Binwat 11 - Hanunuu

Nagbarita si Pidru sa Iglisya sa Hirusalim

¹ Nabaritaan manga iba apustul hanggan manga patar-ari sa bilug daga Hudiya may manga balaw Hudiyu naniwala diman sa Bagaw Diyus.

² Ati sa Hirusalim may manga patar-ari Hudiyu magtuun waya sa Kasuguan ni Muysis. Nakan pagka rinmas-ug si Pidru sa Hirusalim, sinungyaw nida siya magkun,

³ “Nagdayun maaw kawu sa balay manga balaw Hudiyu, nagsaru paman kawu sa kanda.”

⁴ Nakan itinultul ngani ni Pidru sa kanda nu hintay ti nangyari tanan-tanan ginan sa kabag-u.

⁵ Magkun siya sa kanda, “Aku duy ati katpung sa banwa Hupi. Sa kang magdarangin, nabul-an aku isip bag-u may ipinakakit ti Panginuun sa kangku. May ga kumut daka hinigtan kay upat ka yungu, itinuntun ginan sa langit tag sa kang arani.

⁶ Dinuawan gid niku kay sukad bag-u nakitan niku may manga hayup, manga simarun, manga iyay hanggan manga manuk.

⁷ Bag-u nadnugan niku may magbagaw magkun, ‘Pagtindug yi kawu Pidru, pag-iyaw yi kawu, pagkaun.’

⁸ Dapat sinmagut aku magkun, ‘Dayu gid duy Panginuun, una kaybi ginan unman gid aku nagkaun una hintay nu daut sa kang turun-anun.’

⁹ Nadnugan maan niku may binmagaw ginan sa langit magkun, ‘Danga nimu pagsabiha daut sa kanmu turun-anun ti ipinakaun Diyus hampay karan-unun.’

¹⁰ Katlu ginan tunda pag nangyari bag-u binatak maan tag sa tungud tag sa langit tunda pag bilang ga kumut.

¹¹ “Ati diman gid katpung rinmas-ug ngap sa kang pagdayunan pag balay ti tulu ka tawu sinugu tag sa kangku ginan sa Sisariya.

¹² Sinabi Ispiritu sa kangku danga kunu mag-alaala, pagkuyug yi lang aku sa kanda. Inda pag unum ka patar-ari taga Hupi nagkuyug diman sa kangku tabug sa Sisariya. Pagka kami rinmas-ug, nagsaka ngani kami sa balay ni Kurnilyu.

¹³ Bag-u itinultul niya sa kanmi kay nakakit sa anghil matindugan sa kay balay. Sinabi kunu anghil sa kanya magkun, ‘Pagpasugu kawu tag sa Hupi bul-a nida ti usa ka tawu kay buu ngaran si Simun Pidru.

¹⁴ Itudlu niya sa kanmu ti Mayad pag Barita hampay miribri kawu hanggan kanmu manga kasunu balay.’ ”

¹⁵ Magkun si Pidru, “Kang diway nag-umpisa nagbagaw sa kanda, kadaka sinuldan sida lubus Ispiritu Banal, parihu diman ga nangyari sa kanta sa kabag-u.

¹⁶ Bag-u naisipan diman niku kay sinabi Panginuun kaybi magkun, ‘Si Huwan magtulbaw sa danum, dapat kamu itulbaw sa Ispiritu Banal.’

¹⁷ Ipinakaun yi ngani Diyus sa kanda ti Ispiritu Banal parihu ga kay diman ipinakaun sa kanta sa kanta nagsarig sa Panginuun Hisu-Kiristu. Kabitay aku? May karampatan aw lugud aku makaampara sa Diyus?”

¹⁸ Pagka nadnugan manga patar-ari inda pag manga sinabi ni Pidru, udyi sida may pagsabihun sa kan Pidru. Bagkus ngap nagdayaw sida sa Diyus magkun, “Nu katunda maaw, ipinakaun diman Diyus sa manga balaw Hudiyu hampay makaampu sida sa kanda kasalanan ag makatanggap buhi.”

Ti Iglisya sa Banwa Antiyukya

¹⁹ Ginan sa minatay si Istiban nag-umpisa ti pag-unuunu, nakan nangalat-kalat yi ti manga nagsarig sa kan Hisus. Ti iba nakaaput sa daga Pinisya, sa Sipru pag puru sa karaw-an dagat hanggan sa banwa Antiyukya. Una naan kanda lakaw itinudlu nida ti Barita tungkul sa kan Hisus sa manga Hudiyu lang.

²⁰ Dapat ti iba sa kanda manga taga Sipru hanggan taga Sirini pag manga tawu. Pagka rinmas-ug sida sa Antiyukya, itinudlu ngap nida sa manga balaw Hudiyu ti Mayad pag Barita tungkul sa Panginuun Hisus.

²¹ Sa kanda gid ti kamaskihan Panginuun, nakan mayamu ti nagpaniwala sa barita ag nagpasakup sa Panginuun.

²² Pagka naalaman manga patar-ari sa iglisya sa Hirusalim nu hintay ti nangyari sa Antiyukya, sinugu nida si Birnabi atabug sa Antiyukya.

²³ Pagka siya rinmas-ug ati, nakitan niya kay papalad Diyus sa kanda. Nakan nakabaya gid siya. Kay pinaanyuan sida magkun pangungud sida pagmatinupadun sa Panginuun, danga sida magbul-iw.

²⁴ Mayad gid pag tawu si Birnabi. Lubus siya sinuldan Ispiritu Banal, marig-un kay pagsarig. Mayamu tawu ti binutung tag sa Panginuun.

²⁵ Pagka dugay nag-ati si Birnabi tag sa banwa Tarsu hampay hanapun si Saulu.

²⁶ Pagka nakitan niya si Saulu, tinaban niya siya atag sa Antiyukya. Ati sida duwa sa sulud usa gid ka timpu magpakiusa sa iglisya. Mayamu tawu kanda tinudluan. Ati diman sa Antiyukya pag inumpisahan iningarnan Kiristiyanu ti manga napasakup sa kan Kiristu.

²⁷ Ati katpung pag panahun may rinmas-ug sa Antiyukya manga purupita ginan sa Hirusalim.

²⁸ Tinmindug ti usa, kay ngaran si Agabu. Bag-u siya nagpurupita angay sa kapangyarihan Ispiritu Banal. Magkun siya, “Masyadu aban ti lun-us sa bilug kalibutan Ruma.” Nangyari tunda katpung Pangulu Hari si Kalaudyu.

²⁹ Nakan nagharampangan ti manga patar-ari hampay angay sa kanda kaya sa kada usa pumadara sida pakaun tabug sa manga patar-ari nangulian sa Hudiya.

³⁰ Katunda yi ngani kanda binwat. Ipinabahala nida kanda pakaun sa kanda ni Birnabi ni Saulu imaw ti nagtibu atag sa manga manug-asiwa iglisya ati sa Hudiya.