga katawuhan atag sa Ihiptu. Pitumpulu may lima ka tawu sida sa tanan.

¹⁵ Nag-ati ngani sida ni Hakub hanggan kanta ginurang sa Ihiptu. Ati pag namatay si Hakub hanggan ti iba nita manga kaapu-apuhan.

¹⁶ Bag-u kanda dinara ti manga bangkay tabug sa Sikim, kanda ilinbung sa kalubngan kan Abraham binili sa manga linahi ni Hamur.

¹⁷ “Pagka arani yi ti taning pag kaudasan hampay tupadun Diyus kay itinaratu sa kan Abraham, nagyamu masyadu ti manga Israilita sa daga Ihiptu.

¹⁸ Pagka dugay may tuhay yi pag hari Ihiptu. Unman siya nakaalam tungkul sa kan Husi.

¹⁹ Dinayu niya kanta linahi. Binilinan niya kanta manga ginurang uyanga kunu nida kanda manga anak hampay balaw mabuhi.

²⁰ Ati katpung sa kay taning pag kaudasan iinanak ngap si Muysis. Marinu gid pag anak, pagbayaun Panginuun. Tulu ka bulan kanda inalagaan ti anak siyun di gid sa balay niya gurang.

²¹ Pagka kanda yi mana inuyang, binawi ngap siya anak babayi ni Paraun. Kay inalagaan ga kay diman sadili anak.

²² Tinudluan nida si Muysis sa tanan kadunungan manga taga Ihiptu. Makapangyarihan yi siya una sa kay bagaw una sa kay buwat.

²³ “Pagka upatpulu yi ka timpu kay idad, inisip ni Muysis manduaw sa kay manga kaparihu Israilita.

²⁴ Pagka siyun, may nakitan siya usa ka Israilita paglitusun tawu taga Ihiptu. Nanginapin si Muysis sa Israilita, ginantihan niya ti taga Ihiptu, rargu minatay.

²⁵ Kay hantup ni Muysis barang naintindihan yi waydi niya manga kaparihu Israilita kuntay siya yi ngani ti pinili Diyus hampay iribri niya sida aban ginan sa kakurian sa Ihiptu. Dapat unman ngap naintindihan nida tunda.

²⁶ Pagka sa usa maan ka sirang nakitan ni Muysis duwa ka Israilita mag-arawayan. Gustu niya husayun sida magkun, ‘Hayga duy kamu mag-arawayan? Parihu kabay kamu Israilita?’

²⁷ Dapat ay tunda pag tawu ti mag-away sa kay kaparihu, nangulahig sa kan Muysis magkun, ‘Si unu lugud ti may pakaun katungkulan sa kanmu hampay magpangulu ag maghusay sa kanmi?

²⁸ Banta gustu nimu aku matyun ga kaaldaw kanmu diman waydi minatay ti taga Ihiptu.’

²⁹ Pagka nadnugan ni Muysis tunda pag hampang, naglayas siya, napaiba banwa tabug sa Midyan pag daga. Ati pag nianak kay duwa ka anak lalaki.

³⁰ “Pagka nakalawuy upatpulu ka timpu, may napakakit sa kan Muysis usa ka anghil sa basad labdaban apuy sa ababa pag kayu ati sa pangawakawaan sa sugkad Bantud Sinai.

³¹ Pagka nakitan ni Muysis tunda, naglingut gid siya. Nakan nagpakarani siya hampay kay gid duawan bag-u nakadnug siya sa kay magbagaw Panginuun magkun,

³² ‘Aku ti Diyus nimu manga ginurang, ti Diyus nida ni Abraham, ni Isaak hanggan ni Hakub.’ Tinakigan gid sa dala si Muysis, udyi siya makasumbung.

³³ Sinabi Panginuun sa kanya magkun, ‘Bul-a nimu kanmu lapak ginan sa kanmu raprapa, dahil sakup para sa kangku tunda pag daga kanmu pagtindugan.

³⁴ Nakitan gid ngani niku kanda mag-unuunu manga taga Ihiptu sa kang nasyun pag tawu. Nadnugan diman waydi niku kanda magpabawi. Nakan aku ginan sa langit nagsitay tag sa babaw daga hampay bawiun sida ginan sa kanda kakurian. Taynguna abala duy, hampay kawu yi kang suguun tabug sa Ihiptu.’”

³⁵ Sigi waya kay paliwanag ni Istiban sa Katipunan manga Pinunu magkun, “Sa kabag-u dinayu manga Israilita si Muysis magkun kabay sida, ‘Si unu lugud ti may pakaun katungkulan sa kanmu hampay magpangulu ag maghusay sa kanmi?’ Dapat pagka napakakit sa kan Muysis ti anghil ati sa ababa pag kayu, nagpadakit siya sa kan Muysis kuntay siya yi ngap pag tawu ti pinatukahan Diyus manugpangulu hanggan manugbawi.

³⁶ Sa kay nagbawi sa kanda ginan sa kakurian nagbuwat siya manga makadululaw pag tanda sa Ihiptu, sa Dagat Marara hanggan sa pangawakawaan sa sulud upatpulu ka timpu.

³⁷ “Si Muysis diman waydi ti nagsabi sa manga Israilita magkun, ‘Aban ipakaun Panginuun Diyus sa kanyu ti usa ka purupita kanyu diman kalahi, parihu diman ga kangku sinugu Panginuun.’

³⁸ Kaibahan diman manga Israilita si Muysis sa kanda magmirinsanan sa pangawakawaan. Siya diman ti naghampang sa anghil pagka nagbagaw ti anghil sa kanya hanggan sa kanta manga ginurang ati sa Bantud Sinai. Siya diman ti pinakan-an manga bagaw may kabuhian hampay kay maan ipadakit sa kanta.

