Binwat 18 - Hanunuu

Nag-ati si Pablu sa Kurintu

¹ Pagka nakapaliwanag yi si Pablu sa manga kunsihal sa Ariyupagu, nighit siya ginan sa Atinas, nag-ati sa banwa Kurintu.

² Pagka siyun sa Kurintu nisampak siya sa usa ka Hudiyu kay ngaran si Akila, taga Puntu. Bag-u lang nakaras-ug siya ginan sa Italya kaibahan kay asawa si Pirisila, dahil pinaighit ni Pangulu Hari Kalaudyu ti tanan manga Hudiyu ginan sa Ruma. Nansabang si Pablu sa kanda ni Akila,

³ bag-u nagdayun ngap siya sa kanda dahil parihu sida manugbuwat turda una si Pablu una sida ni Akila.

⁴ Sa kada Sirang Pamahari magpangatadlungan siya sa manga tawu sa simbahan manga Hudiyu, magpan-garya sa manga Hudiyu una sa manga balaw Hudiyu hampay makapasakup sa kan Hisus.

⁵ Pagka rinmas-ug sida ni Silas ni Timutiyu ginan sa Masidunya, purus yi si Pablu sirang-sirang sa kay magtudlu Mayad pag Barita. Pag-itultul niya sa manga Hudiyu si Hisus imaw yi ti Pinili Diyus Manugribri pag Hari.

⁶ Pagka dugay naglaban yi sida sa kanya naglibak hanggan. Nakan winagwag ni Pablu ti galbuk sa kay rutay kay tanda laban sa kanda magkun, “Kanyu yi sadili kasalanan nu kamu midamhak sa kaparusahan. Unman yi aku may saragtun. Taynguna ginan aku atag yi sa manga balaw Hudiyu.”

⁷ Tinayakan ngani niya ti manga Hudiyu, nag-ati siya sa balay usa ka balaw Hudiyu niabay sa surundanun Hudiyu, magsamba sa Diyus, kay ngaran si Tisyu Hustu. Ati pag nagdayun si Pablu. Kay balay ni Tisyu mataidan sa simbahan manga Hudiyu.

⁸ Si Kirispu ti pangulu sa simbahan manga Hudiyu. Siya hanggan kay manga kasunu balay nagsarig sa Panginuun. Mayamu manga tawu taga Kurintu namatingi diman sa kan Pablu. Pagka nagsarig sida sa kan Hisus, napatulbaw sida.

⁹ Pagka dugay napakakit ti Panginuun sa kan Pablu sa yabi. Magkun ti Panginuun, “Danga duy kawu magkadala. Sigi lang kawu sa kanmu magtudlu, danga gid mag-apas,

¹⁰ dahil aku sa kanmu di. Unman may umunu-unu sa kanmu, dahil mayamu kang manga sakup sa inda pag banwa.”

¹¹ Nakan nadugay si Pablu sa Kurintu sa sulud usa ka timpu may unum ka bulan, nanudlu siya Bagaw Diyus sa manga tawu.

¹² Pagka si Galyun pinatukaan sa pagkagubirnadur sa Akaya, nagkausa ti manga Hudiyu, dinakup nida si Pablu bag-u kanda ipinaatubang sa husgadu.

¹³ Sinabi nida sa kan Galyun magkun, “Inda pag tawu maggarya sa manga tawu hampay sida sumamba sa Diyus balaw angay sa batas.”

¹⁴ Bumagaw yi mana si Pablu. Dapat sinabi ngap ni Galyun sa manga Hudiyu magkun, “Nu abi kanyu dimanda inda tungkul sa daut pag buwat aw ngatay tungkul sa mabuyat pag kasalanan laban sa batas, kailangan gid aku mamatingi mayad sa kanyu.

¹⁵ Dapat kanyu dimanda maaw tungkul lang sa manga bagaw, manga ngaran hanggan tungkul sa manga Kasuguan sa kanyu sa manga Hudiyu. Nakan aku dayu maghusay sa kanyu sa katunda pag harampangan. Pagbahala yi kamu.”

