Binwat 3 - Hanunuu

Pinaayad ti Tawu Lunu

¹ Pagka dugay sa udas nida pandarangin, manga palis ngani ti init, sida ni Pidru ni Huwan nag-ati maan sa Balay Diyus.

² Pagka sida rinmas-ug sa Balay Diyus, sa pagkumnun Marinu pag Sabian, may nakitan sida usa ka lalaki lunu. Ginan sa kay inanak daan lunu tunda pag tawu. Sirang-sirang pagbab-un siya bag-u pag-ibugtang sa puun sabian Balay Diyus hampay manhagad kay pangailangan sa manga magsulud ati.

³ Pagka nakitan niya sida ni Pidru ni Huwan magsaka sa Balay Diyus, nanhagad siya sa kanda kay pangailangan.

⁴ Tinurun siya nida ni Pidru ni Huwan bag-u magkun si Pidru, “Bantayi nimu kami.”

⁵ Nagbantay ngani siya sa kanda, kay isip barang siya pakan-an.

⁶ Bag-u magkun si Pidru, “Unman aku may kuwarta una di. Dapat may tuhay pag kaayadan aku, kang ngap ipakaun sa kanmu. Sa ngaran ni Hisu-Kiristu taga Nasarit, kawu duy paglakaw yi.”

⁷ Kay hiniyaptan ti lalaki sa kay sikun pag kamang bag-u kay itinindug ag susun nagbisug kay manga lulud hanggan burubuku.

⁸ Tinmindug siya rargu nag-utbaw bag-u naglakaw-lakaw. Mag-utbaw-utbaw gid siya kay magsaka tag sa Balay Diyus kaibahan nida ni Pidru, masulung magdayaw sa Diyus.

⁹ Nakitan diman tanan tawu siya maglakaw magdayaw sa Diyus.

¹⁰ Bag-u nakilala nida siya yi ngani maaw ti matukawan sa pagkumnun Marinu pag Sabian Balay Diyus maghagad kay pangailangan. Nakan sida masyadu yi lang gid nadulaw.

Kan Pidru Paliwanag sa manga Tawu ati sa Balay Diyus

¹¹ Paghiyaptan waya lalaki sida ni Pidru ni Huwan, ti tanan manga tawu ungud naglingut masyadu. Nakan minsan namalalagiwan sida nagpakarani sa kanda ni Pidru ati sa pagkumnun Parat-ungan ni Sulumun.

¹² Pagka nakitan ni Pidru ti kayamuan tawu, sinabi niya sa kanda magkun, “Kamu pag manga Israilita, hayga nadulaw kamu masyadu sa inda pag nangyari? Hayga kamu magpakaturun sa kanmi? Kanyu aw lugud hantup pinalakaw nimi siya dahil sa kanmi sadili kamaskihan, aw ngatay dahil kami manga maka-diyus?

¹³ Bukun duy katida. Ti Diyus ni Abraham, ni Isaak, ni Hakub, hanggan nita manga ginurang imaw ti nagpakakit kay daka gid pag kamaskihan ni Hisus kay suruguun Diyus. Dapat kanyu ngap ipinabahala siya sa manga pinunu Hudiyu bag-u kanyu dinayu sa atubangan ni Pilatu, madi kay mana gustu palpasan di si Hisus.

¹⁴ Si Hisus banal ag matadlung. Dapat kanyu ngap dinayu. Bag-u hinagad ngap niyu ti manlilibun tawu hampay siya ti ipalpas.

¹⁵ Kanyu minatay si Hisus ti gimpuunan buhi. Dapat binuhi maan siya Diyus ginan sa kamatayan. Nakitan gid nimi tunda.

¹⁶ Kay kamaskihan ni Hisus ti nagpakaun kabisugan sa inda pag tawu. Nangyari tunda dahil sa pagsarig sa kay ngaran ni Hisus. Ti pagsarig sa kan Hisus ti lubus nagpaayad sa kanya ga kanyu diman waydi nakitan taynguna.

¹⁷ “Alam diman waydi niku duy, manga kaparihu niku Hudiyu, unman niyu nasalman kanyu binwat ati katpung, parihu diman ga kanyu manga pinunu unman diman sida nakasalum kanda binwat.

¹⁸ Dapat sa kanyu binwat tunda, natupad yi ti dugay yi pag ipinaalam Diyus sa panab-anan manga purupita magkun, kailangan umagwanta ti Pinili Diyus Manugribri pag Hari hanggan sa kamatayan.

¹⁹ “Nakan duy patlikudi yi niyu kanyu manga kasalanan bag-u pag-atubang yi sa Diyus hampay duraun yi niya kanyu kasalanan,

²⁰ ag pakan-an kamu rugar hampay maariwaya kanyu naisipan. Suguun niya sa kanyu tabug si Hisus, imaw ti Pinili Diyus Manugribri pag Hari.

²¹ Kailangan mag-alagad dap si Hisus sa langit hanggan sa udwaya bag-uhun Diyus ti tanan pag manga bagay. Imaw ngani kay binagaw Diyus kaybi di waya ipinadakit yi manga purupita.

²² Sinabi yi kabay ni Muysis magkun, ‘Aban suguun Panginuun Diyus sa kanyu ti usa ka purupita kanyu diman kalahi, parihu diman sa kay nagsugu sa kangku. Kailangan paniwalaan gid niyu siya una hintay kay sabihun sa kanyu.

²³ Una si unu pag tawu nu unman magpaniwala sa tunda pag purupita, udyi siya sakup sa nasyun Diyus, pihu matyun.’

²⁴ Tunda pag manga purupita ti may iinadal ginan sa Diyus. Tanan-tanan ginan waya sa kan Samwil hanggan manga nagdasun sa kanya, nagpaalam yi sida daan tungkul sa manga mangyari taynguna.

²⁵ Sa kanyu ngani tabug ti manga taratu Diyus ipinadakit manga purupita ag kamu nasakup sa kay taratu tinalaghut Diyus sa kanyu manga ginurang pagka sinabi niya sa kan Abraham magkun, ‘Ginan sa kanmu minamat papaladan niku ti tanan manga nasyun sa babaw daga.’

²⁶ Nakan pinili Diyus kay Suruguun si Hisus bag-u un-an sinugu siya tabug ngap sa kanyu hampay papaladan kamu ag hampay awatan kamu pumatlikud sa kanyu daut ugali.”