Binwat 22 - Hanunuu

¹ Magkun si Pablu, “Kamu duy pag manga katubu niku hanggan manga gurangun, pagpatingi sa kang paliwanag hampay maalaman niyu aku unman may kasalanan.”

² Pagka nadnugan nida kay nagbagaw sa kanda sa bagaw Hibriyu, lalu sida udyi nag-ingay. Bag-u sinabi ni Pablu magkun,

³ “Aku duy Hudiyu taga Tarsu sa daga Silisya. Dapat atay sa banwa Hirusalim aku pag nagdaka. Sitay diman aku pag nag-adal, si Gamalyil kang maisturu. Tinudluan niya aku mayad-mayad sa pagtupad sa Kasuguan kanta minana ginan sa kanta manga ginurang. Ati katpung masipag gid aku sa kang katungkulan sa Diyus, parihu diman sa kanyu manga masipag gid taynguna.

⁴ Inunu-unu niku ti manga magsunud sa inda pag bag-u ugali buhi, kang waya pinanmatay. Ipinapirisu niku sida una lalaki una babayi.

⁵ Una ti pangulu manughandug Balay Diyus una ti tanan manga paggurangunun sa nasyun makapatutuu diman sa kang pagsabihun kainda. Pinakan-an waya nida aku manga surat hampay kang darahun atag sa kanta manga kaparihu Hudiyu sa Damasku. Linmakaw ngani aku atabug sa Damasku hampay dakpun niku tunda ngani pag manga tawu magsunud sa bag-u ugali, bag-u kang mana darahun sida may pusas kay kamang sitay tag sa Hirusalim agud parusahan.”

Itinultul ni Pablu kay Nagsarig sa Panginuun

⁶ Magkun si Pablu, “Kang sa dalan di waya aranirani yi sa Damasku, tag kumaraw-an sirang katpung, bigla may rinmayaw sa kangku ginan sa langit masilaw masyadu.

⁷ Nisubsub aku sa daga bag-u nakadnug aku may nagbagaw sa kangku magkun, ‘Saulu, Saulu, hayga pag-unuunuhun nimu aku?’

⁸ Pinmaingana aku magkun, ‘Si unu kawu duy, Panginuun?’ Sinmagut siya magkun, ‘Aku si Hisus taga Nasarit, ti kanmu pag-unuunuhun.’

⁹ Nakitan diman niku manga kaibahan ti rayaw dapat unman nadnugan nida kay bagaw sa kangku.

¹⁰ Bag-u aku pinmaingana sa kanya magkun, ‘Hintay duy Panginuun, ti dapat niku buwatun?’ Sinabi maan Panginuun sa kangku magkun, ‘Pagbangun yi kawu, pag-ati kawu sa Damasku bag-u may sumabi ati sa kanmu tungkul sa tanan niku ihinanda hampay buruwatun nimu.’

¹¹ Pagka aku binmangun, unman maghiling kang mata dahil sa masyadu gid masilaw pag rayaw. Nakan inabat aku niku manga kaibahan atag sa sulud banwa Damasku.

¹² “Ati sa Damasku may usa ka lalaki kay ngaran si Ananiyas. Masipag siya magsamba sa Diyus angay sa Kasuguan ni Muysis. Pagbayaun siya tanan manga Hudiyu mag-uli sa ati pag banwa.

¹³ Nag-ati siya sa kangku, tinmindug sa kang arani bag-u sinabi niya magkun, ‘Patar-ari Saulu, pagmaghiling maan duy kanmu manga mata.’ Susun yi ngani naghiling yi maan kang manga mata ag nakitan niku siya.

¹⁴ Bag-u kay sinabi ni Ananiyas sa kangku magkun, ‘Kawu duy ti pinili Diyus nita ginurang hampay maalaman nimu kay kagustuhan niya, hampay makitan nimu kay matadlung pag Suruguun niya ag hampay madnugan nimu kay magbagaw.

¹⁵ Dahil kawu yi ngani kay manugpadakit aban hampay itultul nimu sa tanan tawu ti kanmu nakitan ag nadnugan.

