Binwat 20 - Hanunuu

Nag-ati maan si Pablu sa Masidunya hanggan sa Akaya

¹ Pagka nakalawuy ti kaguluhan, pinatipun ni Pablu ti manga patar-ari, pinarig-un niya kanda pagsarig sa kan Hisus. Bag-u siya namaalam sa kanda, nag-ati tabug sa Masidunya.

² Pagka ati siya lakaw sa daga Masidunya, nansabang siya sa manga patar-ari. Mayamu kay itinudlu sa kanda hampay parig-unun kanda pagsarig. Bag-u siya nag-ati sa Akaya pag daga.

³ Nadugay siya sa Akaya tulu ka bulan. Bag-u inisip mana niya sumakay dumipay atag sa daga Sirya. Dapat ay nabaritaan niya siya paggayakun manga Hudiyu. Nakan ati maan siya lakaw sa kay uryan sinmarak sa daga Masidunya.

⁴ Kinmuyug diman sa kan Pablu kan Piru anak si Supatir taga Biriya, sida ni Aristarku ni Sigundu taga Tisalunika, si Gayu taga Dirbi, si Timutiyu, hanggan sida ni Titiku ni Turupimu taga Asya.

⁵ Nag-una sida sa kanmi ni Pablu bag-u kanda inalagad kami sa banwa Turuwas.

⁶ Pagka lawuy ti Kapistahan tungkul sa Tinapay unman may Pamadaka, sinmakay kami ginan sa Pilipus. Pagka sa ikalima pag sirang rinmas-ug kami sa banwa Turuwas, napaminsan maan kami sa manga iba ati. Nadugay kami sa Turuwas pitu ka yabi.

Nanabang waya si Pablu sa manga Patar-ari sa Turuwas

⁷ Pagka sa malambung duminggu, nagtiripun kami hampay magpakiusa sa karan-an. Bag-u nanudlu si Pablu sa manga tawu, pinalawig niya kay paliwanag hanggan karaw-an yabi, dahil kay gayak nu aldaw yi lumakaw yi siya.

⁸ Mayamu pag manga sulu siyun sa kanmi tiripnan pag sulud-sulud ati sa tungud pag ugpu salug.

⁹ May tinmukaw sa gaha usa kan kan-akan kay ngaran si Utiku. Pagka dugay yi kan Pablu paliwanag, masyadu yi magkatungka si Utiku. Pagka tinalu yi siya puyat, nalagpak ngap siya ginan sa ikatlu pag ugpu tag sa daga. Pagka kanda binahit, tigbak yi siya.

¹⁰ Dinmugsun si Pablu tag sa sirung bag-u napadapa siya sa kan Utiku babaw, kay hinagkung. Bag-u magkun si Pablu, “Danga duy kamu magkataranta. Buhi di siya.”

¹¹ Sinmaka maan si Pablu, nagpakiusa siya sa manga patar-ari sa karan-an, sinmaru diman siya sa Banal pag Yapun. Bag-u naghampang waya siya sa kanda dugay hanggan sa magkasurip bag-u siya linmakaw.

¹² Inibahan nida ti kan-akan tag sa kay balay balaw yi may hintay, nakan lubus masulung maan kanda naisipan.

Ginan sa Turuwas Nag-ati si Pablu tag sa Militu

¹³ Inmuna kami sinmakay sa bangka atag sa banwa Asus hampay nu kami umaput yi sa Asus, ipasakay diman nimi si Pablu. Dahil inisip ni Pablu kay gustu lumakaw lang tugka sa Asus.

¹⁴ Sinulang niya kami sa Asus. Pagka nagsakay diman siya, minsan kami tanan nag-ati tag sa Mitilini.

¹⁵ Pagka ginmihit maan kami ginan sa Mitilini, nakaaput kami sa usa maan ka sirang sa Kiyu pag puru sa karaw-an dagat. Pagka sa ikadwa pag sirang nakaaput kami sa Samu pag puru sa karaw-an dagat. Bag-u sa ikatlu yi pag sirang rinmas-ug yi kami sa banwa Militu.

¹⁶ Dahil inisip ni Pablu udyi siya humapit sa banwa Ipisu hampay balaw yi mana siya dumugay sa Asya pag daga. Nagdali yi ngani siya hampay mana nu sa sirang Pintikustis pagsa Hirusalim yi siya.

Si Pablu Namaalam sa manga Manug-asiwa Iglisya sa Ipisu

¹⁷ Pagka siyun kami sa Militu, pinmasugu si Pablu tag sa Ipisu hampay kanda bul-un ti manga manug-asiwa iglisya ati.

