Binwat 24 - Hanunuu

Idinimanda si Pablu sa Atubangan ni Gubirnadur Pilik

¹ Pagka nakalawuy lima ka sirang, rinmas-ug sa banwa Sisariya si Ananiyas imaw ti pangulu manughandug sa Balay Diyus, may kaibahan siya manga paggurangunun manga Hudiyu hanggan usa ka abugadu kay ngaran si Tirtulu. Pagka sida sa atubangan ni Gubirnadur Pilik, idinimanda nida si Pablu.

² Pagka bin-ul yi si Pablu, binmagaw si Tirtulu. Itinultul niya nu hintay kanda dimanda laban sa kan Pablu. Magkun si Tirtulu, “Kagalang-galang Gubirnadur Pilik, dahil lang sa kanmu mahusay pag pangatungkulan, dugay yi nakitan nimi ti mayad gid pag kahusayan, mayamu diman kanmu binag-u angay sa ikaayad inda pag nasyun.

³ Pagbayaun gid nimi tunda, nakan kami magpasalamat gid sa kanmu una kapira una naan.

⁴ Dapat ay hampay balaw kawu kang abalahun, patingihan dapu nimu kami.

⁵ Dahil naintindihan nimi inda pag tawu magpan-gulu. Pagguluhun niya ti manga Hudiyu una naan pag rumas-ug siya. Takinan siya manga tawu magsunud sa surundanun Nasarinu.

⁶ May gayak mana waya siya para maglapastangan sa Balay Diyus, nakan kanmi dinakup siya. Sintinsiyahan mana nimi siya angay sa kanmi Kasuguan,

⁷ dapat ay rinmas-ug si Kumandir Lisyas bag-u kay inagaw siya ginan sa kanmi.

⁸ Sinabi ni Lisyas sa kanmi kailangan idimanda nimi siya sa kanmu. Pagka mabista nimu siya, maalaman diman nimu ti tanan nimi isinumbung laban sa kanya.”

⁹ Nagkausa ti manga Hudiyu sa kan Tirtulu. Pinatutuuhanan nida ti tanan kay sinabi niya.

Kan Pablu Sagut sa Kanda Dimanda sa Kanya

¹⁰ Pagka pinaamanan gubirnadur si Pablu hampay siya maan ti bumagaw, sinabi niya magkun, “Alam niku duy kawu dugay yi pag timpu ti maghusay sa inda pag nasyun. Nakan magbaya diman aku magsagut sa kanmu atubangan sa kanda manga dimanda laban sa kangku.

¹¹ Udwaya sampulu may duwa ka sirang taynguna tugka aku rinmas-ug sa Hirusalim hampay mansamba ati. Tutuu inda una paingan-un nimu sa manga iba.

¹² Unman gid nakitan nida aku magdibati una sa kantapu sa Balay Diyus. Unman diman nakitan nida aku magpangulu sa manga tawu sa manga simbahan manga Hudiyu una sa banwa.

¹³ Unman diman sida may puruyba tungkul sa kanda manga dimanda laban sa kangku.

¹⁴ Unman duy pag-itanggi niku kang magsamba sa Diyus nimi manga ginurang angay ngani sa surundanun kanda pagkumnun salan. Dapat ay magpatutuu diman aku sa tanan nipalat sa Kasuguan ni Muysis hanggan sa tanan isinurat sa Ribru manga Purupita.

¹⁵ Parihu diman sa kanda mag-asa aku sa Diyus buhiun maan niya ti tanan tawu, ti manga matadlung hanggan ti manga unman matadlung.

¹⁶ Nakan pirmi aku mag-ugali sa mayad hampay malumpiyu kang tagipusuun hanggan kang naisipan sa atubangan Diyus una sa atubangan tawu.

¹⁷ “May manga pira ka timpu aku balaw sa Hirusalim, bag-u binmalik maan aku ati hampay magtibu manga pakaun kuwarta sa kang manga kaparihu Hudiyu ag hampay magpakaun diman sa Diyus.

¹⁸ Katpung kanda nakakit sa kangku sa Balay Diyus imaw ngap kang pagbuwatun. Nakatupad aku sa manga ibinilin sa Kasuguan hampay aku malumpiyu sa kay magbantay Diyus. Unman may mayamu tawu, unman diman may magulu.

¹⁹ Ti tawu lang siyun tunda ngani pag manga Hudiyu taga Asya. Mayad mana nu sida abi ti nakasitay hampay magdimanda sa atubangan husgadu nu may isumbung sida laban sa kangku.

²⁰ Dapat inda ngani ti nakasitay, pagsabi sida nu hintay pag kasalanan kanda nakitan sa kangku sa kanda magbista sa kangku sa atubangan nida Katipunan manga Pinunu.

²¹ Barang masabi nida aku nagsalan sa kang binagaw sa kanda atubangan magkun, ‘Taynguna aku idinimanda sa atubangan niyu dahil aku mag-asa buhiun maan Diyus ti manga namatay.’ ”

²² Kang-ud yi kay magkaalaman ni Pilik tungkul sa bag-u itinudlu ni Kiristu. Nakan inapasan dapu niya ti bistahan. Magkun siya sa kan Pablu, “Aban nu rumas-ug yi si Kumandir Lisyas, tapusun niku kanmu kasu.”

²³ Bag-u sinabihan niya kay kapitan magkun, “Guwardiyahi nimu si Pablu sa pirisuhan, dapat danga paghigpiti nimu. Danga pag-irangi kay manga manug-awat magsabang sa kanya.”

Si Pablu sa Atubangan Nida ni Pilik ni Durusila

²⁴ Pagka nakalawuy pira ka sirang, linmuwang si Pilik kaibahan niya kay asawa si Durusila, usa ka babayi Hudiyu. Ipinab-ul ni Pilik si Pablu bag-u kay pinatingihan niya kan Pablu paliwanag tungkul sa pagsarig sa kan Kiristu Hisus.

²⁵ Dapat ay pagka nagbagaw si Pablu tungkul sa mag-ugali sa mayad, tungkul sa magpigil sa sadili ag tungkul sa kaudasan kay magsintinsiya Diyus aban sa kalibutan, nadala si Pilik. Magkun siya sa kan Pablu, “Pag-atag dap maan kawu sa pirisuhan. Nu may rugar maan aku ipab-ul maan duy niku kawu.”

²⁶ Pirmi ngani pag-ipab-ul ni Pilik si Pablu bag-u kay paghampangun, dahil magsarig siya barang may ipakaun kuwarta si Pablu.

²⁷ Pagka nakalawuy duwa ka timpu, si Pilik inublusan maan ni Pursiyu Pistu. Kay gustu ni Pilik siya di ti bayaun manga Hudiyu, nakan pinabay-anan niya si Pablu sa pirisuhan.