Binwat 4 - Hanunuu

Sida ni Pidru ni Huwan sa Atubangan Katipunan manga Pinunu

¹ Magbagaw waya sida ni Pidru ni Huwan sa manga tawu, nagpakarani ngap sa kanda ti manga manughandug, ti takinan manga guwardiya hanggan ti manga Sadusiyu.

² Magkagalit sida sa kanda ni Pidru ni Huwan dahil pag-itudlu nida sa manga tawu si Hisus nabuhi uman, imaw ti puruyba kuntay buhiun diman uman ti manga namatay.

³ Nakan dinakup nida sida ni Pidru ni Huwan bag-u kanda ipinaslud sa pirisuhan tugka surip, dahil magkayabi yi ati katpung.

⁴ Dapat mayamu ti nakadnug sa kanda ni Pidru paliwanag ti nagsarig sa Panginuun. Kay kabuuhan manga lalaki nagsarig sa Panginuun manga lima yi ka libu.

⁵ Pagka surip nagtiripun sa Hirusalim ti manga pangulu manughandug, ti manga paggurangunun manga Hudiyu hanggan ti manga manugtudlu Kasuguan.

⁶ Siyun diman ti Pangulu Manug-asiwa si Anas, hanggan sida ni Kaipas, ni Huwan, ni Alihanduru hanggan ti tanan manga katawuhan Pangulu Manug-asiwa.

⁷ Pagka bin-ul ginan sa pirisuhan sida ni Pidru ni Huwan, ipinaatubang sida sa Katipunan manga Pinunu bag-u pinaingana nida magkun, “Sa hintay pag kamaskihan pag pinaayad niyu tunda pag tawu? Kantapu pag ngaran kanyu sinampit?”

⁸ Bag-u si Pidru, lubus sinuldan Ispiritu Banal, nagsagut sa kanda magkun, “Kamu duy pag manga pangulu ag manga paggurangunun manga Hudiyu,

⁹ taynguna kanyu pagsuyasidun kami tungkul sa kamayadan binwat sa tawu lunu, nu kabitay siya pag pinaayad.

¹⁰ Kailangan maalaman niyu hanggan tanan manga Israilita, inda pag tawu taynguna matindugan sa kanyu atubangan dahil sa ngaran ni Hisu-Kiristu taga Nasarit. Imaw ti nagpaayad sa kanya. Imaw diman pag Hisus kanyu ipinaku sa kurus dapat siya binuhi uman Diyus.

¹¹ Siya yi ngani ti pagkumnun sa Banal Kasuratan, ‘Ti dinayu manugpatindug balay pag batu, imaw ngap ti nagbaliw patakinan pag batu.’

¹² “Udyi may iba hanapan karibrihan nu unman si Hisus lang. Dahil unman may iba ngaran sa sirung langit ipinakaun sa manga tawu hampay magribri sa kanta.”

¹³ Pagka nadnugan manga Pinunu kanda ni Pidru ni Huwan pagbagawun matutum kanda naisipan, naglingut gid sida dahil alam diman nida unman masyadu kay inadalan nida ni Pidru nu unman kasarangan lang kay kadunungan pag manga tawu. Kilala diman manga Pinunu sida ni Pidru ni Huwan kay iribahun ni Hisus kaybi sa kay buhi di waya.

¹⁴ Dapat unman yi sida may sabihun laban sa kanda ni Pidru ni Huwan dahil nakitan yi waydi nida ti tawu pinaayad sa kay pagkalunu siyun matindugan sa kanda arani.

¹⁵ Sinabi Katipunan manga Pinunu sa kanda ni Pidru magkun, “Palwas dapu kamu.” Bag-u nagharampangan ti manga Pinunu.

¹⁶ Magkun sida, “Hintay nguna kanta buwatun sa inda pag manga tawu? Dahil magkaalaman yi waydi tanan manga tawu sa banwa Hirusalim inda pag makadululaw gid pag tanda binwat nida ni Pidru ni Huwan. Ag dayi kita makapahimudil.

¹⁷ Dapat ay kailangan sabihan nita sida danga yi gid sida magbagaw una sa kantapu tungkul sa kamaskihan ni Hisus hampay inda pag barita unman milantag sa tanan tawu.”

¹⁸ Nakan pagka kanda pinaslud maan sida ni Pidru ni Huwan, kanda sinabihan magkun, “Inda ginan danga yi gid kamu magbagaw una magtudlu tungkul sa kan Hisus.”

