Binwat 15 - Hanunuu

Magpululungan ti manga Apustul hanggan manga Manug-asiwa

¹ May manga tawu nagluwang sa Antiyukya ginan sa Hudiya. Kanda tudlu sa manga patar-ari magkun, “Dayu mahimu kamu maribri nu unman kamu turiun dapu angay sa Kasuguan ni Muysis.”

² Sida ni Pablu ni Birnabi balaw napatalu sa mahigpit pag kalatadlunganan sa kanda. Nakan pagka dugay pinagkausahan nida kailangan umati sa Hirusalim sida ni Pablu ni Birnabi may kumuyug manga patar-ari taga Antiyukya hampay manhampang sa manga apustul hanggan sa manga manug-asiwa iglisya tungkul sa inda pag kakurian.

³ Nakan sinugu ngani sida iglisya. Sa kanda maglakaw sa daga Pinisya hanggan sa Samarya itinultul nida nu kabitay ti manga balaw Hudiyu nagsarig yi waydi sa Diyus. Pagka nadnugan manga patar-ari inda pag manga barita, nakabaya gid ungud sida tanan.

⁴ Pagka rinmas-ug sa Hirusalim sida ni Pablu ni Birnabi hanggan kanda manga kaibahan, tinanggap sida iglisya hanggan manga apustul hanggan manga manug-asiwa iglisya bag-u itinultul nida ni Pablu sa kanda nu kabitay sida ginamit Diyus sa tanan niya buruwatun.

⁵ Dapat may manga patar-ari diman sa kan Kiristu siyun manga napasakup sa surundanun manga Parisiyu. Tinmindug sida bag-u sinabi nida magkun, “Ti manga balaw Hudiyu nu nagsarig sa kan Hisus kailangan magpaturi. Kailangan diman sida tudluan hampay kanda tupadun ti Kasuguan ni Muysis.”

⁶ Nagharampangan ti manga apustul hanggan ti manga manug-asiwa iglisya hampay kanda pag-adalan inda pag kakurian.

⁷ Pagka dugay yi kanda mag-aragawan ayad, tinmindug si Pidru bag-u kay sinabi magkun, “Manga patar-ari, alam niyu kaybi sa kanta tanan aku ti napili Diyus manugpadakit Mayad pag Barita sa manga balaw Hudiyu hampay makadnug waydi sida ag makasarig diman sa kan Hisus.

⁸ Diyus lang ti makausisa sa tagipusuun tawu. Ipinakaun niya ti Ispiritu Banal sa kanda parihu diman sa kanta, imaw yi kay puruyba Diyus kuntay kay tinanggap sida.

⁹ Parihu lang kay magbantay Diyus una sa kanda una sa kanta. Pagka sida nagsarig sa kan Hisu-Kiristu, linumpiyu diman Diyus kanda tagipusuun sa kanda nagbuwat kasalanan.

¹⁰ Hayga kanyu pagsubukan ti Diyus? Hayga kanyu pagpakan-an ti manga patar-ari kakurian ga baba mabuyat, unman diman nakaya nita una nita manga ginurang.

¹¹ Danga duy katida. Kita nagsarig sa kan Hisus bag-u kita irinibri dahil sa kay pangaawa Panginuun Hisus. Katunda diman ti manga balaw Hudiyu nu magsarig sida sa kan Hisus.”

¹² Udyi nag-ingay sida tanan. Bag-u namatingi sida sa kanda ni Birnabi ni Pablu nanultul nu kabitay sida pinakan-an kamaskihan Diyus hampay makabuwat manga makadululaw pag tanda sa karaw-an manga balaw Hudiyu.

¹³ Pagka natapus kanda ni Birnabi ni Pablu tultulanun, si Santiyagu maan ti nagbagaw magkun, “Manga patar-ari, pagpatingi kamu sa kangku.

¹⁴ Kis-ab itinultul ni Simun kay pangaawa Diyus sa manga balaw Hudiyu, nakan sa kabag-u kay pinili sida hampay sida hanggan kay yi waydi nasyun.

¹⁵ Inda angay diman sa kay manga sinabi manga purupita. Inda ti isinurat magkun,

¹⁶ ‘Kay sabi Panginuun magkun, Aban aku bumalik, bag-u ibungsud maan niku kan Dabid balay dahil nagpu yi. Una nawasak yi, ipatindug maan niku kay balay,

¹⁷ hampay ti tanan manga iba nasyun humanap waydi sa Panginuun, ti manga balaw Hudiyu kang pinili hampay pumasakup sa kangku.

¹⁸ Inda kay sinabi ngani Panginuun imaw ti nagpasandam inda kaybi waya ginan.’”

¹⁹ Magkun si Santiyagu, “Nakan ngani nu para sa kangku pag isip, danga pakurianan nita ti manga balaw Hudiyu sa kanda magpakarani sa Diyus.

²⁰ Dapat ay suratan nita sida sa danga sida kumaun karan-unun ihinandug sa diyus-diyusan, danga sida magpamabayi magpanlalaki, danga sida kumaun taguban hayup nu in-gut unman nakaluwang kay dugu ag danga waydi sida kumaun dugu.

