Binwat 21 - Hanunuu

Kay Mag-atag ni Pablu sa Hirusalim

¹ Pagka namaalam kami sa manga patar-ari sa Militu, nagsakay ngani kami, rargu nagdipay tabug sa Kus pag puru sa karaw-an dagat. Pagka sa usa ka sirang nakaaput kami sa Rudus pag puru. Siyun ginan dinmipay maan kami tag sa banwa Patara.

² Pagka kami sa Patara, may nakitan kami bangka atabug sa daga Pinisya, nakan sinmakay kami ginan sa Patara.

³ Pagka dugay nagpakarani kami sa Sipru pag puru sa karaw-an dagat, kanmi linawyan, nakitan nimi baliwa sa wala. Nagparargu kanmi lakaw hanggan tugka sa daga Sirya. Pagka rinmas-ug sa banwa Tiru, dinmugsun kami ginan sa bangka, dahil ipadugsun waya nida kanda pangarga ati sa Tiru.

⁴ Ati sa banwa Tiru hinanap nimi ti manga patar-ari. Pagka nakitan nimi sida, dinmayun kami sa kanda pitu ka yabi. Inudyukan sida Ispiritu Banal, bag-u kanda sinabi sa kan Pablu magkun, “Danga kawu mag-atag sa Hirusalim.”

⁵ Pagka lawuy pitu ka yabi, nighit maan kami siyun ginan naparargu di kanmi lakaw. Itinibu kami nida tanan, hanggan kanda manga asawa manga anak, tabug sa luwas banwa. Pagka sa baybay yi, linmuhud kami tanan nandarangin.

⁶ Pagka kami namaalam sa kanda, sinmakay maan kami sa bangka ag nuli maan sida tag sa kanda manga balay.

⁷ Ginminan ngani kami sa Tiru bag-u pagka dugay inmaput kami sa banwa Tulimaida. Nansabang kami sa manga patar-ari, nigya usa ka yabi.

⁸ Pagka sa usa ka sirang linmakaw maan kami ginan sa Tulimaida atabug sa banwa Sisariya. Ati sa Sisariya dinmayun kami sa balay ni Pilipi. Si Pilipi manugpadakit waydi sa Mayad pag Barita, kabilang siya sa pitu ka lalaki manga pinili kaybi sa Hirusalim.

⁹ Kan Pilipi manga anak upat ka daraga lunsay manga magpurupita.

¹⁰ Sa kanmi magdayun sa kanda ni Pilipi manga pira ka sirang, may rinmas-ug ginan sa Hudiya usa ka purupita kay ngaran si Agabu.

¹¹ Pagka nag-ati siya sa kanmi, bin-ul niya kan Pablu huragkus bag-u ginapus niya kay sadili lulud hanggan kamang bag-u kay sinabi magkun, “Inda kay pagsabihun Ispiritu Banal magkun, ‘Kainda waydi gapusun aban manga Hudiyu sa Hirusalim ti may apu inda pag huragkus bag-u kanda ipabahala siya sa manga balaw Hudiyu.’ ”

¹² Pagka nadnugan nimi tunda, kami hanggan ti manga patar-ari taga Sisariya nagpakihampang mayad-mayad sa kan Pablu danga gid mag-atag sa Hirusalim.

¹³ Dapat sinabi ni Pablu magkun, “Hayga katida kamu? Hayga kamu maglumi ag magparuku diman sa kang tagipusuun? Dahil una aku kanda gapusun una mamatay waya aku, handa gid aku dahil sa kang magpasakup sa Panginuun Hisus.”

¹⁴ Pagka unman siya napatalu, udyi lang kami nag-ingay. Sinabi lang nimi, “Pagmasunud gid ti kagustuhan Panginuun.”

¹⁵ Pagka nakalawuy pira ka sirang, naggayak yi kami bag-u linmakaw atag sa Hirusalim.

¹⁶ May kinmuyug sa kanmi manga patar-ari taga Sisariya. Dinara nida kami sa balay ni Manasun taga Sipru. Siyun kami pag dinmayun. Dugay yi pag timpu daan di si Manasun nagsarig sa kan Hisus.

Kay Nansabang ni Pablu sa kan Santiyagu

¹⁷ Pagka kami rinmas-ug sa Hirusalim, masulung gid ti manga patar-ari kanda nagtanggap sa kanmi.

¹⁸ Pagka sa usa ka sirang, nansabang kami ni Pablu sa kan Santiyagu. Siyun diman hanggan ti manga manug-asiwa iglisya.

¹⁹ Pagka sida kinamusta ni Pablu, tinaluktukud itinultul niya sa kanda ti tanan binwat Diyus sa manga balaw Hudiyu dahil sa kay magsirbi sa buruwatun Panginuun.

²⁰ Pagka nadnugan nida kan Pablu manga tultulanun, nagdayaw gid sida sa Diyus. Bag-u kanda sinabi sa kan Pablu magkun, “Alam diman nimu, patar-ari, balaw di pira ka libu ka Hudiyu nagsarig sa kan Hisus. Sida tanan mahigpit gid pag magtuun sa Kasuguan ni Muysis.

²¹ May nagbarita sa kanda kanmu kunu pag-itudlu sa manga Hudiyu ati sa manga banwa manga balaw Hudiyu, kailangan paglimtan yi nida ti Kasuguan ni Muysis. Pagsabihan kunu nimu sida danga yi turia kanda manga anak, danga yi sida mag-ugali angay sa ugali manga Hudiyu.

