Binwat 17 - Hanunuu

May Kaguluhan sa Tisalunika

¹ Pagka nakasarak sida ni Pablu sa banwa Ampipulis ag sa banwa Apulunya, rinmas-ug sida sa banwa Tisalunika. May simbahan ti manga Hudiyu sa Tisalunika.

² Angay sa kan Pablu ugali, sinmaka siya sa simbahan manga Hudiyu. Tulu ka Sirang Pamahari nangatadlungan siya sa kanda ginan sa Banal Kasuratan.

³ Ipinaliwanag niya ti pagsabihun sa Banal Kasuratan. Itinultul niya kailangan mag-agwanta ti Pinili Diyus Manugribri pag Hari bag-u buhiun maan ginan sa kamatayan. Magkun siya, “Inda pag Hisus kang pag-itudlu sa kanyu imaw yi ngani ti Pinili Diyus Manugribri pag Hari.”

⁴ Ti iba manga manugpatingi nagarya, napaminsan sa kanda ni Pablu ni Silas. Kumun diman ti mayamu manga Giriyigu manga niabay sa surundanun manga Hudiyu hanggan ti manga babayi may katungkulan, balaw di pira, napaminsan waydi sa kanda.

⁵ Dapat ti manga Hudiyu magkadaut nakan kanda tinipun ti manga tawu unman masyadu may kabuluhan bag-u kanda ginulu ti banwa. Bag-u dinugma nida kan Hasun balay sa kanda magpakahanap gid sa kanda ni Pablu ni Silas hampay nu makitan yi, ipaatubang nida sa tawu banwa.

⁶ Pagka unman nakitan nida sida ni Pablu ni Silas, kinarudkud nida si Hasun ag may iba waya pag manga patar-ari atag sa atubangan manga pinunu banwa bag-u kanda irininggit magkun, “Kanta banwa sinulud manga tawu magpan-gulu una lang naan pag rumas-ug sida.

⁷ Kan Hasun pinasaka sida sa kay balay. Sida tanan maglabag sa manga batas Pangulu Hari, dahil pagsabihun nida may hari waya tuhay, kay ngaran si Hisus.”

⁸ Pagka nadnugan tawu banwa hanggan manga pinunu inda pag manga barita, nagulu yi lang gid sida tanan-tanan.

⁹ Pagka si Hasun hanggan kay manga kaibahan binul-an nida kuwarta, kanda maan pinalpasan.

Sida ni Pablu Nag-ati sa Banwa Biriya

¹⁰ Ati katpung pag yabi pinaighit manga patar-ari sida ni Pablu ni Silas ginan sa Tisalunika atag sa banwa Biriya. Pagka sida rinmas-ug sa Biriya, sinmaka sida sa simbahan manga Hudiyu.

¹¹ Lalu waya mayad kahampang ti manga Hudiyu sa Biriya balaw lang ga sa Tisalunika. Lubus paggustuhan nida magpatingi sa kan Pablu tudlu. Sirang-sirang pag-usisahun gid nida ti Banal Kasuratan hampay maalaman nida nu ngatay tutuu kan Pablu pagsabihun nu ngatay unman.

¹² Mayamu tawu ati nagsarig sa kan Hisus. May manga mayaman pag babayi Giriyigu diman hanggan manga lalaki Giriyigu.

¹³ Dapat ay pagka nabaritaan manga Hudiyu sa Tisalunika kuntay itinudlu diman ni Pablu sa Biriya ti Bagaw Diyus, nag-ati sida inudyukan nida ti manga tawu banwa hampay magbuwat kaguluhan.

¹⁴ Nakan susun pinaighit manga patar-ari si Pablu atag sa baybay dagat. Dapat sida ni Silas ni Timutiyu siyun di sa Biriya.

¹⁵ Ti manga nagtibu sa kan Pablu kinmuyug sa kanya hanggan tugka sa banwa Atinas. Bag-u nuli maan sida tag sa Biriya may padakit bilin ginan sa kan Pablu atag sa kanda ni Silas ni Timutiyu, pag-usig kunu sida sa kanya dag yi dugay.

Si Pablu sa Banwa Atinas

¹⁶ Sa kay mag-alagad waya ni Pablu sa kanda ni Silas ni Timutiyu sa Atinas, naaburidu gid kay tagipusuun dahil nakitan niya pasay yi may diyus-diyusan sa banwa.

¹⁷ Nakan pagka siya sa sulud simbahan manga Hudiyu, nangatadlungan siya sa kanda hanggan sa manga balaw Hudiyu manga niabay sa surundanun manga Hudiyu. Kumun diman kay buwat sirang-sirang sa manga tawu maglakaw-lakaw sa basad palingkihan.

