Binwat 13 - Hanunuu

Pinili Ispiritu Banal Sida ni Birnabi ni Saulu sa Buruwatun

¹ Sa iglisya sa Antiyukya may manga purupita hanggan manga manugtudlu Bagaw Diyus. Sida ngani ni Birnabi, ni Simyun kay palayaw si Nigir, si Lusyu taga Sirini, si Manain patar-ari sa tabid ni Gubirnadur Hirudis hanggan si Saulu.

² Sa kanda magpauray sa samba nida sa Panginuun, sinabi Ispiritu Banal sa kanda magkun, “Ipablag niyu sida ni Birnabi ni Saulu dahil sida kang pinili hampay tumupad sida sa kang buruwatun kang ihinanda para sa kanda.”

³ Pagka nagpauray waya gid sida sa darangin, kinup-an nida kamang sida ni Birnabi ni Saulu bag-u kanda sinugu tag sa buruwatun.

Nanudlu Sida ni Birnabi ni Saulu ati sa Sipru

⁴ Nakan ngani pagka sinugu sida ni Birnabi ni Saulu sa panab-anan Ispiritu Banal, nag-ati sida sa banwa Silusya, bag-u nagsakay sida nagdipay atag sa Sipru pag puru sa karaw-an dagat.

⁵ Pagka sida rinmas-ug sa banwa Salamina, itinudlu nida ti Bagaw Diyus sa manga tawu sa simbahan manga Hudiyu. Kaibahan nida kanda kaawat si Huwan Markus.

⁶ Ginan sa Salamina linibut nida ti puru Sipru tugka sa nakaras-ug sida sa banwa Papus. Pagka sida sa Papus, nakitan nida ti usa ka tawu may salumangka. Pag-akuun niya siya kunu purupita, kay ngaran tunda pag tawu si Bar-Hisus.

⁷ Kaibahan siya ni Gubirnadur Sirhiyu Paulu, matinudukun tunda pag gubirnadur. Ipinab-ul ni Gubirnadur sida ni Birnabi ni Saulu hampay mamatingi siya sa Bagaw Diyus.

⁸ Tunda pag manugsalumangka nu sa bagaw Giriyigu kay palayaw si Ilimas. Sinangsala ni Ilimas sida ni Birnabi hampay balaw sumarig sa kan Hisus ti gubirnadur.

⁹ Lubus sinuldan Ispiritu Banal si Saulu, kay usa ka ngaran si Pablu. Tinurun gid ni Pablu si Ilimas,

¹⁰ bag-u kay sinabi magkun, “Kawu parihu sa diyablu kanmu ugali. Maglaban kawu sa tanan kaayadan, pasay yi sa kadayaan hanggan sa kalukuhan. Hayga lugud pirmi gustu nimu pagbaliwun kapudilan ti katutuuhanan tungkul sa Panginuun?

¹¹ Taynguna kawu parusahan yi Panginuun. Nakan mabuta yi kanmu manga mata, dugay gid bag-u kawu kumakit maan sa marayaw.” Pagka sinabi ni Pablu tunda, susun yi nasaydan ni Ilimas nagdulum kay mata, napsa yi, bag-u nan-garapgap kay kamang hampay may umabat sa kanya.

¹² Pagka nakitan gubirnadur tunda, sinmarig yi ngani siya sa kan Hisus. Naglingut siya sa kanda ni Pablu itinudlu tungkul sa Panginuun.

Sida ni Birnabi ni Pablu Nanudlu sa Antiyukya

¹³ Bag-u ginminan sinmakay sida ni Pablu ginan sa banwa Papus, nagdipay atag sa banwa Pirga sa Pampilya pag daga. Pagka sa Pirga napablag sa kanda si Huwan Markus, nuli yi maan siya sa Hirusalim.

¹⁴ Ginan sa Pirga napadayun sida ni Pablu kanda lakaw bag-u nakaras-ug sida sa banwa Antiyukya sa daga Pisidya. Pagka sa Sirang Pamahari, sinmaka sida sa simbahan manga Hudiyu bag-u tinmukaw.

¹⁵ Pagka binasa usa ka tawu ginan sa Kasuguan ni Muysis hanggan ginan sa Kasuratan manga Purupita, nagsabi ti pangulu simbahan ti manga Hudiyu sa usa ka tawu, sabihi sida ni Pablu magkun, “Manga kaparihu nimi Hudiyu, nu kamu may iadal sa ikarig-un manga tawu, tultula yi niyu.”