¹⁶ Taynguna duy, danga magkatalinduwa. Pagtindug yi. Pagsampit sa kay ngaran Panginuun ag pagpatulbaw hampay lumpiyuhun kawu sa kanmu manga kasalanan.’ ”

Sinugu Panginuun si Pablu atag sa manga Balaw Hudiyu

¹⁷ Sigi waya kay paliwanag ni Pablu sa manga tawu magkun, “Nuli maan aku tag sa Hirusalim. Sa kang magdarangin sa Balay Diyus, may ipinakakit ti Panginuun sa kangku.

¹⁸ Nakitan niku ti Panginuun bag-u sinabi niya sa kangku magkun, ‘Dag yi dugay kawu, pag-ighit yi kadali sitay ginan sa Hirusalim, dahil ti manga tawu sitay dayu maniwala sa kanmu pag-itultul tungkul sa kangku.’

¹⁹ Sinabi niku sa kanya magkun, ‘Panginuun, alam yi gid waydi nida nu kabitay nanalapudan aku sa simbahan manga Hudiyu hampay ipapirisu, saktan ti manga nagsarig sa kanmu.

²⁰ Sa katpung minatay kanmu manugpadakit si Istiban, siyun diman aku. Nagpasnu diman gid aku sa kanda nagmatay sa kanya. Binantayan waya niku ti manga balukas linukas manga tawu nagmatay sa kanya.’

²¹ Bag-u sinabi maan Panginuun sa kangku magkun, ‘Pag-ighit yi duy kawu dahil kang suguun kawu tag sa arayu pag manga daga, tabug sa manga balaw Hudiyu.’ ”

²² Siti tugka namatingi gid ti manga tawu sa kan Pablu pagsabihun. Dapat ay pagka sinabi niya siya sinugu Panginuun tabug sa manga balaw Hudiyu, nanriringgitan ti kayamuan tawu magkun, “Matya yi gid duy siya. Udyi kailangan siya mabuhi waya.”

²³ Sa kanda magriringgitan, magwasawas sida kanda manga rutay, magsarwag waya sida taypuk.

²⁴ Nakan sinabihan kumandir kay manga sundalu, daran-a yi nida si Pablu tag sa sulud barak, hampaka gid siya hampay maalaman nu hayga masyadu siya pagringgitan manga Hudiyu.

²⁵ Dapat pagka nagapus yi nida si Pablu ihinigut tag tungud, sinabi niya sa kapitan matindugan siyun magkun, “Angay aw lugud sa batas nu hampakun niyu ti usa ka tawu nu nasakupan siya Ruma ag udwaya paman nasintinsiyahan husgadu?”

²⁶ Pagka nadnugan kapitan tunda, nag-ati siya sa kumandir bag-u sinabi niya, “Hintay kanmu buwatun? Nasakupan maaw Ruma tunda pag tawu.”

²⁷ Nakan nagpakarani ti kumandir nagpaingana sa kan Pablu magkun, “Ungud aw kawu nasakupan Ruma?” Nagsagut si Pablu, “Imaw ngani.”

²⁸ Bag-u magkun ti kumandir, “Daka pag kuwarta kang iginastus hampay aku nasakupan yi Ruma.” Sinabi ni Pablu sa kanya, “Aku bay daan di nasakupan Ruma, sapagka hanggan kang manga gurang nasakupan diman Ruma.”

²⁹ Susun nagpakarayu yi ti manga manugbistiga sa kanya. Nadala diman ti kumandir, dahil nipagapus niya si Pablu, madi nasakupan siya Ruma.

Si Pablu sa Atubangan Katipunan manga Pinunu

³⁰ Gustu gid maalaman kumandir nu hintay ti pag-idimanda manga Hudiyu laban sa kan Pablu. Nakan pagka sa usa ka sirang pinatipun niya ti manga pangulu manughandug hanggan ti tanan manga Pinunu bag-u linbadan niya si Pablu kay pusas, ipinadugsun siya bag-u ipinaatubang sa Katipunan manga Pinunu.