Binwat 27 - Hanunuu

Dinara si Pablu manga Sundalu atabug sa Ruma

¹ Pagka inisip nida kailangan kami sumakay yi atabug sa Italya, iinintirga nida si Pablu hanggan manga iba waya pirisu sa kan Hulyu. Si Hulyu kapitan manga sundalu sakup Pangulu Hari.

² Sinmakay kami sa usa ka bangka taga Adramityu atabug sa manga banwa sa baybay dagat sa purubinsiya Asya. Pagka kami nakasakay, nighit yi kami kaibahan diman nimi si Aristarku taga Tisalunika sakup daga Masidunya.

³ Pagka sa usa ka sirang nakaaput yi kami sa banwa Sidun. Mayad kay nalub-anan isip ni Hulyu atag sa kan Pablu, nakan kay pinayagan niya si Pablu magsabang sa kay manga kakilala ati hampay awatan diman nida siya tungkul sa kay manga pangailangan.

⁴ Nighit maan kami ginan sa Sidun. Pagsarungsungun kami durus nakan ipinalakaw nida ti bangka arani sa Sipru pag puru hampay magpakubli.

⁵ Bag-u pagka nagdipay kami sa dagat sa katpadan manga daga Silisya hanggan Pampilya, nakaaput kami sa banwa Mira, sakup sa daga Lisya.

⁶ Ati sa Mira hinanap kapitan ti usa ka bangka taga Alihandirya kay turunu atabug sa Italya. Bag-u pinasakay maan kami siti.

⁷ Malumuy gid kanmi lakaw sa sulud manga pira ka sirang, dahil pagsarungsungun kami durus. Nakurian gid kami. Pagka dugay nakaaput kami sa katpadan banwa Kinidu. Siyun ginan udyi nakahimu naparargu kanmi lakaw, dahil mabisug ti durus. Nakan nag-alibud kami napakubli sa Kirita pag puru, naglawuy kami sa katpadan Salmun pag rungus baybay.

⁸ Nakurian gid kami sa kanmi mag-alubaybay sa saruy hanggan sa udwaya nakaras-ug sa rugar kay ngaran Mayad pag Punduhan balaw arayu sa banwa Lasiya.

⁹ Nadugayan yi kami sa kanmi lakaw, nakalawuy yi paman ti Kasirangan Paglukat. Dilikadu yi gid nu lumakaw waya ti bangka.

¹⁰ Nakan kan Pablu pinaalalahanan sida magkun, “Mag-akitan yi duy niku, madala gid kanta lakaw sitay ginan. Pihu may malakawan kita kakurian ag kadamhakan una sa karga una sa bangka, dilikadu hanggan kanta buhi.”

¹¹ Dapat ti kapitan naniwala sa manugtimun hanggan sa may apu bangka, balaw ngap pinaniwalaan niya kan Pablu sinabi.

¹² Tunda pag punduhan unman mapakublihan sa amihan. Nakan ti kayamuan tawu sa bangka magkaibug mighit siti ginan pag punduhan tag sa kalalawdan hampay nu mahimu lang makaaput waya mana sida sa Pinisi pag punduhan sa baybay diman Kirita pag puru, kay sanggaan baliwa sa isalpan kanaway, nakan mayad pag parasan-iban sa katpung amihanun.

Binmisug ti Durus sa Dagat

¹³ Pagka naghuyup-huyup ti durus ginan sa salatan, nakabaya yi sida kanda isip mahimu yi ngani ipatarus nida kanda lakaw. Binatak nida kay pundu bag-u nag-agubay sida arani sa baybay Kirita.

¹⁴ Dapat ay balaw nadugay hinmampak ngap ti bagyu amihan ginan sa daga Kirita.

¹⁵ Pagka natamaan bagyu ti bangka, unman makasarungsung sa durus. Udyi kami may mabuwat, rargu ipinadpad yi lang durus.

¹⁶ Sa kanmi nipadpad, napakubli waya kami ngalay-ngalay sa Kawda pag puru. Madi makuri gid, kanmi waya nabawi kanmi balutu.

¹⁷ Pagka nikarga yi nimi ti balutu, binugkus waya nida kalat ti bangka sa unman madaut ngani sa humbak. Nadala sida barang sumayad ti bangka sa bungtud sa arani baybay daga Libya, nakan bin-ul dapu nida kay layag napaanud yi lang sida sa durus.

¹⁸ Rargu di gid kay paguspus bagyu, nakan pagka sa usa maan ka sirang iyinmut nida sa dagat kanda karga.

¹⁹ Sa ikatlu pag sirang iyinmut yi nida ti manga gamit bangka, sida diman waydi ti nagyamut kay apu.

²⁰ Dugay gid kami unman nakakit sa init una pamgasan. Unman diman gid naghubung ti bagyu. Nakan udyi nagsarig kuntay makaribri waya kami.