¹⁶ Nakan tinmindug si Pablu, pinaamanan niya ti manga tawu danga sida umingay bag-u namaliwanag siya magkun, “Kamu duy pag manga kaparihu niku Israilita hanggan kamu pag manga balaw Hudiyu manga niabay yi sa surundanun Hudiyu, kamu tanan pagpatingi sa kang paliwanag.

¹⁷ Pinili Diyus ti ginurang nasyun Israil kanda nanday-uhan ati sa Ihiptu. Pinayamu niya sida, binwat usa ka daka pag nasyun. Bag-u sa kay gid daka pag kamaskihan ipinalwas niya sida ginan sa kanda nanday-uhan sa Ihiptu.

¹⁸ Bag-u sa sulud upatpulu ka timpu tiniis yi lang Diyus kanda magbugya magsunud sa kanya.

¹⁹ Ipinadaug niya sa kanda ti pitu ka nasyun tawu sa daga Kanaan,

²⁰ bag-u ipinakaun yi niya ti daga sa manga ginurang, sa kay pinili pag nasyun. “Bag-u may pinili ti Diyus sa nasyun Israil manga manughusay tugka sa udas ni Purupita Samwil bag-u siya maan ti nagpangulu sa kanda.

²¹ Pagka sida nanhagad hari, ipinakaun Diyus sa kanda si Saul, kan Kis anak, kan Binhamin linahi hampay siya maghari sa kanda sa sulud upatpulu ka timpu.

²² Pagka binahasan yi siya Diyus, si Dabid maan ti pinili Diyus hampay kanda hari. Nagpasnu ti Diyus sa kan Dabid magkun, ‘Nakitan niku kan Isai anak si Dabid, imaw yi gid kang pagbayaun pag tawu, masurundun siya sa tanan niku nagustuhan.’ ”

²³ Ginan sa kay manga linahi ni Dabid, pinili Diyus si Hisus hampay siya ti Manugribri nasyun Israil angay sa kay itinaratu Diyus kaybi di waya.

²⁴ Udwaya nakaumpisa si Hisus kay buruwatun, daan itinudlu yi ni Huwan sa buu nasyun Israil hampay iampu nida kanda manga kasalanan bag-u itulbaw.

²⁵ Pagka arani yi matapus kan Huwan buruwatun, sinabi niya sa manga tawu magkun, “Kanyu hantup si unu nguna aku? Balaw aku ti kanyu paggagadun. Rumas-ug siya sa kang uryan. Unman aku may karampatan makalubad kay higut niya lapak.”

²⁶ Magkun si Pablu, “Manga kaparihu niku Hudiyu, manga linahi ni Abraham hanggan kamu pag manga balaw Hudiyu manga niabay sa surundanun Hudiyu, kita yi duy ti pinadakitan barita tungkul sa inda pag karibrihan.

²⁷ Ti manga taga Hirusalim hanggan kanda manga pinunu unman nakakilala sa kanya kuntay siya yi ti Manugribri. Unman diman naunawaan nida ti isinurat manga purupita kanda pagbasahun kada Sirang Pamahari. Dapat sida ngap ti nagtupad sa manga binagaw purupita sa kanda magsintinsiya sa kan Hisus sa kamatayan.

²⁸ Madi sida unman may nakitan sa kanya dapat ikasintinsiya sa kamatayan, dapat kanda ngap hinagad sa kan Pilatu hampay siya ipamatay.

²⁹ Pagka tinupad nida ti tanan isinurat tungkul sa kanya, bin-ul nida siya ginan sa kurus bag-u kanda ipinauli sa tinaguktukan batu.

³⁰ “Dapat siya binuhi maan Diyus.

³¹ Bag-u sa sulud dugay pag udas pirmi napakakit siya sa manga nagkuyug sa kanya kaybi sa kay nag-ati sa Hirusalim ginan sa Galiliya. Taynguna tunda yi ngani pag manga tawu ti manugbarita tungkul sa kan Hisus sa manga Israilita.

^32-33 Nakan kami nagsitay hampay itultul sa kanyu ti Mayad pag Barita magkun, ti manga itinaratu Diyus kaybi sa ginurang manga Hudiyu, tinupad yi niya taynguna para sa kanta, una sa kanda manga linahi una sa manga balaw Hudiyu, dahil binuhi niya maan si Hisus. Parihu sa isinurat sa ikadwa pag Kanta magkun, ‘Kawu kang anak, taynguna aku kanmu yi Ama.’

³⁴ “Tungkul sa kay nagbuhi maan niya sa kan Hisus hampay dayu makalakaw karunutan hanggan aban, inda kay sinabi Diyus magkun, ‘Pihu gid pakan-an niku kamu kaayadan angay sa kang pakiusa sa kanyu, ga kang diman itinaratu sa kan Dabid.’

