Binwat 28 - Hanunuu

Ti manga Nangyari ati sa Puru Malta

¹ Pagka kami nakaribri yi nakaras-ug yi sa daga, naalaman nimi tunda pag puru sa karaw-an dagat kay ngaran Malta.

² Mayad yi lang gid ungud kanda nabubut-un manga tawu ati pag daga sa kanmi. Pinmadna ti uran maramig, nakan namagba sida apuy inalagaan gid kami mayad.

³ Nagbuul si Pablu kayu kay pinagba sa apuy. Dahil sa init may linmuwang udtu adlaw, nagkagat sa kan Pablu kamang udyi binmul-iw.

⁴ Pagka ti manga tawu taga ati pag rugar nakakit sa iyay mabitinan sa kan Pablu kamang, sinabi nida sa usa kag sa usa magkun, “Pihu gid maaw inda pag lalaki magpanlibun sa tawu. Una siya nakaribri sa dagat, udyi pag-ipahintulut ni Diyus-diyusan Suwirti siya mabuhi waya.”

⁵ Dapat ay pinagpag ni Pablu ti ulay tag sa apuy, unman siya naunu.

⁶ Maghantup yi ti manga tawu kanda isip bumaga yi kay bilug ni Pablu, aw barang gulpi maplid siya mamatay. Dapat ay pagka dugay yi kanda magturun ag unman diman may nakitan sida may makuri nangyari sa kan Pablu, nagbag-u yi sida kanda isip, magkun sida, “Siya maaw usa ka diyus.”

⁷ Sa kay karani ati pag rugar kan Publiyu pag manga daga, imaw ti pinunu siyun pag puru sa karaw-an dagat. Mayad gid kay tinanggap niya kami sa kay balay. Ati kami pag nangagum sa sulud tulu ka yabi.

⁸ Ati katpung kay ama ni Publiyu maigyaan, dahil pagramigan siya mag-iput. Nakan dinuawan siya ni Pablu sa kay sulud-sulud. Pagka kan Pablu idinarangin ti gurangun ag kinup-an kamang, pinaayad yi ngani siya.

⁹ Pagka kan Pablu pinaayad kay ama ni Publiyu, ti tanan tawu taga ati pag daga Malta, nu may mag-adnugan manga sakit, nagdinulud tag sa kan Pablu bag-u kay diman pinaayad.

¹⁰ Nakan pinakan-an nida kami mayamu pag kagamitan bilang kanda pasalamat sa kanmi. Pagka kami umighit yi ikinarga waya nida sa bangka una hintay kanmi kailangan balalunun.

Nighit si Pablu ginan sa Malta atabug sa Ruma

¹¹ Pagka nakalawuy tulu ka bulan, nagsakay kami sa usa ka bangka, kay ngaran “Siing.” Tunda ngani pag bangka taga Alihandirya, nadugay diman sa Malta hampay magpalipas sa manga bulan mabagyu.

¹² Pagka nighit kami ginan sa Malta pagka dugay nakaaput kami sa banwa Sirakusa. Nadugay kami siyun tulu ka yabi.

¹³ Siyun ginan naparargu maan kanmi lakaw bag-u nakaaput kami sa Rigyu pag banwa. Pagka sa usa maan ka sirang naghuyup ti durus ginan sa salatan. Sa sulud duwa ka sirang rinmas-ug yi kami sa banwa Putiuli.

¹⁴ Pagka ati may nakitan kami manga patar-ari, tinanggap nida kami sa kanda balay. Nakan nansabang kami sa kanda sa sulud usa ka duminggu. Pagka siyun ginan naglakaw ngani kami atag sa Ruma.

¹⁵ Pagka naalaman manga patar-ari sa Ruma tungkul sa kanmi lakaw, nag-atag sida ti iba tugka sa Palingkihan Apyu, ti iba tugka sa may Tulu ka Darayunan hampay magsulang sa kanmi sa dalan. Pagka nakitan ni Pablu ti manga patar-ari nagpasalamat siya sa Diyus, nagmabisug maan kay naisipan.

Kay Nanudlu ni Pablu sa Ruma

¹⁶ Pagka kami rinmas-ug sa Ruma, pinahintulutan nida si Pablu mag-istar sa usa ka balay, balaw sa pirisuhan, pagtandan siya usa ka sundalu.