³⁹ “Dapat kanta manga ginurang unman nagsunud sa kan Muysis. Bagkus ngap kanda yi lang gid dinayu. Nakadumdum di sida sa kanda ulian kaybi sa Ihiptu.

⁴⁰ Sinabi nida sa kan Aarun magkun, ‘Buwati nimu kami manga diyus-diyusan hampay maggiya sa kanmi. Dahil udyi nimi magkaalaman nu hintay lang ti nangyari sa tunda pag tawu sa kan Muysis, imaw ti nagpalwas sa kanmi ginan sa daga Ihiptu.’

⁴¹ Ati katpung binwat ngani nida kanda diyus-diyusan ga histuda ibun baka bag-u kanda ngani sinagdahan. May manga kapistahan sida hampay sambahun nida tunda pag diyus-diyusan imaw yi ngani kanda binwat.

⁴² Nakan pinatlikudan sida Diyus, pinasibut-an yi lang niya sida magsamba sa manga pamgasan sa langit parihu sa isinurat sa ribru manga Purupita magkun, ‘Kamu pag nasyun Israil, balaw gid ungud sa kangku pag ihinandug niyu kanyu manga hayup minatay, kanyu di waya sa pangawakawaan sa sulud upatpulu ka timpu.

⁴³ Unman magkalimtan niyu ti payag niyu diyus-diyusan ni Muluk, dinaradara diman niyu ti histuda pamgasan niyu diyus-diyusan ni Ripan. Manga diyus-diyusan tunda tinarabahu niyu kamang, hampay sambahun. Nakan kang tulakun kamu tabug sa arayu, sa un-an waya Babilunya pag daga.’

⁴⁴ “Kanda sa pangawakaan waya, siyun diman ti Balay Turda Panginuun sa kanta manga ginurang. Tunda pag Balay Turda binwat angay gid sa kay bilin Diyus ag angay sa mustara ipinakakit Diyus sa kan Muysis.

⁴⁵ Minana nida manga anak ti Turda, kanda ngani dinara pagka si Huswi maan kanda kaibahan sa kanda nagsakup daga Kanaan, sa katpung tinulak Diyus ti manga nasyun ginan sa daga Kanaan. Tunda pag Balay Turda unman nadura sa kanda hanggan sa udwaya naghari si Dabid.

⁴⁶ Lubus pagbayaun Diyus si Dabid. Nakan nagpamuhun si Dabid sa Diyus hampay pumatindug mana siya balay para sa kanya, sa Diyus ngani ni Hakub.

⁴⁷ Dapat si Sulumun ti nagpatindug tunda pag balay.

⁴⁸ “Dapat ay ti Diyus, ti Makamaskihan sa tanan, unman mag-uli sa manga balay binwat manga tawu. Parihu sa kay sinabi purupita magkun,

⁴⁹ ‘Sinabi Panginuun, sa langit aku pag matukawan hampay maghari. Ti daga waydi tarat-an niku manga lulud. Kabitay waya pag kalasi balay kanyu mipatindug hampay kang ulian, aw ngatay kang paraharyan?

⁵⁰ Dahil aku diman ngapu ti may buwat tanan-tanan manga bagay.’ ”

⁵¹ Sigi waya gid kan Istiban paalaala sa Katipunan manga Pinunu magkun, “Tutuu maganit kanyu manga ulu. Kanyu tagipusuun parihu lang ga tawu unman nagsarig sa Diyus. Unman niyu pagpatingihan ti katutuuhanan. Unman waydi kamu magpaniwala sa pagsabihun Ispiritu Banal. Parihu yi lang gid kamu ga kanyu manga ginurang.

⁵² Unman gid may purupita nu unman inunu-unu niyu manga ginurang. Minatay niyu manga ginurang ti manga nagpurupita tungkul sa kay pagras-ug Matadlung pag Suruguun Diyus. Pagka siya rinmas-ug ngani, nagpakampi ngap kamu baliwa sa kalaban ag kanyu minatay siya.

⁵³ Madi tinanggap niyu ti Kasuguan Diyus ipinadakit manga anghil, dapat unman ngap kanyu pagtupadun.”

Kanda Binatu si Istiban

⁵⁴ Pagka nadnugan manga Pinunu kan Istiban binagaw, nangubut yi gid kanda manga bibig sa isug.

⁵⁵ Dapat ay si Istiban lubus sinuldan Ispiritu Banal nagtangda sa langit. Nakitan niya ti masyadu masilaw pag rayaw sa kay libut Diyus hanggan si Hisus matindugan baliwa sa sikun Diyus.

⁵⁶ Sinabi ni Istiban magkun, “Mag-akitan yi niku ti langit nabukasan hanggan ti Anak Tawu matindugan baliwa sa sikun Diyus.”

⁵⁷ Dapat pinuputan di ngap manga Pinunu kanda manga tuli bag-u nanmaragritan. Bag-u nandurunganan sida nandalada sa kan Istiban,

⁵⁸ kanda kinarudkud tabug sa luwas banwa hampay siya bintukun. Linukas dap manga kastigus kanda manga balukas kanda iinintirga sa usa ka kan-akan kay ngaran si Saulu.

⁵⁹ Sa katpung pagbatuhun waya nida si Istiban, nandarangin siya magkun, “Panginuun Hisus, tanggapa gid nimu kang karadwa.”

⁶⁰ Nagluhud siya bag-u nanawag daka magkun, “Panginuun, danga ipakaun nimu sa kanda inda pag kasalanan nida.” Pagka sinabi niya katida, naugtasan yi siya arup.