Binwat 14 - Hanunuu

Sida ni Pablu ni Birnabi sa Ikunyu

¹ Katunda diman ti nangyari sa Ikunyu. Nag-ati sida ni Pablu ag ni Birnabi sa simbahan manga Hudiyu. Mahal gid kanda itinudlu sa manga tawu, nakan mayamu gid ti nagsarig sa kan Hisus una Hudiyu una balaw Hudiyu.

² Dapat may manga Hudiyu nagdayu sumarig sa kan Hisus. Pagka dugay inudyukan nida ti manga balaw Hudiyu hampay lumaban sa manga patar-ari.

³ Nadugay waya waydi siyun sa Ikunyu sida ni Pablu ni Birnabi, matutum kanda naisipan kanda nanudlu sa manga tawu tungkul sa Panginuun. Pinakan-an sida Panginuun kamaskihan hampay makabuwat makadululaw ag lilingutan pag manga tanda kay puruyba kuntay tutuu gid kanda manga tudlu tungkul sa kay papalad Diyus.

⁴ Nakan ngani ti manga tawu sa banwa napabliwa ti iba sa manga Hudiyu, ti iba sa manga apustul.

⁵ Bag-u pinagkausahan manga balaw Hudiyu hanggan manga Hudiyu kaibahan kanda manga pinunu hampay lumaban sa manga apustul. Kanda gayak bintukun matyun sida ni Pablu.

⁶ Dapat ay pagka naalaman manga apustul sida paggayakun yi, nagpalagiw sida ginan sa Ikunyu, nag-ati sa banwa Listara hanggan banwa Dirbi, sakup sa Likaunya pag daga. Nag-ati diman sida sa manga rugar sa palibut.

⁷ Itinudlu nida sa manga tawu ati ti Mayad pag Barita.

Sida ni Pablu ni Birnabi sa Listara

⁸ Ati sa Listara may usa ka tawu unman makakusug kay manga lulud. Ginan sa kay nianak lunu siya, unman nakalakaw kaybi ginan.

⁹ Matukawan siya namatingi sa kan Pablu paliwanag. Pagka naintindihan ni Pablu tunda pag tawu lunu may pagsarig hampay siya mapaayad, tinmurun si Pablu sa kanya bag-u kay sinabi magkun,

¹⁰ “Pagtindug yi duy kawu kalawis.” Tinmindug siya, rargu nag-utbaw bag-u naglakaw-lakaw.

¹¹ Pagka nakitan kayamuan tawu ti binwat ni Pablu, bigla nagbagaw sida sa daraka buka sa kanda pamagaw Likaunya magkun, “Nagsitay tag sa kanta ti manga diyus ginan sa langit ga histuda tawu.”

¹² Si Birnabi kanda iningarnan si Sius ag si Pablu kanda iningarnan si Hirmis, dahil siya ti manugpaliwanag.

¹³ Sa itangadan banwa may balay simbahan diyus-diyusan Hupitir. Pagka naalaman manughandug sa balay simbahan nu hintay ti nangyari, nagbuul siya manga tudu baka kay pinaunuan manga busang kayu kay dinara tabug sa puun sabian, kay mana iyawun ihandug nida tanan bilang kanda pinagkasamba sa manga apustul.

¹⁴ Pagka naalaman nida ni Pablu ni Birnabi ti gayak manga tawu, ginisi nida kanda sadili rutay bilang ga mustara sa kanda unman magpasnu sa pagbuwatun manga tawu. Nagdali sida atag sa kayamuan tawu bag-u sinabi nida sa daraka buka,

¹⁵ magkun, “Danga duy buwatun niyu tunda. Kami manga tawu lang waydi parihu ga kanyu. Pag-itudlu nimi sa kanyu ti Mayad pag Barita tungkul sa kan Hisus hampay ipatlikud nimi kamu sa tunda pag manga buwat unman may kabuluhan ag hampay tudluan nimi kamu magsamba sa Diyus buhi. Siya ti naglalang sa langit, daga, dagat hanggan sa tanan-tanan bagay.

¹⁶ Kaybi waya ginan pinasibut-an Diyus ti tanan nasyun tawu sa kanda lang sadili kagustuhan.

¹⁷ Madi katida kang-ud mana pag puruyba kay mayad niya buwat sa kanyu hampay makilala niyu siya. Kabay pinakan-an niya kamu uran ginan sa tungud hanggan abunda pag ani sa kay udas katpung. Pagpakan-an diman niya kamu kang-ud pag karan-unun hanggan kabayaan sa kanyu tagipusuun.”

¹⁸ Madi mahal kanda ni Pablu ni Birnabi paliwanag, diit wadi udyi naampara nida ti manga tawu mag-iyaw kanda hayup hampay ihandug sa kanda.

¹⁹ Dapat ay may rinmas-ug ati sa Listara manga Hudiyu ginan sa Antiyukya hanggan ginan sa Ikunyu. Inudyukan nida ti manga tawu laban sa kan Pablu bag-u kanda binatu siya. Pagka kanda hantup tigbak yi si Pablu, kanda kinarudkud tag sa luwas banwa.

²⁰ Dapat pagka nagtirindug sa kay palibut ti manga magsarig sa kan Hisus, tinmindug si Pablu bag-u nagbalik maan tag sa banwa. Pagka surip nag-ati sida ni Pablu ni Birnabi sa banwa Dirbi.

Nuli maan Sida ni Pablu ni Birnabi sa Antiyukya

²¹ Itinudlu nida ni Pablu ni Birnabi ti Mayad pag Barita sa banwa Dirbi. Mayamu tawu ati kanda binutung sa magsarig sa kan Hisus. Bag-u binmalik maan sida tag sa Listara, sa Ikunyu hanggan sa Antiyukya.

²² Pinarig-un nida ti manga patar-ari, pinaanyuan danga sida umurung sa kanda pagsarig sa Panginuun. Nanudlu waya sida sa manga patar-ari magkun, “Dayu maamanan nita ti mayamu pag kakurian bag-u kita makapasakup sa kay paghari Diyus aban.”

²³ Sa kada iglisya nagpili sida ni Pablu manga manug-asiwa para sa kanda. Bag-u nagpauray sida sa darangin, kanda iinintirga ti manga manug-asiwa sa Panginuun imaw kanda pagsarigan.

²⁴ Sinarak nida ni Pablu ti daga Pisidya bag-u rinmas-ug sida sa daga Pampilya.

²⁵ Pagka itinudlu nida ti Bagaw Diyus sa banwa Pirga, nag-atag sida sa lawud sa banwa Atalya sa baybay dagat.

²⁶ Siyun ginan nagsakay sida nagdipay nuli maan atag sa banwa Antiyukya. Siyun diman kabay sa Antiyukya pag iinintirga kaybi sida ni Pablu ni Birnabi sa Diyus hampay kay papaladan sa buruwatun. Angay sa kay papalad Diyus kanda yi ngani tinupad ti buruwatun.

²⁷ Pagka rinmas-ug sida sa Antiyukya, tinipun nida ti iglisya bag-u itinultul nida sa manga patar-ari nu kabitay sida ginamit Diyus sa tanan niya buruwatun ag nu kabitay ti Diyus nagbuwat paraan sa manga balaw Hudiyu hampay sida makasarig sa kan Hisus.

²⁸ Nadugay waya sida ni Pablu ni Birnabi sa manga patar-ari sa Antiyukya.