Binwat 26 - Hanunuu

Kay Sagut ni Pablu sa Atubangan ni Agripa

¹ Sinabi ni Agripa sa kan Pablu magkun, “Mahimu yi kawu magbagaw, mamatingi kami nu kabitay kanmu rasun.” Pinaamanan ni Pablu ti manga magpatingi bag-u magbagaw siya, sinagut niya ti sumbung sa kanya.

² Magkun si Pablu, “Salamat duy Hari Agripa kanmu pinakan-an aku rugar taynguna hampay sumagut sa kanmu atubangan sa tanan manga sumbung manga Hudiyu laban sa kangku.

³ Lalu aku magbaya dahil alam yi gid nimu ti ugali manga Hudiyu hanggan kanda unman magparasnuan tungkul sa kanda surundanun. Nakan duy pagpatingi gid kawu una aba kang tultulanun.

⁴ “Magkaalaman tanan manga Hudiyu kang ugali ginan sa kang diit di waya hanggan taynguna tugka, una sa kang sadili banwa una sa Hirusalim.

⁵ Daan talaga alam nida ag mahimu kanda patutuuhanan nu sida may gustu lang, kang ugali kaybi ginan angay sa masyadu mahigpit pag panudlu nita surundanun, angay ngani sa panudlu manga Parisiyu.

⁶ Bag-u taynguna aku pagbistahun dahil sa kang pagsarig sa kay taratu Diyus sa kanta manga ginurang kaybi.

⁷ Imaw diman pag taratu ti pag-asahan sampulu may duwa ka linahi nita nasyun, nakan sida masipag gid sa kanda magsamba sa Diyus sirang yabi. Dahil sa kang mag-asa, Hari Agripa, sa tunda pag taratu, nakan aku idinimanda ngap manga Hudiyu.

⁸ Hayga lugud kamu pag manga Hudiyu magsabi dayu mahimu buhiun maan Diyus ti manga namatay?

⁹ “Inisip diman niku kaybi kailangan labanan niku sa mayamu paraan kay ngaran ni Hisus taga Nasarit.

¹⁰ Imaw yi ngani kang binwat sa Hirusalim. Pagka may tinanggap aku karampatan ginan sa manga pangulu manughandug sa Balay Diyus, mayamu pag manga napasakup sa kan Hisus kang ipinapirisu. Nagpasnu diman gid aku nu sida sintinsiyahan yi sa kamatayan.

¹¹ Nanalapudan aku sa manga simbahan manga Hudiyu. Nu may nakitan aku manga napasakup sa kan Hisus, pinarusahan niku sida hampay pabul-iwun sida sa kanda pagsarig sa Panginuun. Sa mahigpit niku pangagalit sa kanda, nag-ati diman aku sa manga banwa luwas yi nita nasyun Israil hampay pag-unuunuhun di gid niku ti manga napasakup sa kan Hisus ati.

Itinultul ni Pablu kay Nagsarig sa kan Hisus

¹² “Nakan ngani sinugu aku manga pangulu manughandug sa Balay Diyus tabug sa Damasku may karampatan hampay unu-unuhun niku ti manga napasakup sa kan Hisus.

¹³ Pagka karaw-an yi sirang kami sa dalan waya, Hari Agripa, may nakitan aku masyadu gid pag marayaw ginan sa langit, balaw di ga init kay pagkasilaw. Narayawan duy aku hanggan kang manga kaibahan.

¹⁴ Nag-irisubsub kami tanan sa daga bag-u nakadnug aku may magbagaw sa kangku sa bagaw Hibriyu magkun, ‘Saulu, Saulu, hayga aku kanmu pag-unuunuhun? Masaktan kawu nu kawu maglaban ga baka magtindas sa matarum.’

¹⁵ Pinmaingana aku magkun, ‘Si unu kawu, Panginuun?’ Sinmagut ti Panginuun magkun, ‘Aku si Hisus, ti kanmu pag-unuunuhun.

¹⁶ Dapat pagtindug yi kawu. Napakakit aku sa kanmu dahil kawu kang pinili hampay kang yi suruguun. Kailangan tultulan nimu ti manga iba tungkul sa kanmu nakakit sa kangku taynguna hanggan tungkul sa kang ipakakit waya sa kanmu aban.

