Binwat 25 - Hanunuu

Pag-ipahusay ni Pablu kay Kasu sa Pangulu Hari

¹ Rinmas-ug si Pistu sa pamunuan niya pag purubinsiya. Pagka nakalawuy tulu ka sirang, nag-atag siya sa Hirusalim ginan sa Sisariya.

² Pagka ati siya sa Hirusalim ti manga pangulu manughandug sa Balay Diyus hanggan ti manga Pinunu manga Hudiyu nagdimanda laban sa kan Pablu. Pinakihampangan nida si Pistu,

³ hampay nu mahimu sa kanya, ipadara niya si Pablu atag sa Hirusalim. Nakan kanda mana kailangan si Pablu atag sa Hirusalim, dahil kanda paggayakun puutan siya sa dalan.

⁴ Sinmagut si Pistu magkun, “Ati di sa Sisariya pag napirisu si Pablu. Umati aku maan udyi dugay.

⁵ Nakan pagkuyug yi lang sa kangku kanyu manga Pinunu hampay idimanda nida tunda pag tawu nu siya may binwat kasalanan.”

⁶ Nadugay waya si Pistu sa Hirusalim manga walu ka yabi hanggan tugka sa sampulu bag-u binmalik maan siya tag sa Sisariya. Pagka sa usa ka sirang tinmukaw siya sa balay hurusayan bag-u ipinab-ul niya si Pablu.

⁷ Pagka rinmas-ug ngani si Pablu, susun linibutan siya manga Hudiyu ginan sa Hirusalim. Mayamu pag manga sumbung mabuyat kanda binulwat laban sa kanya, dapat unman sida may puruyba kuntay tutuu kanda sumbung.

⁸ Bag-u sinmagut si Pablu sa kanda dimanda magkun, “Unman aku may binwat kasalanan laban sa Kasuguan manga Hudiyu, una laban sa Balay Diyus, una laban sa Pangulu Hari.”

⁹ Magkaibug si Pistu siya ti bayaun manga Hudiyu, nakan nagpaingana siya sa kan Pablu magkun, “Gustu aw nimu atag sa Hirusalim hampay husayun niku kamu ati?”

¹⁰ Sinmagut si Pablu magkun, “Atay aku sa atubangan husgadu Pangulu Hari. Kailangan sitay pag husayun kang kasu. Unman gid aku may binwat kasalanan sa manga Hudiyu, alam yi waydi nimu tunda.

¹¹ Nu abi aku naglabag sa batas aw ngatay nu abi aku may binwat kadautan para kang ikamatay, unman diman kang iwasan tunda. Dapat nu unman waydi may pulus kanda manga dimanda laban sa kangku, unman diman kailangan aku ipabahala sa kanda. Kang gustu ipahusay niku kang kasu sa Pangulu Hari.”

¹² Naghampang dapu si Pistu sa kay manga kunsihal bag-u sinabi niya sa kan Pablu magkun, “Kanmu sinabi ipahusay nimu kanmu kasu sa Pangulu Hari. Nakan duy darahun ngani kawu atag sa Pangulu Hari.”

Nagpululungan Sida ni Pistu ni Hari Agripa ni Birnisi

¹³ Pagka dugay rinmas-ug sa Sisariya sida ni Hari Agripa ni Birnisi hampay mansabang sa kan Pistu dahil siya ti bag-u pag gubirnadur.

¹⁴ Sa kanda nanabang sa kan Pistu, itinultul niya sa hari tungkul sa kan Pablu kakurian. Magkun si Pistu, “Pagka si Pilik nighit sitay ginan, may tinayakan siya usa ka tawu atay sa pirisuhan.

¹⁵ Pagka aku sa Hirusalim, ti manga pangulu manughandug sa Balay Diyus hanggan ti manga paggurangunun manga Hudiyu nagpakarani sa kangku kanda idinimanda tunda pag tawu, kanda mana gustu kang sintinsiyahan yi.

¹⁶ Sinabi niku sa kanda magkun, angay sa batas manga taga Ruma nu may isinumbung, kailangan umatubang dapu tunda pag tawu sa manga nagdimanda laban sa kanya hampay pakan-an siya rugar makasagut sa kanda dimanda. Bag-u di nu malinaw kay kasalanan mahimu siya sintinsiyahan.

¹⁷ Nakan ngani, pagka nagluwang ti manga magdimanda sitay tabug, balaw yi aku nagpadugay-dugay. Pagka sa usa ka sirang tinmukaw aku sa balay hurusayan bag-u kang ipinab-ul tunda pag tawu.

¹⁸ Pagka tinmindug kay manga kalaban, kang hantup barang mabuyat kay kasalanan nakan kanda pag-idimanda siya, dapat unman waydi.

¹⁹ Nagtalaluhan lang sida tungkul sa kanda surundanun ag tungkul sa usa ka tawu kay ngaran si Hisus. Namatay yi siya dapat kan Pablu pagkumnun buhi di siya.

²⁰ Unman duy niku alam nu kabitay kang lutasun inda pag kasu. Nakan nagpaingana aku sa kan Pablu nu siya magkaibug atag sa Hirusalim hampay husayun niku sida ati.

²¹ Dapat ay sinabi ni Pablu kay gustu ipahusay kay kasu sa Pangulu Hari. Nakan pinabantayan niku siya sa pirisuhan hanggan sa ud maipadara niku siya atag sa Pangulu Hari.”

²² Sinabi ni Agripa sa kan Pistu magkun, “Magkaibug diman aku mamatingi sa manga pagsabihun tunda pag tawu.” Magkun si Pistu, “Mahimu duy patingihan nimu siya aldaw.”

Nag-atubang si Pablu sa Kanda ni Hari Agripa

²³ Sa usa ka sirang, linmuwang sida ni Agripa ni Birnisi, kaibahan nida ti manga kumandir hanggan ti manga pinunu banwa. Pagka sinmaka sida sa balay hurusayan, ginalang gid sida manga tawu. Bag-u sinugu ni Pistu kay sundalu hampay bul-un si Pablu.

²⁴ Pagka siyun yi si Pablu, sinabi ni Pistu magkun, “Malu duy, Hari Agripa ag kamu tanan manga nagsitay tag sa kanmi, inda yi ngani pag tawu ti idinimanda tanan manga Hudiyu sa kangku, una sitay sa Sisariya una ati sa Hirusalim. Nagriringgitan sida danga yi kunu siya mabuhi.

²⁵ Dapat ay pagka inusisa niku kay kasu, unman aku may nakitan kasalanan sa kanya hampay siya sintinsiyahan sa kamatayan. Pagka sinabi niya kay gustu ipahusay niya kay kasu sa Pangulu Hari, inisip niku siya ipadara yi ngani tabug sa Pangulu Hari.

²⁶ Unman lang niku alam nu hintay kang ibugtang sa kang surat tabug sa Pangulu Hari tungkul sa inda pag tawu. Nakan ngani kang ipinaatubang siya sa kanyu, lalu sa kanmu duy, Hari Agripa, hampay nu masuyasid nita siya maalaman niku nu hintay kang isurat.

²⁷ Dahil bilang balaw mayad sa kangku nu kang ipadara ti usa ka pirisu tabug sa Pangulu Hari, nu unman may kasuratan tungkul sa manga dimanda laban sa kanya.”