³⁵ “Bag-u sinabi waya Diyus sa iba Kasuratan, ‘Unman pahintulutan nimu ti bangkay nimu matinupadun pag Suruguun makalakaw karunutan.’

³⁶ “Pagka natupad ni Dabid ti kagustuhan Diyus sa ati katpung pag manga tawu, namatay siya bag-u siya ilinbung kataid sa kay manga ginurang, nakalakaw karunutan kay bangkay.

³⁷ Dapat si Hisus ti binuhi maan Diyus, unman siya nakalakaw karunutan.

^38-39 Nakan ngani duy, kailangan maalaman niyu tanan kuntay ginan sa nangyari sa kan Hisus pag-itudlu sa kanyu ti kapatawadan sa kanyu manga kasalanan. Pagmaalaman yi gid niyu, ti kada tawu nu magsarig sa kan Hisus, siya iribri sa tanan niya kasalanan. Dapat nu siya magsarig sa kay pagtupad sa Kasuguan ni Muysis unman siya may kapatawadan sa kay manga kasalanan.

⁴⁰ Nakan ngani pag-aman gid duy kamu sa unman mangyari sa kanyu ti isinurat sa Kasuratan manga Purupita magkun,

⁴¹ ‘Pagbantay kamu, kamu pag manga manuglapastangan, madulaw gid kamu ag midamhak. Dahil ti kang buwatun sa kanyu kaudasan unman gid niyu paniwalaan, una may manbarita waya inda sa kanyu.’”

⁴² Pagka magluwas yi sa simbahan manga Hudiyu sida ni Pablu ni Birnabi, sinabi manga tawu sa kanda magkun, “Kailangan duy pagpaliwanag maan kamu sa kanmi tungkul sa inda pag manga katutuuhanan sa atubangan pag Sirang Pamahari.”

⁴³ Pagka ginminan sida sa simbahan manga Hudiyu mayamu tawu ti kinmuyug sa kanda ni Pablu ni Birnabi, una manga Hudiyu una manga balaw Hudiyu manga niabay sa surundanun Hudiyu. Bag-u pinaliwanagan waya sida ni Pablu magkun, “Pagparargu kamu sa kanyu pagsarig sa kay pangaawa Diyus.”

⁴⁴ Pagka sa usa maan ka Sirang Pamahari, harus nagtipun ti tawu banwa hampay magpatingi sa Bagaw Diyus.

⁴⁵ Dapat ay pagka nakitan manga Hudiyu ti kayamuan gid tawu, naghirak gid sida nakan pinahimudil lang nida kay manga pagsabihun ni Pablu, minura waya nida siya.

⁴⁶ Dapat matutum di kanda naisipan nida ni Pablu ni Birnabi magkun, “Sa kanyu dapu kailangan pag-itultul ti Bagaw Diyus. Dapat ay kainda ginan kami dayi sa kanyu. Ati yi kami sa manga balaw Hudiyu. Dahil ipinurya niyu ti Bagaw Diyus ag pinasnuan niyu kanyu sadili kuntay unman may karampatan kamu sa tutuu pag buhi unman may katapusan.

⁴⁷ Dahil kainda kay isinugu Panginuun sa kanmi magkun, ‘Ipinakana niku kawu ga sulu sa manga balaw Hudiyu hampay ibarita nimu ti karibrihan sa tanan tawu sa bilug kalibutan.’”

⁴⁸ Pagka nadnugan manga balaw Hudiyu kay manga sinabi ni Pablu, nakabaya gid sida nagdayaw gid sida sa kay bagaw Panginuun. Tunda pag manga tawu kay pinili Diyus hampay makatanggap tutuu pag buhi unman may katapusan nagsarig ngani sa kan Hisus.

⁴⁹ Nakan ngani nilantag yi ti bagaw Panginuun sa tanan manga rugar ati.

⁵⁰ Dapat ay nag-udyuk ti manga Hudiyu sa manga mayaman pag babayi manga niabay sa surundanun Hudiyu hanggan sa manga lalaki may kangaranan sa banwa hampay unu-unuhun nida sida ni Pablu ni Birnabi. Bag-u tinulak ngani sida siyun ginan pag manga rugar.

⁵¹ Nakan pinagpag nida duwa ti galbuk ginan sa kanda lulud ga tanda laban sa manga tawu nag-unuunu sa kanda, bag-u nag-atag sida ni Pablu sa banwa Ikunyu.

⁵² Dapat ti manga nagsarig sa kan Hisus sa Antiyukya may kabayaan gid sa kanda tagipusuun, lubus sida sinuldan Ispiritu Banal.