Binwat 12 - Hanunuu

Inunu-unu maan ti Iglisya

¹ Bag-u pagka dugay inumpisahan inunu-unu ni Hari Hirudis ti iba manga sakup iglisya.

² Ipinalibun niya kan Huwan patar-ari si Santiyagu.

³ Pagka naalaman ni Hirudis nakabaya ti manga Hudiyu dahil minatay yi si Santiyagu, ipinadakup diman niya si Pidru, sa katpung Kapistahan tungkul sa Tinapay unman may Pamadaka.

⁴ Pagka dinakup si Pidru, ipinaslud siya sa pirisuhan bag-u ipinatanud sa kanya ti sampulu may unum ka sundalu bag-u mag-ulublusan sida tigup-at tigup-at ka tawu. Kay gayak ni Hirudis nu lawuy yi ti Kapistahan sa Pag-alaala sa Karibrihan ipaatubang niya si Pidru sa manga tawu, hampay sintinsiyahan siya sa kamatayan.

⁵ Nakan siti dapu si Pidru sa pirisuhan. Dapat ay nangungud ngap ti iglisya sa darangin tungkul sa kanya.

Ipinalwas Anghil si Pidru

⁶ Sa ati pag yabi turug si Pidru, ginapus kay baliw-baliw kamang tarikada ibiningkit sa duwa ka sundalu ag may manga sundalu sa puun sabian maulugan. Aldaw nangus ipaatubang yi siya ni Hirudis sa kayamuan tawu.

⁷ Kadaka linmuwang ngapu ti usa ka anghil Panginuun, rinmayaw gid sa sulud pirisuhan. Tinaptap niya kay habig ni Pidru, pinulaw niya magkun, “Bangun duy kadali.” Nalagpak ti manga tarikada ginan sa kay manga kamang ni Pidru.

⁸ Sinabi anghil sa kanya, “Paghuragkus duy, paglapak yi.” Katida ngani kay binwat ni Pidru. Bag-u magkun ti anghil, “Pagsulung waya kanmu pamaunib balukas sadsad, pagkuyug yi sa kangku.”

⁹ Nagkuyug ngani si Pidru sa anghil tag yi sa luwas pirisuhan. Dapat unman naalaman ni Pidru kuntay ungud gid inda pag nangyari sa kanya. Kay hantup barang may ipinakakit lang ti Panginuun sa kanya.

¹⁰ Pagka nakalawuy yi sida sa usa ka bantay hanggan sa kay ikadwa pag bantay, aput yi sida sa sabian may talakup baul. Lumuwas lang sabian banwa yi. Buluntad nabukasan sa kanda ti sabian bag-u nagluwas yi sida. Sinmunsun sida karsada bag-u kadaka tinayakan siya anghil.

¹¹ Bag-u nahinaw-hinawan si Pidru magkun, “Taynguna alam niku tutuu maaw inda pag nangyari sa kangku. Sinugu Panginuun kay anghil hampay bawiun aku ginan sa kamang ni Hirudis hanggan ginan sa tanan pag-isipun manga Hudiyu kanda buwatun mana sa kangku.”

¹² Pagka naintindihan ni Pidru inda, nag-ati siya sa balay ni Marya, kay ina ni Huwan Markus. Mayamu patar-ari nagtiripun ati magdarangin.

¹³ Pagka nagtariktik si Pidru sa talakup sabian, nagluwang ti usa ka babayi suruguun kay ngaran si Ruda, hampay duawan nu si unu ti nagtariktik.

¹⁴ Nakilala niya si Pidru maaw tigbagaw. Dapat ay sa kay yi gid kabayaan niya, ud ngap binukasan niya ti talakup sabian. Nandalandanan ngap maan siya tag sa sulud. Magkun siya sa manga iba, “Si Pidru maaw ti matindugan ati sa luwas sabian!”

¹⁵ Magkun sida, “Paung duy kawu.” Dapat balaw nagpatalu si Ruda, ungud gid imaw. Nakan sinabi nida magkun, “Kay nguna anghil ni Pidru tunda.”

¹⁶ Si Pidru bay sigi di gid kay magtariktik sa talakup. Pagka dugay binukasan nida ti sabian, nakitan nida siya yi ngani maaw. Naglingut gid sida masyadu.

¹⁷ Pinaamanan niya sida danga maingay bag-u kay itinultul sa kanda nu kabitay siya pag ipinalwas Panginuun ginan sa pirisuhan. Binilinan niya sida magkun, “Ibarita niyu inda sa kan Santiyagu hanggan sa manga patar-ari.” Bag-u nighit si Pidru tag sa iba rugar.

¹⁸ Pagka nasurip yi, balaw basta gid pag naaburidu ti manga sundalu nu hintay nguna ti nangyari sa kan Pidru.

¹⁹ Ipinahanap siya ni Hirudis. Pagka unman gid siya nakitan, hinigpitan gid niya sa paingana ti manga sundalu bag-u kay ipinamatay. Bag-u naglus-ug si Hirudis ginan sa Hudiya tag sa banwa Sisariya. Nadugay waya ati siya.

Sa kay Pagkamatay ni Hirudis

²⁰ Pusuk gid kay isug ni Hari Hirudis sa manga taga Tiru hanggan taga Sidun. Nakan nagkaban sida nag-ati sa hari. Nagpakihampang dapu sida sa kan Balastu, imaw tig-asikasu sa tanan kasiyunan ni Hirudis. Bag-u nagpakarani sida sa kan Hirudis nagsuyu sa kanya hampay danga yi sida kagalitan niya dahil ti karabuhian sa kanda banwa ginan sa banwa hari.

²¹ Pagka sa taning pag sirang, nagsulung si Hirudis panrutayun hari, bag-u tinmukaw siya sa kay tukawan pangatungkulan bag-u siya nagpahayag tag sa manga tawu.

²² Pagka nadnugan nida kay binagaw, nanriringgitan ti manga tawu magkun, “Nagbagaw siya ga anyu bagaw usa ka diyus, tunda bukun yi bagaw tawu.”

²³ Susun yi pinarusahan siya anghil Panginuun dahil unman sinabi niya sa manga tawu siya tawu lang, balaw Diyus. Sinapatan dapu siya bag-u namatay.

²⁴ Nilantag ti Bagaw Diyus, nag-amat yinmamu ti manga tawu sinmarig sa kan Hisus.

²⁵ Pagka inintirga yi nida ti kuwarta sa manga manug-asiwa iglisya sa Hirusalim, nagbalik maan sida ni Birnabi ni Saulu tabug sa Antiyukya, kanda iniba si Huwan Markus.