¹⁸ Pagka sida rinmas-ug, sinabi ni Pablu sa kanda magkun, “Alam yi waydi niyu duy, nu kabitay kang ugali buhi kang di waya sa kanyu, ginan waya sa sirang kang kabag-u rinmas-ug sa purubinsiya Asya.

¹⁹ Lubus yi gid sa pakumbaba aku nagtupad sa buruwatun Panginuun, nanlumi aku sa kang tagipusuun, nag-agwanta sa aduk pagsubuk, dahil pirmi paggayakun aku matyun manga Hudiyu.

²⁰ Alam waydi niyu unman inirangan niku una hintay pag ikaayad niyu, bagkus ngap kang itinultul ag itinudlu sa kanyu una sa tiripun una sa kang magsabang sa kanyu manga balay sa kada usa.

²¹ Nangungud gid aku sa kang magpaliwanag sa manga Hudiyu una sa manga balaw Hudiyu, magkun kailangan gid sida pag-ampu sa kanda kasalanan sa atubangan Diyus, pagsarig sa kanta Panginuun Hisus.

²² “Taynguna, manga patar-ari, aku atag sa Hirusalim, magpasakup yi lang gid aku sa kay udyuk Ispiritu, madi ud alam niku nu hintay ti mangyari sa kangku ati sa Hirusalim.

²³ Inda lang kang magkaalaman, sa kada banwa may ipinasandam gid ti Ispiritu Banal sa kangku kang patabgan ati sa pirisuhan hanggan mahigpit pag kakurian.

²⁴ Dapat unman pagpahalgaan niku kang buhi, nu matupad lang niku kang katungkulan ag nu matapus lang ti buruwatun kay ipinakaun Panginuun Hisus sa kangku, kang pagtudlu ngani Mayad pag Barita tungkul sa kay mayad nabubut-un Diyus.”

²⁵ Magkun si Pablu, “Namatalapudan aku sa kanyu tanan ag nanudlu aku tungkul sa kay paghari Diyus. Dapat alam niku taynguna ginan udyi makitan niyu kang uyahun.

²⁶ Nakan ngani taynguna pag sirang kang gid pagsabihun sa kanyu, unman aku may saragtun tungkul una sa kantapu sa kanyu, nu abi midamhak sa kaparusahan.

²⁷ Dahil tinabu gid itinudlu niku ti tanan-tanan ihinanda Diyus sa kanyu, unman gid may inirangan aku sa kanyu una di.

²⁸ Ingatan duy niyu kanyu sadili hanggan ti iglisya dahil sida iinintirga Ispiritu Banal sa kanyu. Pangalagaan niyu ti iglisya Diyus kay sinakup niya pagka ibinuhus ti dugu niya Anak sa kay kamatayan.

²⁹ Alam niku duy, nu sa kang uryan may rumas-ug sa kanyu karaw-an manga tawu kanda ugali ga manga simarun idu, ag unman may pangaawa sa kanda. Dautun gid nida ti iglisya.

³⁰ Una ginan diman sa kanyu sadili iglisya may manga tawu aban manudlu kapudilan sa manga patar-ari hampay kanda pasunudun tag yi sa patalang.

³¹ Nakan ngani, manga patar-ari, pag-ingat kamu, danga niyu malimtan kang nagtudlu sa kanyu sirang yabi sa sulud tulu ka timpu, tiniis niku ti mayamu pag kakurian.

³² “Taynguna duy pag-iintirga niku kamu sa Panginuun hampay ingatan niya kamu. Hanggan ti Bagaw tungkul sa kay mayad nabubut-un Diyus umingat waydi sa kanyu. Kay Bagaw Diyus ti makaparig-un sa kanyu. Imaw gid ti pumapalad sa kanyu kay kaayadan kay ihinanda Diyus sa manga tawu magpasakup sa kanya.

³³ Unman aku may hinirak una kantapu pag gintu, pilak, una rutay.

³⁴ Alam diman waydi niyu unman inirangan niku kang budlay hampay maghanap sa pangailangan niku hanggan sa pangailangan niku manga kaibahan.

³⁵ Sa tanan niku binwat pinakakitan niku kamu usa ka mustara. Pagkatida diman kamu pagbudlay hampay awatan niyu ti manga malumuy. Danga malimtan ti binagaw Panginuun Hisus magkun, ‘Lalu masulung ti magpakaun, balaw lang ga pinakan-an.’ ”

³⁶ Pagka nakatapus kan Pablu manga sinabi linmuhud siya, nandarangin siya hanggan sida tanan.

³⁷ Nanlumi gid sida tanan kanda hinagkung kinaawaan si Pablu.

³⁸ Lalu gid ungud sida rinmuku dahil sa kay sinabi magkun, udyi makitan nida siya aban. Bag-u kanda itinibu siya tag sa bangka.