²¹ Dahil dugay yi pag timpu pagbasahun ti Kasuguan ni Muysis sa manga simbahan manga Hudiyu kada Sirang Pamahari ag sa kada banwa pag-itudlu diman kay manga binagaw.”

Kanda Surat tabug sa manga Patar-ari Balaw Hudiyu

²² Nakan ngani pinagkausahan manga apustul, manga manug-asiwa iglisya hanggan buu iglisya hampay pumili sida ginan sa kanda gurupu manga masugu nida tabug sa Antiyukya, kaibahan nida ni Pablu ni Birnabi. Bag-u pinili ngani nida si Hudas, kay usa ka ngaran si Barsabas, hanggan si Silas, parihu sida takinan manga patar-ari sa Panginuun.

²³ Ipinadara nida kanda surat sa kanda ni Silas tabug sa Antiyukya. Kaindaay kanda surat: “Kami duy, ti manga apustul hanggan ti manga manug-asiwa iglisya magkamusta sa kanyu sa manga patar-ari balaw Hudiyu sa banwa Antiyukya, sa daga Sirya hanggan sa daga Silisya.

²⁴ Nabaritaan nimi may manga tawu sitay ginan sa kanmi gurupu nag-asan sa kanyu, madi sida unman nimi sinugu. Nagpaaburidu kunu sida sa kanyu ag kanda manga adal nan-gulu sa kanyu.

²⁵ Nakan pinagkausahan nimi pumili kami manga masugu tabug sa kanyu, ipakuyug sa kanda ni Birnabi ni Pablu, kanta pagmayadun pag manga patar-ari,

²⁶ dahil ilinubus nida kanda sadili bilug hanggan naisipan sa buruwatun nita Panginuun Hisu-Kiristu.

²⁷ Nakan ngani sinugu nimi tag sa kanyu sida ni Hudas ni Silas, hampay itultul nida sa kanyu ti kanmi isinurat sa inda pag surat.

²⁸ Dahil angay sa udyuk Ispiritu Banal pinagkausahan nimi sa danga yi kamu pakurianan sa mabuyat pag manga bilin, nu ud inda lang ti dapat niyu tupadun,

²⁹ danga kamu kumaun una hintay pag karan-unun ihinandug sa manga diyus-diyusan, danga kamu kumaun dugu, una taguban hayup in-gut unman nakaluwang kay dugu ag danga kamu magpanlalaki magpamabayi. Inda pag manga bagay kailangan niyu iwasan hampay kamu mas lalu waya rumig-un. Imaw lang tugka kanmi surat.”

³⁰ Bag-u linmakaw yi sida ni Hudas ni Silas. Pagka sida rinmas-ug sa Antiyukya, tinipun nida ti manga patar-ari bag-u ipinakaun nida ti surat sa kanda.

³¹ Pagka binasa nida ti surat, nakabaya gid ti manga tawu dahil pinarig-un maan sida sa kanda pagsarig.

³² Sida ni Hudas ni Silas manga purupita diman waydi, nakan nadugay waya sida ati nanudlu sa manga patar-ari hampay pagpabisugun kanda naisipan ag pagparig-unun kanda pagsarig.

³³ Nagdugay waya sida ni Hudas ni Silas sa Antiyukya bag-u pagka magkauli yi, idinarangin sida manga patar-ari hampay sa kanda ti kahusayan Diyus bag-u pinauli ngani sida tag sa Hirusalim, tag sa manga nagsugu sa kanda.

³⁴ Si Silas bay napatayak ati sa Antiyukya.

³⁵ Siyun di gid sa Antiyukya sida ni Pablu ni Birnabi. Sida hanggan manga iba waya patar-ari nanudlu ag nagpaliwanag bagaw Panginuun.

Nagbululagan Sida ni Pablu ni Birnabi

³⁶ Pagka dugay sinabi ni Pablu sa kan Birnabi, magkun, “Pagbalik duy kita sa kanta uryan hampay sabangun nita ti manga patar-ari sa kada banwa kanta tinudluan bagaw Panginuun. Duawan nita nu kabitay kanda pagsarig sa kan Kiristu.”

³⁷ Kan Birnabi gustu tabanun maan nida si Huwan, kay usa ka ngaran si Markus.

³⁸ Dapat unman nagpasnu si Pablu, dahil napaminsan dapu si Markus sa kanda dapat ud napatapus sa buruwatun. Binmulag kabay si Markus sa kanda ati sa daga Pampilya.

³⁹ Nagtalaluhan gid sida ni Pablu ni Birnabi. Pagka unman gid sida nagparasnuan, nagbululagan yi sida. Tinaban ni Birnabi si Markus. Sida nagsakay nagdipay atag sa Sipru pag puru sa karaw-an dagat.

⁴⁰ Kan Pablu tinaban si Silas. Pagka sida magkalakaw yi, idinarangin sida manga patar-ari hampay papaladan sida Panginuun.

⁴¹ Bag-u linmakaw si Pablu kaibahan niya si Silas, namalibutan sida sa daga Sirya hanggan daga Silisya, pinarig-un niya ti manga iglisya.