Binwat 16 - Hanunuu

Si Timutiyu Kinmuyug sa Kanda ni Pablu ni Silas

¹ Nag-ati diman si Pablu sa banwa Dirbi hanggan sa banwa Listara. May usa ka tawu ati magsarig diman sa kan Hisus, kay ngaran si Timutiyu. Kay ina ni Timutiyu Hudiyu, napasakup diman sa kan Hisus. Kay ama Giriyigu.

² Ti manga patar-ari sa Listara ag sa Ikunyu sa kanda magkilala sa kan Timutiyu siya mayad pag tawu.

³ Kay gustu ni Pablu pagkuyug waydi sa kanya si Timutiyu. Nakan tinuri niya si Timutiyu, dahil alam tanan manga Hudiyu sa ati pag manga banwa kay ama ni Timutiyu Giriyigu.

⁴ Sa kanda maglakaw ni Pablu sa manga banwa ipinadakit nida sa manga patar-ari ti manga paanyu ginan sa manga apustul hanggan ginan sa manga manug-asiwa iglisya sa Hirusalim. Bag-u sinabihan waya nida ti manga patar-ari kailangan kanda tupadun tunda pag manga paanyu.

⁵ Nakan magrig-un gid ti manga iglisya. Sirang-sirang magyamu waya gid ti manga magsarig sa kan Hisus.

May Ipinakakit ti Panginuun sa kan Pablu sa Turuwas

⁶ Sinarak nida ni Pablu ti daga Pirigya hanggan ti daga Galasya, dahil unman pinahintulutan sida Ispiritu Banal manudlu sa daga Asya.

⁷ Pagka rinmas-ug sida sa katpadan daga Misya, kanda mana gayak lumakaw sa daga Bitinya, dapat unman sida pinasibut-an Ispiritu ni Hisus.

⁸ Pagka nakalawuy yi sida sa daga Misya, naglus-ug sida atag sa banwa Turuwas sa baybay dagat.

⁹ Ati katpung pag yabi may ipinakakit ti Panginuun sa kan Pablu. May usa ka lalaki taga Masidunya matindugan ag magdangup sa kan Pablu magkun, “Pagluwang duy kawu atag sa Masidunya, awati nimu kami.”

¹⁰ Pagka naalaman ni Pablu ti ipinakakit Panginuun sa kanya, susun naghiwat yi kami hampay magdipay atag sa Masidunya, dahil nasalman nimi kami yi ngani kay pagsuguun Diyus hampay itudlu nimi ti Mayad pag Barita sa Masidunya.

Sinmarig sa kan Hisus si Lidya

¹¹ Nanakayan kami ginan sa Turuwas rargu tag sa Samutrasi. Pagka sa usa maan ka sirang rinmas-ug kami sa banwa Niyapulis.

¹² Ginan sa Niyapulis kami linmakaw tabug sa banwa Pilipus, sakup diman sa bahagi daga Masidunya. Ti banwa Pilipus ulian manga taga Ruma. Siyun kami manga pira ka sirang.

¹³ Pagka sa Sirang Pamahari nagluwas kami sa banwa, nag-ati kami sa pangpang sapa, kanmi isip barang ati may rugar dararanginan manga Hudiyu. Tinmukaw kami naghampang sa manga babayi nagtiripun ati.

¹⁴ May usa ka babayi namatingi diman sa kanmi kay ngaran si Lidya taga Tiyatira. Magtinda siya manga pisahan ga dukut dungun ubi. Magsamba siya sa Diyus. Pinalug-ud Panginuun kay tagipusuun hampay maniwala siya sa kay itinudlu ni Pablu.

¹⁵ Napatulbaw siya hanggan kay manga kasunu balay. Pagka itinulbaw siya tinaban niya kami magkun, “Nu sa kanyu magkilala sa kangku aku tutuu nagsarig sa Panginuun, kidayun duy kamu sa kang balay.” Linugus kami tinaban niya nakan kami balaw yi binmugya.

Sa Pagkapirisu Nida ni Pablu ni Silas

¹⁶ Pagka kami mag-atag maan sa rugar dararanginan, nasulang kami usa ka babayi suruguun inapuan labang manughula. Daka pag kuwarta ti pagtanggapun niya manga amu dahil sa kay maghula.

¹⁷ Magpakadasun tunda pag babayi suruguun sa kanmi ni Pablu magpakatawag magkun, “Inda pag manga tawu ti suruguun Diyus Makamaskihan sa tanan. Magtudlu sida sa kanyu nu kabitay kamu pag makakit karibrihan.”

¹⁸ Imaw-imaw diman kay buwat tunda pag babayi suruguun sirang-sirang. Pagka dugay nauyamut si Pablu, nakan napasrangu siya tag sa babayi suruguun bag-u sinabi niya sa labang magkun, “Sa kamaskihan ngaran ni Hisu-Kiristu, kang pagsuguun kawu pagluwas yi kawu ginan sa inda pag babayi.” Susun yi ngani nagluwas ti labang ginan sa babayi suruguun.