¹⁹ Dapat ay nagsagut sida ni Pidru ni Huwan magkun, “Bahala kamu magkilala nu naan ti tama sa atubangan Diyus, nu kamu aw ngatay Diyus ngap ti dapat paniwalaan.

²⁰ Nu kami bay duy, dayu gid kami umapas kanmi magtultul tungkul sa kanmi nakitan ag kanmi nadnugan.”

²¹ Lalu waya ngap sida hinigpitan manga pinunu bag-u sida pinalpasan. Unman sida may mag-akitan kadautan agud maparusahan ti duwa, dahil ti manga tawu magdayaw gid sa Diyus sa nangyari.

²² Subra yi upatpulu ka timpu kay idad tunda pag tawu, ti binwatan tunda pag makadululaw pag tanda ag siya pinaayad sa pagkalunu.

Magdarangin ti manga Patar-ari hampay Matutum Kanda Naisipan

²³ Pagka pinalpasan yi ngani sida ni Pidru ni Huwan, nag-ati sida sa kanda manga kaibahan bag-u itinultul nida sa kanda ti tanan sinabi manga pangulu manughandug sa Balay Diyus hanggan manga paggurangunun manga Hudiyu.

²⁴ Pagka nadnugan manga patar-ari tunda pag manga barita, nagkarausa kanda manga tagipusuun, nagdarangin sida naghampang sa Diyus magkun, “Kawu duy Panginuun, ti naglalang langit, daga, dagat, hanggan ti tanan pag manga bagay asan sa kanda.

²⁵ Pagka inudyukan Ispiritu Banal kanmu suruguun si Dabid, kanmi waydi ginurang, ipinadakit niya kanmu bagaw magkun, ‘Hayga tinalung sa isug ti manga balaw Hudiyu? Hayga ngani naggayak tunda pag manga nasyun tawu kanda turunu unman may pulus?

²⁶ Ti manga hari sa babaw daga nag-alistu yi hampay gumira. Nagkaminsan ti manga pinunu laban sa Panginuun Diyus ag laban sa kay Pinili Manugribri pag Hari.’

²⁷ “Dahil tutuu ngani nagkabuu sida ni Hirudis ni Punsiyu Pilatu hanggan ti manga balaw Hudiyu ag ti nasyun Israil sitay sa banwa Hirusalim hampay labanan nida kanmu mahal pag Suruguun si Hisus, imaw ti kanmu Pinili Manugribri pag Hari.

²⁸ Binwat nida tunda angay sa kanmu kagustuhan mangyari, ti daan ihinanda nimu pag gayak.

²⁹ Taynguna Panginuun, alalahana nimu nu kabitay sida nangungud ngap sa higpit sa kanmi. Pabisugun duy nimu kami kanmu manga suruguun hampay unman gid kami magkadala magtudlu kanmu Bagaw sa manga tawu.

³⁰ Ipakakit nimu kanmu kamaskihan sa kanmu magpaayad sa may manga sakit. Pagsa kanmi ti kamaskihan ngaran ni Hisus kanmu banal pag Suruguun hampay makabuwat kami manga makadululaw ag lilingutan pag manga tanda.”

³¹ Pagka nakadarangin yi sida nauyug ti balay kanda tinipunan, sida tanan lubus sinuldan Ispiritu Banal ag matutum kanda naisipan nanudlu sida Bagaw Diyus.

Inusa Nida Kanda Kasiyunan

³² Nagkabilug ti manga nagsarig sa Panginuun nagkausa sida sa tagipusuun hanggan sa naisipan. Unman sida nag-araminan kanda kasiyunan, kanda ngap inusa tanan.

³³ May daka pag kapangyarihan kay tudlu manga apustul tungkul sa kay pagkabuhi uman Panginuun Hisus. Ilinubus Diyus kay papalad sa kanda tanan.

³⁴ Kang-ud di sida tanan-tanan sa kanda manga kailangan dahil kanda pag-ipabili kanda daga hanggan balay.

³⁵ Bag-u kay kabilyanan pag-ipaintirga nida sa manga apustul. Bag-u pag-ihuray maan manga apustul sa kada usa angay sa kay pangailangan.

³⁶ Katunda diman waydi hanggan kay binwat ni Husi, usa ka Libita taga Sipru. Binansagan siya manga apustul Birnabi, kay ibug sabihun Manugparig-un.

³⁷ May tanman ngani si Husi kay ipinabili bag-u dinara niya ti kabilyanan kay iinintirga sa manga apustul.