Binwat 19 - Hanunuu

Nanudlu si Pablu sa Ipisu

¹ Sa katpung si Apulus sa Kurintu waya, rinmas-ug maan si Pablu sa Ipisu, lakaw sa babaw pag dalan. Pagka siyun sa Ipisu, nikabta siya sa manga magsarig sa kan Hisus.

² Bag-u kay pinaingana magkun, “Pagka kamu nagsarig sa kan Hisus, napasakup yi aw kamu sa Ispiritu Banal?” Nagsagut sida magkun, “Unman duy. Unman nimi naalaman kuntay may Ispiritu Banal.”

³ Namaingana maan si Pablu magkun, “Nu katunda hintay pag tulbaw kanyu pinatulbawan?” Magkun maan sida, “Sa tulbaw duy ni Huwan.”

⁴ Bag-u kay sinabi ni Pablu magkun, “Kan Huwan itinudlu pag tulbaw kay kahulugan tanda sa manga nag-ampu sa kanda manga kasalanan. Sinabi ni Huwan sa manga Israilita, kailangan sida sumarig sa rumas-ug dumasun sa kanya, kay ibug sabihun sa kan Hisus yi ngani.”

⁵ Pagka tunda ngani pag manga patar-ari sa Ipisu nakadnug sa kan Pablu paliwanag, napatulbaw yi ngani sida napasakup sa kay ngaran Panginuun Hisus.

⁶ Ikinupa ni Pablu kay kamang sa kanda bag-u sida lubus sinuldan Ispiritu Banal. Nagbagaw sida sa unman magkasalman pag pamagaw ag nagpurupita sida.

⁷ Manga sampulu may duwa sida ka tawu.

⁸ Sa sulud tulu ka bulan pirmi nag-ati si Pablu sa simbahan manga Hudiyu, unman siya magkadala nanudlu gid sa kanda, magpangatadlungan sa kanda hampay tumanggap mana sida sa katutuuhanan tungkul sa kay paghari Diyus.

⁹ Dapat ti iba sa kanda maganit gid kanda tagipusuun, nagbugya sida maniwala. Sa atubangan kayamuan tawu nagbagaw waya sida daut tungkul sa ugali buhi kay itinudlu Panginuun. Nakan tinayakan yi lang sida ni Pablu. Tinaban niya ti manga nagsarig sa kan Hisus bag-u ati sa balay gadayan ni Tiranu nagpaliwanag siya sa manga tawu sirang-sirang.

¹⁰ Balaw gid nag-apas si Pablu sa kay magpanudlu sa sulud duwa ka timpu. Nakan ti tanan tawu nangulian sa daga Asya nakadnug gid sa bagaw Panginuun, una manga Hudiyu, una manga balaw Hudiyu.

Tungkul sa kan Isiba manga Anak Lalaki

¹¹ Pinakan-an Diyus si Pablu kamaskihan hampay makabuwat siya balaw basta pag manga makadululaw.

¹² Una kan Pablu panyu, una kay pamaunib pag rutay kanda dinara tabug sa may manga sakit. Bag-u nadura ti manga dahilan ag naglinuwas diman ti manga labang ginan sa tawu.

¹³ May manga Hudiyu magpalibut-libut magpalwas diman manga labang. Pinanghasan nida sampitun kay ngaran Panginuun Hisus sa manga inapuan labang. Sinabi nida sa manga labang magkun, “Dahil sa kan Pablu pag-itudlu pag makapangyarihan pag ngaran ni Hisus, kang pagsabihan kamu, pagluwas yi kamu ginan sa tawu.”

¹⁴ May usa ka Hudiyu kay ngaran si Isiba. Pangulu manughandug sa Balay Diyus siya. May pitu ka anak lalaki si Isiba. Sida magpalwas diman manga labang.

¹⁵ Dapat sinagut sida labang magkun, “Alam niku si Hisus, nakadnug yi waydi aku tungkul sa kan Pablu, dapat si unu lugud kamu?”

¹⁶ Bag-u dinuksulan sida tawu inapuan labang, nangaragpu talu sida. Nalkas kanda manga rutay, nangabiyagan sida nalagiw ati ginan pag balay.

¹⁷ Nabaritaan inda tanan manga tawu sa banwa Ipisu, una manga Hudiyu una manga balaw Hudiyu. Nadala gid ungud sida tanan, lalu nagdayaw gid sida sa makapangyarihan pag ngaran Panginuun Hisus.

¹⁸ Mayamu manga patar-ari nagtapat sa atubangan kadamlan tawu magkun, sida nagbuwat diman waydi katunda.

¹⁹ Tinipun manga panhirian, manga may ingkantu, manga may dunungin kanda manga ribru tungkul sa kanda manga dunung bag-u kanda sinunug sa atubangan kayamuan manga tawu. Kanda binilang kay halaga ati pag manga ribru aput maaw sa limampulu ka libu ka pisus.

²⁰ Nakan ngani, dahil sa kay makamaskihan buwat Panginuun, lalu waya gid mayamu tawu ti nakadnug sa barita tungkul sa kan Hisus.

Ti Kaguluhan sa Ipisu

²¹ Pagka nakalawuy tunda pag manga nangyari, inudyukan si Pablu Ispiritu Banal, kailangan siya lumakaw sa daga Masidunya, hanggan sa daga Akaya bag-u umati siya sa Hirusalim. Nagsabi siya magkun, “Nu aku makaati ginan sa Hirusalim, kailangan umati diman aku sa banwa Ruma.”