¹⁸ May manga manugtudlu sa Ipikuryu hanggan sa Istuyku pag kalasi adal, nangatadlungan sida sa kan Pablu. Sinabi manga iba, “Hintay nguna kay ibug sabihun tunda pag magpadunungun pag tawu?” Magkun maan ti manga iba, “Magtudlu banta siya tungkul sa manga diyus sa iba pag manga nasyun.” Nakan katida kanda pagsabihun, dahil pag-itudlu ni Pablu tungkul sa kan Hisus hanggan tungkul sa pagkabuhi uman.

¹⁹ Nakan tinaban nida si Pablu kanda dinara atag sa pulung manga kunsihal sa Ariyupagu bag-u kanda sinabi magkun, “Mahimu aw nguna maalaman nimi nu hintay pag bag-u adal inda ti kanmu pag-itudlu?

²⁰ Udwaya aradnuganun nimi ti kanmu pagsabihun, nakan gustu mana nimi maalaman kay kahulugan.”

²¹ Dahil ti tanan manga tawu taga Atinas hanggan ti manga magpanday-uhan, sirang-sirang kanda buwat magtulultulan lang magparatingihan tungkul sa una hintay kanda paglingutan.

²² Nakan tinmindug si Pablu sa atubangan manga kunsihal sa Ariyupagu bag-u nagbagaw siya sa manga tawu taga Atinas tinipun siyun magkun, “Nakitan niku kamu maaw duy parasamba gid sa mayamu niyu pag manga diyus.

²³ Sa kang maglakaw sa banwa, binantayan niku kanyu manga simbahan. Bag-u may nakitan aku usa ka bugtangan handug may surat magkun, ‘Sa unman magkakilala pag diyus.’ Tunda yi pag Diyus ti kanyu pagsambahan madi unman kilala niyu siya, imaw yi ngani pag Diyus kang pag-itudlu sa kanyu.

²⁴ Diyus ti naglalang sa daga hanggan sa tanan-tanan bagay sa babaw daga. Siya yi tig hari sa langit una sa daga, nakan unman siya nangulian sa manga balay simbahan binwat tawu kamang.

²⁵ Una siya pagsirbihan tawu, ti Diyus unman magkaibug kanda manga handug, dahil siya ngani tigpakaun kinabuhi, arup hanggan karabuhian sa tanan tawu.

²⁶ Kay linalang Diyus ti usa ka tawu hampay siya ti kinalahian tanan nasyun tawu nangulian sa babaw daga. Pagka udwaya linalang Diyus ti tawu, daan inisip Diyus ti kada tawu kay kaudasan niya buhi hanggan kay ulian pag daga.

²⁷ Kay linalang Diyus ti manga tawu hampay hanapun nida siya, barang sa kanda maggarapgap mahiyaptan ngap nida siya. Nu sa ungud siya balaw arayu sa kanta sa kada usa,

²⁸ dahil siya ti gimpuunan nita arup, nita buhi, hanggan nita kabisugan. Parihu sa sinabi niyu iba magpinangawat ambahan magkun, ‘Kita tanan kay manga anak niya.’

²⁹ “Kita ngani manga anak Diyus. Nakan danga nita isipun ti Diyus parihu sa gintu, una pilak, una batu binwat diyus-diyusan, lunsay pinathaw lang isip tawu bag-u binwat niya kamang.

³⁰ Dugay pag kapanahunan balaw pag-alintanahun Diyus kay unman magkilala tawu sa Diyus. Dapat taynguna ibinilin Diyus sa tanan tawu sa una naan pag rugar patlikudi yi iampu kanda daut ugali.

³¹ May itinaning yi siya kaudasan hampay pihuun ti daut ti mayad. Tunda pag buruwatun kay iinintirga sa kay pinili pag tawu. Kay pinatutuuhanan inda pagka kay binuhi maan tunda pag tawu.”

³² Pagka nadnugan nida kan Pablu tudlu tungkul sa pagkabuhi maan manga namatay, nag-ayupaka ti iba. Dapat sinabi manga iba magkun, “Magkaibug waya kami mamatingi aban sa kanmu tudlu tungkul sa kanmu sinabi taynguna.”

³³ Nakan linmakaw yi si Pablu ginan sa kanda karaw-an.

³⁴ May manga napaminsan sa kan Pablu, manga nagsarig sa Diyus. Nadara yi sa bilang si Diyunisyu, usa ka kunsihal sa Ariyupagu. May usa waydi ka babayi kay ngaran si Damaris ag may manga iba waya.