²¹ Dugay yi ti manga tawu sa bangka unman may kinaun, nakan tinmindug si Pablu sa kanda karaw-an nagsabi magkun, “Nu abi kamu duy nagpasnu lang mana sa kangku ag balaw nighit ginan sa Kirita, naiwasan niyu inda pag kakurian ag unman mana narangga ti bangka, unman diman nalugi kamu sa kanyu karga.

²² Dapat taynguna duy kang pagsabihan kamu pagmatutum kanyu naisipan, dahil balaw maunu kamu tanan. Ti bangka lang pihu gid madaut.

²³ Dahil kis-ab yabi may napakakit sa kangku usa ka anghil Diyus. Sa tunda pag Diyus aku pag napasakup hanggan magsamba.

²⁴ Nagsabi ti anghil magkun, ‘Danga kawu magkadala, Pablu. Kailangan kawu umatubang sa Pangulu Hari. Mayad kay nabubut-un Diyus sa kanmu nakan iribri diman niya ti tanan manga kaibahan nimu sa bangka.’ ”

²⁵ Magkun si Pablu, “Nakan ngani duy pagmatutum yi lang kanyu naisipan. Dahil aku magsarig sa Diyus pihu mangyari ti tanan niya sinabi sa kangku.

²⁶ Dapat ay kailangan ipadpad kita durus midunggu sa usa ka puru sa karaw-an dagat.”

²⁷ Pagka sa ikasampulu may upat yi pag yabi, pag-ipadpad yi kami durus atabug sa dagat Adriyatiku. Pagka sa magkakaraw-an yi yabi, magkaungdan manga may apu bangka, bilang ga magpakarani yi kami sa hunasan.

²⁸ Nakan tinuntunan nida lubid may pamatu, hampay maalaman nu kabitay kay kaabasad. Nakitan nida duwapulu waya ka dupa kay kaabasad. Pagka lagat-lagat waya kanda maan tinuntunan, kanda nakitan sampulu may lima wadi ka dupa kay kaabasad.

²⁹ Magkadala sida barang midunggu ti bangka sa mabatu nakan kanda itinuntun ti upat ka pundu sa buli baliwa bangka, bag-u nagdarangin sida hampay udyi mana dugay ti sirang.

³⁰ Paggayakun manga may apu bangka lumayas yi ginan sa bangka, nakan itinuntun nida ti balutu tag sa dagat, magpabalhinguun sida kanda dap ilagpak kunu ti manga pundu sa dulung baliwa bangka.

³¹ Dapat sinabi ni Pablu sa kapitan hanggan sa manga sundalu magkun, “Nu lumayas ti manga may apu bangka, pihu duy kamu dayu maribri.”

³² Nakan pinlud yi lang manga sundalu ti manga kalat balutu, kanda yi lang ipinaanud.

³³ Pagka madlum surip yi, pagsagdahun ni Pablu sida tanan hampay mangaun magkun, “Taynguna sampulu may upat yi ka sirang kamu ud may kinaun sa kanyu mag-alagad sa kalma.

³⁴ Nakan duy, kang pagsabihun sa kanyu, pagkaun yi baga. Kailangan niyu ti karan-unun hampay balaw masbuk. Ud may madura una lang usa ka buhuk sa kanyu ulu ginan.”

³⁵ Pagka sinabi niya tunda, pinunpun niya ti usa ka tinapay sa lamak. Pagka nakapasalamat siya sa Diyus sa atubangan nida tanan, pinikapika niya ti tinapay bag-u nangaun siya.

³⁶ Nagmatutum kanda naisipan tanan bag-u nangaun diman sida.

³⁷ Kami tanan ti nakasakay sa bangka duwa ka gatus may pitumpulu may unum ka tawu.

³⁸ Pagka nabsug yi sida bag-u iyinmut nida ti tirigu sa dagat hampay gumaan ti bangka.

Sa Pagkabagbag Bangka

³⁹ Pagka surip yi may nabantay sida daga, dapat unman nakilala nida nu hintay pag daga tunda. Dapat nakitan nida ti usa ka lihud baybay. Kanda ginayak nu mabuwat mana nida, ipaduung ti bangka atag sa basad lihud.

⁴⁰ Nakan pinlud nida ti manga higut sa pundu, kanda ilinagpak sa dagat bag-u linbad diman nida ti manga higut sa timun. Binatak nida kay layag baliwa sa dulung hampay samburun durus ag darahun ti bangka atabug sa baybay.

⁴¹ Dapat ay pagka sa ababaw yi nisadsad ti bangka nilbung yi dayun kay dulung, udyi nakaighit. Nabasag yi kay ulin baliwa dahil sa mabisug pag humbak.

⁴² Naggayak ti manga sundalu matyun yi nida ti manga pirisu hampay unman may lumanguy rargu lumayas.

⁴³ Dapat kay gustu kapitan danga nida matyun si Pablu, nakan inampara niya kanda gayak. Bag-u sinabihan kapitan ti manga tawu madunung maglanguy, pag-una sida pagluksu, pagtakas yi atag sa baybay.

⁴⁴ Ti manga iba sinugu niya pagbuul tabla, manga gipak bangka kanda paragabayan. Kami tanan nakaras-ug di sa baybay.