²² Ipinauna yi niya tag sa Masidunya sida ni Timutiyu ni Irastu, duwa ka kaibahan niya sa buruwatun. Si Pablu napatayak waya dapu sa Asya.

²³ Ati katpung balaw basta pag nagkalaguluhan ti manga tawu sa banwa Ipisu tungkul sa ugali buhi kay itinudlu Panginuun.

²⁴ May usa ka manugpanday pilak ati, kay ngaran si Dimitriyu. Magpanday siya manga diit pag mustara balay simbahan ni diyus-diyusan Artimis. Si Dimitriyu hanggan kay manga kaawat may pagtanggapun daka pag kuwarta sa tunda pag tarabahu.

²⁵ Tinipun ni Dimitriyu kay manga kaawat hanggan ti iba waya manga manugpanday pilak siyun. Sinabi niya sa kanda magkun, “Alam diman niyu duy, ginan sa inda pag tarabahu nita pag binmalay-balay yi kanta kahamtangan.

²⁶ Taynguna tandai niyu ti kanyu nakitan ag nadnugan. Dahil tunda ngani pag tawu si Pablu magtudlu sa manga tawu magkun, ‘Ti manga diyus-diyusan binwat tawu kamang balaw ungud manga diyus, unman may kapangyarihan.’ Masyadu mayamu yi tawu ginarya yi ni Pablu, naniwala sida sa kay pagsabihun, una sitay sa banwa Ipisu una sa harus tanan rugar sa buu daga Asya.

²⁷ Nu katunda barang aban udyi pagbayaun manga tawu kanta buruwatun. Barang udyi paman pagpahalagaan aban manga tawu una kay balay simbahan ni Diyus-diyusan Artimis ag barang una hanggan si Diyus-diyusan Artimis udyi galangun aban manga tawu, madi imaw ti pagsambahun tanan taga Asya hanggan tanan tawu sa buu kalibutan.”

²⁸ Pagka nadnugan kayamuan tawu kay manga binagaw ni Dimitriyu, bigla sida nangisug nanriringgitan, magkun, “Mamaski si Artimis manga taga Ipisu.”

²⁹ Nakan pagka dugay pasay yi kaguluhan ti banwa. Dinakup manga tawu sida ni Gayu ni Aristarku, kan Pablu manga kaibahan taga Masidunya. Bag-u mirinsanan nandaray-u ti kayamuan tawu atag sa lig-ung tiripnan paranuudan.

³⁰ Magkaibug mana si Pablu umati waydi hampay umatubang sa kayamuan tawu, dapat inampara siya manga patar-ari.

³¹ Ti iba manga pinunu Asya manga mayad pag kakilala ni Pablu. Sida may sinugu atag sa kan Pablu pinaanyuan gid nida siya, danga gid umatag sa lig-ung tiripnan paranuudan.

³² Masyadu yi lang gid magulu kanda nagtiripun ati. Tuhay tuhay ti pag-iringgit manga tawu magsaragbangan, dahil unman diman alam ti kayamuan tawu nu hayga sida nagtiripun.

³³ Pagka si Alihanduru ipinaatubang mana manga Hudiyu sa kayamuan tawu, naghantup ti iba barang may pagsabihun si Alihanduru, nakan sida nagtiripun. Pinaamanan niya ti manga tawu danga yi maingay hampay makapaliwanag siya mana sa kanda siya hanggan kay manga kaparihu Hudiyu unman may kasalanan.

³⁴ Dapat ay pagka nakitan kayamuan tawu siya Hudiyu, lalu gid sida nanaragbangan namaragritan sa sulud duwa gid ka udas magkun, “Mamaski si Artimis pag diyus-diyusan manga taga Ipisu.”

³⁵ Pagka dugay ipinap-ut miyur banwa ti ingay kayamuan bag-u sinabi niya magkun, “Kamu duy pag manga taga Ipisu, pagpatingi sa kangku. Magkaalaman gid tanan-tanan tawu ti banwa Ipisu ti namahala sa balay simbahan ni Artimis pag makamaskihan pag diyus-diyusan hanggan sa kanda pagsambahun pag batu nalagpak ginan sa langit.

³⁶ Unman may tawu makapahimudil tunda. Nakan kailangan danga yi kamu magulu. Danga waydi kamu daluk-daluk.

³⁷ Dahil inda pag manga tawu kanyu dinara sitay tag, unman sida may tinakaw ginan sa balay sambahan, unman diman sida mag-away sa kanta diyus-diyusan sa kan Artimis.

³⁸ Nu sida ni Dimitriyu hanggan kay manga kaawat manugpanday may idimanda laban una sa kantapu pag tawu, bukas diman ti balay hurusayan, may manga pinunu diman. Kailangan pagdimanda ngani nu may idimanda hampay magharampangan sida.

³⁹ Dapat nu may pagsabihun waya kamu, mahimu kanta paghampangan tunda angay sa batas nita.

⁴⁰ Madala pag kahulugan. Nu kita idimanda sa inda pag kaguluhan taynguna pag sirang, kita ud may isagut dahil ud may pulus inda pag kaguluhan.”

⁴¹ Pagkatapus kan Miyur sinabi tunda, pinauli niya ti manga tawu tag sa kanda manga balay.