¹⁷ Pagka nakalawuy tulu ka sirang, pinab-ul ni Pablu ti manga takinan manga Hudiyu sa Ruma hampay sida manharampangan. Pagka nagtipun yi sida, sinabi niya sa kanda magkun, “Manga kaparihu niku Hudiyu, madi unman gid aku may binwat kasalanan laban sa kanta nasyun hanggan laban sa patayak ugali nita manga ginurang, pinirisu aku sa Hirusalim bag-u kanda ipinabahala aku sa manga taga Ruma.

¹⁸ Pagka nag-usisa sa kangku ti manga husgadu taga Ruma, unman sida may nakitan kasalanan sa kangku hampay aku sintinsiyahan sa kamatayan, nakan kanda yi mana palpasan aku.

¹⁹ Dapat ay unman gid nagpasnu ti manga Hudiyu. Nakan udyi aku may nakitan iba paraan nu ud ipahusay yi lang niku kang kasu sa Pangulu Hari, madi aku unman gid may idimanda laban sa kanta kaparihu Hudiyu.

²⁰ Nakan hinigtan inda aku tarikada dahil sa kanya, sa pag-asahan nasyun Israil. Nakan ngani kang gustu magkarahampang kita.”

²¹ Sinmagut ti manga pinunu Hudiyu sa kanya magkun, “Unman duy kami may tinanggap manga surat ginan sa Hudiya tungkul sa kanmu. Pagka nagras-ug sitay kanta manga kaparihu Hudiyu, unman diman sida may ibinarita una sinabi laban sa kanmu.

²² Dapat gustu diman gid nimi pakidnugan nu kabitay kanmu manga sarabihun, dahil magkaalaman yi waydi nimi inda pag surundanun niyu paglabanan manga tawu una naan pag rugar.”

²³ Nakan nagtararatuhan sida sa iba sirang. Pagka ati katpung pag sirang, lalu waya mayamu tawu ti naglinuwang tag sa kan Pablu pagdayunan pag balay. Ginan surip hanggan yabi malinaw gid kay itinultul niya sa kanda tungkul sa kay paghari Diyus. Ginamit niya ti Kasuguan ni Muysis hanggan ti Kasuratan manga Purupita hampay maintindihan nida ti katutuuhanan tungkul sa kan Hisus.

²⁴ Ti manga iba nagpasnu ngani sa kan Pablu pagsabihun, dapat ti manga iba unman gid naniwala.

²⁵ Nakan unman magkabuu kanda naisipan. Pagka sida magkaginan yi, inda wadi kan Pablu sinabi sa kanda magkun, “Tama gid duy kay ipinabagaw Ispiritu Banal sa kan Purupita Isayas tag sa kanyu manga ginurang, magkun,

²⁶ ‘Pag-ati kawu pagsabi sa inda pag nasyun Israil magkumun: Magpakapatingi lang kamu, dapat unman diman kamu makasalum. Magpakabantay lang kamu, dapat unman diman kamu kumilala.

²⁷ Dahil maganit yi kay tagipusuun inda pag manga tawu. Pinut-an nida kanda manga tuli. Ipinikat nida kanda manga mata, hampay unman makakit kanda manga mata, ag unman makadnug kanda manga tuli, ag hampay unman diman umintindi kanda tagipusuun. Magkun ti Diyus, nakan katida hampay sida unman bumalik sa kangku. Dayu waydi paayadun niku sida.’”

²⁸ Bag-u sinabi waya ni Pablu magkun, “Kailangan pagmaalaman yi gid niyu, duy, inda pag barita ginan sa Diyus tungkul sa karibrihan ipadakit sa manga balaw Hudiyu. Nu bay sida gid pihu mamatingi.”

²⁹ Pagka katida kay binagaw ni Pablu, nuli yi ti manga Hudiyu, magdarag-an sida sa kanda harampangan.

³⁰ Sa sulud duwa ka timpu nangulian ati sa Ruma si Pablu sa kay pagpilitihan pag balay. Tinanggap niya ti tanan tawu nagsabang sa kanya.

³¹ Ipinaliwanag niya tungkul sa kay paghari Diyus ag itinudlu niya tungkul sa Panginuun Hisu-Kiristu. Matutum kay naisipan ni Pablu sa kay magtudlu ag unman may nag-ampara sa kanya.