¹⁹ Pagka naalaman niya manga amu udyi masarigan mapakinabangan tunda pag babayi suruguun, dinuksulan nida sida ni Pablu ni Silas, kanda kinarudkud atag sa palasa kanda ipinaatubang sa manga pinunu.

²⁰ Idinimanda nida sida ni Pablu sa atubangan manga husgadu taga Ruma magkun, “Inda pag manga tawu Hudiyu. Magpan-gulu sida sa kanta banwa.

²¹ Ti manga ugali kanda pag-itudlu unman mahimu kanta patingihan una sundun, dahil kita manga taga Ruma.”

²² Hanggan ti kayamuan tawu hinmampak yi waydi sa kanda ni Pablu ni Silas. Pinanggisi lang manga pinunu sa kanda maglukas kay rutay nida ni Pablu bag-u rargu ipinahampak nida sida.

²³ Pagka sida ni Pablu ni Silas nasaktan yi gid sa bakul, pinirisu yi sida, pinaguwardiyahan mayad.

²⁴ Pagka nadnugan bantay pirisuhan tunda pag bilin, isinulud niya sida sa sulud-sulud gid pirisuhan, pinangaw niya kanda manga lulud.

²⁵ Pagka karaw-an yi yabi magdarangin sida ni Pablu ni Silas, magkanta magdayaw sa Diyus. Magdungug diman ti iba manga pirisu.

²⁶ Bag-u bigla gid linminug mabisug gid, natandug hanggan kay nabungsudan pirisuhan. Kadaka nabukasan ti tanan manga sabian, natangkas ti manga tarikada tanan manga pirisu.

²⁷ Nimata ti bantay pirisuhan. Pagka nakitan niya bukas yi maaw ti manga sabian pirisuhan, ginabut niya kay baladaw, magpakimatay yi.

²⁸ Dapat ay si Pablu nagbagaw gid daka magkun, “Danga duy nimu pagsakti kanmu sadili bilug. Kami inda di tanan-tanan.”

²⁹ Ipinab-ul bantay ti manga sulu, bag-u nalagiw siya tag sa sulud pirisuhan, napadapa siya pagtakigan sa dala sa atubangan nida ni Pablu ni Silas.

³⁰ Ipinaluwas niya sida sa pirisuhan, bag-u kay sinabi sa kanda magkun, “Hintay nguna duy kang kailangan buwatun hampay aku maribri?”

³¹ Nagsagut sida magkun, “Pagsarig duy kawu sa Panginuun Hisus bag-u maribri kawu hanggan kanmu manga kasunu balay.”

³² Itinudlu nida ni Pablu ni Silas ti bagaw Panginuun sa bantay pirisuhan hanggan sa kay manga kasunu balay.

³³ Ati katpung diman pag yabi tinaban niya sida, inugasan niya kanda manga biyag. Bag-u rargu siya hanggan kay manga kasunu balay napatulbaw.

³⁴ Pagka nitulbaw yi, tinaban niya sida ni Pablu tag sa kay balay, bag-u kay hinayinan karan-unun. Lubus gid nakabaya ti bantay pirisuhan hanggan kay manga kasunu balay, dahil sida tinudluan ngani hampay sumarig sa Diyus.

³⁵ Pagka surip sinugu manga pinunu kanda manga pulis tabug sa bantay pirisuhan pinadaran-an bilin magkun, “Palpasi yi nimu tunda pag manga tawu.”

³⁶ Ipinadakit maan bantay pirisuhan inda pag manga bagaw sa kanda ni Pablu magkun, “Nagbilin ti manga pinunu kamu kunu kailangan palpasan yi. Nakan duy mahimu kamu mighit yi, udyi kamu may pagkadalaan.”

³⁷ Dapat ay, sinabi ni Pablu sa manga pulis magkun, “Unman may nakitan sida buwat daut sa kanmi, dapat kanda ipinahampak kami sa atubangan kayamuan tawu bag-u kanda waya ipinapirisu kami. Manga nasakupan paman kami Ruma. Bag-u aw lugud kami ipalpas sa lihim? Dayu gid mahimu. Kailangan sida ti pagsitay hampay sida ti kipalpas sa kanmi.”

³⁸ Ipinadakit manga pulis inda pag manga bagaw ni Pablu sa manga pinunu. Nadala ti manga pinunu pagka naalaman nida nasakupan maaw Ruma sida ni Pablu ni Silas.

³⁹ Nakan nag-ati ngani sida naghagad patawad sa kanda ni Pablu, bag-u kanda pinalpasan ginan sa pirisuhan. Nagpakihampang waya ti manga pinunu sa kanda ni Pablu hampay sida mana umighit yi ginan sa Pilipus.

⁴⁰ Pagka sida ni Pablu nagluwas yi ginan sa pirisuhan, inmati maan gid sida sa balay ni Lidya. Kanda naras-ugan ati ti manga patar-ari. Kanda binilinan sida magkun, “Pagpakarig-un kanyu pagsarig sa Panginuun.” Bag-u nighit sida ni Pablu ni Silas.