¹⁷ Bawiun niku kawu ginan sa kamang manga taga Israil hanggan ginan sa kamang manga balaw Hudiyu. Dahil suguun niku kawu atag sa manga balaw Hudiyu.

¹⁸ Kailangan pamuklatun nimu kanda manga mata, kailangan bawiun nimu sida ginan sa kadudulman atag sa marayaw, ginan sa kapangyarihan ni Satanas tabug ngap sa Diyus, hampay nu sida sumarig sa kangku, patawadun kanda manga kasalanan hampay mipaminsan sida sa manga tawu napasakup sa Diyus.’

Itinultul ni Pablu kay manga Binwat

¹⁹ “Nakan duy Hari Agripa, lubus aku naniwala sa kay ipinakakit Panginuun ginan sa langit.

²⁰ Nanudlu aku sa Damasku dapu bag-u sa Hirusalim bag-u sa bilug daga Hudiya hanggan sa manga balaw Hudiyu. Namaliwanag aku sa manga tawu kailangan sida mag-ampu sa kanda manga kasalanan ag magpakarani sa Diyus. Bag-u ginan sa kanda mayad pag manga buwat kailangan makitan kanda nag-ampu yi sa kanda manga kasalanan.

²¹ Dahil ngani sa kang itinudlu katida, nakan aku dinakup manga Hudiyu kang sa Balay Diyus, kanda mana gayak aku matyun yi.

²² Dapat ay hanggan taynguna tugka unman gid aku pinabay-anan Diyus. Nakan matindugan aku taynguna hampay itultul una sa may manga kangaranan una sa unman may kangaranan kang nadnugan ginan sa Panginuun. Kang pag-itudlu imaw yi ti ipinurupita manga Purupita hanggan ni Muysis.

²³ Sinabi kabay nida magkun, kailangan mamatay ti Pinili Diyus Manugribri pag Hari bag-u un-an gid sa tanan tawu siya ti buhiun maan hampay ipakilala niya sa manga Hudiyu hanggan sa manga balaw Hudiyu nu kabitay sida maribri agud sida sa marayaw yi.”

²⁴ Magbagaw waya si Pablu magsagut waya sa dimanda manga Hudiyu, nagbagaw ngap si Pistu daraka buka magkun, “Paung duy kawu, Pablu. Napaung baga kawu, dahil subra yi kanmu inadalan.”

²⁵ Dapat sinabi ni Pablu magkun, “Aku duy, kagalang-galang Pistu, bukun ay paung. Ti kang pagsabihun lunsay katutuuhanan balaw may salan.

²⁶ Unman aku kailangan magkadala maghampang sa kanmu duy, Hari Agripa, dahil magkaalaman yi waydi nimu inda tanan-tanan. Pihu gid nabaritaan nimu daan inda pag manga itinultul niku taynguna, dahil inda nangyari balaw sa lihim, unman diman sa arayu pag rugar.

²⁷ Alam gid niku duy, Hari Agripa, kawu maniwala diman gid sa isinurat manga Purupita.”

²⁸ Sinabi ni Agripa sa kan Pablu magkun, “Sab lagat-lagat aku banta kanmu yi gid buwatun Kiristiyanu.”

²⁹ Sinmagut si Pablu magkun, “Kawu hanggan ti tanan nakadnug sa kang binagaw taynguna kang gid pag-idarangin sa Diyus hampay una dugay una ngalay kamu pagga kangku waydi, purya lang inda pag manga tarikada.”

³⁰ Bag-u tinmindug ti hari, ti gubirnadur, si Birnisi hanggan tanan kay manga kaibahan.

³¹ Pagka sida linmuwas yi sa balay hurusayan, nagharampangan sida magkun, “Unman may binwat kasalanan tunda pag tawu una sa ikamatay niya una paman sa ikapirisu.”

³² Sinabi ni Agripa sa kan Pistu magkun, “Nu abi unman lang gustu tunda pag tawu ipahusay kay kasu sa Pangulu Hari, mahimu yi mana siya palpasan kainda.”