Binwat 6 - Hanunuu

Pinili ti Pitu ka Kaawat

¹ Ati katpung pagka amat-amat mayamu yi ti manga nagsarig sa kan Hisus nagriklamu ti manga Hilinista pag Hudiyu laban sa manga Hibriyu pag Hudiyu. Magkun sida ti manga Hilinista pag babayi buranday pagpabay-anan kunu unman pagpakan-an kanda pangailangan sa udas maghururayan sirang-sirang.

² Nakan tinipun sampulu may duwa ka apustul ti tanan manga patar-ari bag-u kanda sinabi magkun, “Unman duy mana kailangan pabay-anan nimi kanmi tudlu Bagaw Diyus hampay makaasikasu sa maghururayan pangailangan sa manga buranday.

³ Nakan manga patar-ari, pagpili kamu ginan sa kanyu sa manga patar-ari pitu ka lalaki tunda manga magkaalaman yi waydi kuntay mabuut ag lubus sinuldan Ispiritu Banal. Bag-u sida ti pakan-an nimi inda pag katungkulan sa mag-asikasu sa maghururayan pangailangan sa manga buranday.

⁴ Nu katida ti buwatun nita, matupad diman waydi nimi kanmi pag katungkulan sa magdarangin ag sa magtudlu Bagaw Diyus.”

⁵ Ti tanan manga patar-ari nagbaya sa sinabi manga apustul. Nakan pinili ngani nida si Istiban, marig-un siya sa kay pagsarig sa Diyus ag lubus sinuldan Ispiritu Banal. Bag-u kanda waya pinili sida ni Pilipi, ni Puruku, ni Nikanur, ni Timun, ni Parminas hanggan si Nikulas taga Antiyukya. Siya balaw Hudiyu dapat kaybi niabay siya sa surundanun Hudiyu.

⁶ Pagka napili nida inda pag pitu ka tawu, kanda ipinaatubang sa manga apustul bag-u sida idinarangin ag kinup-an kamang manga apustul.

⁷ Pag-amat-amatan di nida kanda pagtudlu Bagaw Diyus una naan katpung pag manga rugar. Nagyamu di ti manga nagsarig sa kan Hisus ati sa Hirusalim. Una paman sa manga manughandug sa Balay Diyus mayamu ngap ti nagtanggap sa Mayad pag Barita.

Dinakup si Istiban

⁸ Lubus pinapaladan Diyus si Istiban ag pinakan-an siya kamaskihan hampay makabuwat makadululaw gid pag manga tanda sa atubangan manga tawu.

⁹ May manga Hudiyu taga Sirini ag taga Alihandirya, ati sida pag magsamba sa simbahan manga Hudiyu pag-ingarnan Manga Pinalpasan sa Pagkapanawuhun. Pagka dugay ti iba sa kanda napaminsan sa manga Hudiyu taga Silisya hanggan taga Asya sa kanda maglaban sa kan Istiban sa bagaw.

¹⁰ Dapat mahal ngap pag kadunungan kay ipinakaun Ispiritu Banal sa kan Istiban nakan unman gid kaya nida taluhun siya.

¹¹ Nakan ngani may tinudluan sida manga tawu magkun, “Kainda kanyu sabihun, ‘Nadnugan nimi siya nagbagaw kalukuhan laban sa kan Muysis hanggan laban sa Diyus.’ ”

¹² Isinumbung nida si Istiban sa manga tawu, sa manga paggurangunun manga Hudiyu hanggan sa manga manugtudlu Kasuguan. Bag-u kanda dinusmugan si Istiban, kanda dinara tag sa atubangan Katipunan manga Pinunu.

¹³ Bag-u may bin-ul sida manga tawu magbintang sa kan Istiban magkun, “Inda pag tawu unman mag-apas sa kay sarabihun laban sa banal pag Balay Diyus ag laban sa Kasuguan ni Muysis.

¹⁴ Nadnugan gid nimi kay magsabi magkun, tunda pag tawu si Hisus taga Nasarit tulagun niya aban ti Balay Diyus ag ilsan niya ti manga ugali kanta minana ginan sa kan Muysis.”

¹⁵ Tinurun gid si Istiban tanan manga Pinunu matukawan siyun. Nakitan gid nida kay uyahun bilang parihu ga uyahun anghil.