¹⁶ Bag-u kay tinulak sida ginan sa balay hurusayan.

¹⁷ Pagka sa luwas yi, kanda dinuksulan si Sustinis ti pangulu simbahan manga Hudiyu nida, bag-u kanda pinulpug sa sugkadan balay hurusayan. Dapat udyi nagbati si Galyun.

Nuli maan si Pablu tag sa Antiyukya

¹⁸ Nadugay waya si Pablu sa manga patar-ari sa Kurintu. Bag-u siya namaalam sa kanda. Pagka siya rinmas-ug sa Sinkiriya napauguy yi kay buhuk, dahil nakatupad yi sa kay taratu. Bag-u sinmakay siya nagdipay atag sa Sirya pag daga, kay kaibahan sida ni Pirisila ni Akila pag mag-asawa.

¹⁹ Pagka sida rinmas-ug sa banwa Ipisu, tinayakan ni Pablu sida ni Pirisila ni Akila siyun. Bag-u sinmaka siya sa simbahan manga Hudiyu, nangatadlungan siya sa manga tawu siyun.

²⁰ Kanda mana tinawidan si Pablu hampay dumugay waya sa kanda dapat unman siya nagpasnu.

²¹ Dapat ay pagka siya magkaginan yi, sinabi niya sa kanda, “Nu kay gustu Diyus, bumalik maan aku sitay tag sa kanyu.” Bag-u siya nighit ginan sa Ipisu, nagsakay siya sa bangka

²² Pagka inmaput siya sa Sisariya, nagdugsun siya sa bangka bag-u linmakaw siya tabug sa Hirusalim. Pagka nanabang nagkamusta sa manga patar-ari sa Hirusalim, linmakaw maan siya tag sa Antiyukya.

²³ Pagka siya nadugay-dugay diit ati sa Antiyukya, nighit yi maan siya. Namalibutan siya sa manga kabanwa-banwahan sa daga Galasya hanggan sa daga Pirigya, kay pinarig-un ti manga patar-ari sa kanda pagsarig.

Nagtudlu si Apulus sa Ipisu hanggan sa Kurintu

²⁴ May rinmas-ug sa Ipisu usa ka Hudiyu taga Alihandirya, kay ngaran si Apulus. Mahusay siya pag magtultulanun, mayamu diman kay magkaalaman sa Banal Kasuratan.

²⁵ Natudluan siya mayad-mayad tungkul sa ugali buhi kay itinudlu Panginuun. Masipag gid siya manudlu. Tama diman gid kay pag-itudlu tungkul sa kan Hisus. Dapat ay ti magkaalaman lang niya pag tulbaw imaw ti kan Huwan itinudlu.

²⁶ Una sa simbahan manga Hudiyu unman magkadala si Apulus magpaliwanag sa manga tawu. Pagka nadnugan nida ni Pirisila ni Akila kay paliwanag ni Apulus, tinaban nida siya tag sa kanda balay bag-u lalu waya malinaw pag ipinaliwanag nida sa kanya ti tungkul sa dalan Diyus.

²⁷ Pagka kay gustu ni Apulus dumipay atag sa Akaya, inawatan siya manga patar-ari sa Ipisu. Pinmadara sida surat tabug sa manga patar-ari sa Akaya hampay kanda gid tanggapun si Apulus. Pagka rinmas-ug si Apulus sa Akaya, mayad gid pinarig-un niya ti manga nagsarig sa kan Hisus dahil sa kay mayad nabubut-un Diyus.

²⁸ Dahil udyi may sagut ti manga Hudiyu sa kay nangatadlungan ni Apulus sa kanda sa atubangan mayamu tawu. Ginan sa Banal Kasuratan itinultul niya si Hisus imaw ti Pinili Diyus Manugribri pag Hari.