²² Hintay nguna ti kailangan nita buwatun? Dahil pihu gid naalaman yi nida kawu rinmas-ug sitay.

²³ Sunda duy nimu ti kanmi pagsabihun sa kanmu. May upat ka lalaki sitay sa kanmi nagtaratu sa atubangan Diyus.

²⁴ Pagpaminsan kawu sa kanda, tupada niyu ti manga ibinilin sa Kasuguan hampay malumpiyu kamu sa kay magbantay Diyus. Pagsakup kawu sa kanda manga gastus hampay makapauguy yi sida kanda buhuk. Nu katunda kanmu buwatun, maalaman tanan tawu unman maaw tutuu ti manga ibinarita manga iba tungkul sa kanmu. Bagkus ngap kanmu ugali angay diman waydi sa Kasuguan ni Muysis.

²⁵ Nu bay tungkul sa manga balaw Hudiyu manga nagsarig sa kan Hisus, pinasuratan yi nimi sida tungkul sa kanmi pag-isipun, kailangan sida danga kumaun manga karan-unun ihinandug sa diyus-diyusan, danga sida kumaun dugu, danga sida kumaun taguban hayup nu in-gut unman nakaluwang kay dugu, ag danga sida magpamabayi, magpanlalaki.”

²⁶ Nakan pagka sa usa ka sirang, tinaban ni Pablu tunda pag manga lalaki bag-u tinupad nida ti kailangan buwatun hampay malumpiyu sida sa kay magbantay Diyus. Pagka nitupad yi ni Pablu tunda bag-u sinmaka siya sa Balay Diyus hampay magpaalam nu kapira pag matapus ti taning pag udas sa paglumpiyu bag-u ihandug yi nida sa Diyus kanda manga hayup matyun sunugun tungkul sa kada usa sa kanda.

Dinakup si Pablu sa Balay Diyus

²⁷ Pagka arani yi matapus ti pitu ka sirang, may manga Hudiyu taga Asya nakakit sa kan Pablu ati sa Balay Diyus. Ginulu nida ti kayamuan tawu bag-u kanda dinakup si Pablu.

²⁸ Namagrit sida magkun, “Kamu duy pag manga Israilita, awati niyu kami. Inda yi ngani pag tawu tigtudlu sa tanan manga tawu una naan pag rugar laban sa nasyun Israil, laban sa Kasuguan ni Muysis ag laban diman sa inda pag Balay Diyus. Tuhay waya siti, nagtaban waya siya manga balaw Hudiyu atag sa sulud Balay Diyus. Nilapastangan niya inda ti banal pag rugar.”

²⁹ Nakan katida kanda sinabi, dahil nakitan nida si Pablu sa banwa kay kaibahan si Turupimu taga Ipisu. Kanda hantup dinara ni Pablu si Turupimu tag sa sulud Balay Diyus.

³⁰ Nagulu yi gid ti tawu banwa. Namalalagiwan minsan ti tanan tawu tag sa kan Pablu bag-u kanda dinusmugan, kanda kinarudkud atag sa luwas Balay Diyus, susun yi kanda tinalakpan ti manga sabian.

³¹ Kanda mana matyun yi si Pablu. Dapat may tawu nagpaalam sa kumandir manga sundalu magkun, “Magulu yi ti tawu banwa Hirusalim.”

³² Susun bin-ul kumandir kay manga kapitan hanggan manga sundalu, nalagiw sida tanan atag sa kayamuan tawu. Pagka nakitan manga tawu ti kumandir hanggan kay manga sundalu, inapasan nida kanda magpulpug sa kan Pablu.

³³ Nagpakarani ti kumandir bag-u kay dinakup si Pablu, kay ipinagapus duwa ka tarikada. Nagpaingana ti kumandir magkun, “Si unu inda pag tawu, hintay lugud kay binwat?”

³⁴ Dapat tuhay-tuhay ti irininggit manga tawu. Udyi magkaalaman kumandir nu hintay ti nangyari, dahil masyadu yi pag kaguluhan. Nakan sinabihan niya kay manga sundalu, daran-a yi nida si Pablu tag sa barak.

³⁵ Pagka sida rinmas-ug sa may agdan, kinabyaw ngap manga sundalu si Pablu, dahil masyadu maisug ti kayamuan tawu.

³⁶ Dahil nagdinasun ti kayamuan tawu nanriringgitan magkun, “Matya yi siya.”

Kan Pablu Sagut sa Kanda Dimanda

³⁷ Pagka pag-ipasaka yi manga sundalu si Pablu sa barak, sinabi niya sa kumandir magkun, “Mahimu aw duy aku magpakihampang sa kanmu?” Magkun ti kumandir, “Madunung aw kawu maggiriyigu?

³⁸ Unman aw kawu taga Ihiptu? Unman aw lugud kawu tunda pag takinan manga naglaban sa gubirnu udwaya dugay nanaban upat ka libu ka lalaki tag sa pangawakawaan lunsay armadu?”

³⁹ Nagsagut si Pablu magkun, “Bukun duy imaw. Aku Hudiyu, taga Tarsu sa daga Silisya. Ati gid kang ulian sa tunda pag mahalaga pag banwa. Pahintuluti duy nimu aku humampang sa inda pag kayamuan tawu.”

⁴⁰ Pinayagan ngani siya kumandir. Nakan tinmindug si Pablu sa katapusan pag halintang bag-u pinaamanan niya ti manga tawu hampay danga yi sida maingay. Pagka nap-ut kanda magriringgitan, nagbagaw ngani si Pablu sa kanda sa bagaw Hibriyu.