Bilang 7 - Hanunuu

Ti manga Panagda para sa Pagtalaga sa Turda Tiripnan

¹ Pagka naayus yi ni Muysis ti Turda Tiripnan, winidwisikan niya inda lana ag itinalaga hanggan ti tanan pag manga kagamitan siyun. Katunda diman kay binwat sa harandugan ag sa tanan inda manga kagamitan.

² Bag-u nandara manga handug sa Panginuun ti manga takinan Israil, takinan sa kada lahi. Sida ti may katungkulan sa pagsinsus.

³ Nandara sida sa atubangan Panginuun unum ka karitun ag 12 ka baka — usa ka karitun sa kada duwa ka takinan, ag usa ka baka sa kada usa sa kanda. Dinara nida inda sa atubangan Turda Tiripnan.

⁴ Magkun ti Panginuun sa kan Muysis,

⁵ “Tanggapa nimu kanda manga handug hampay magamit para sa manga buruwatun sa Turda Taragbuan. Ipakaun inda sa manga lahi ni Libi angay sa kanda buruwatun.”

⁶ Nakan tinanggap ni Muysis ti manga karitun hanggan ti manga baka, ag ipinakaun inda sa manga lahi ni Libi.

⁷ Ipinakaun niya ti duwa ka karitun hanggan ti upat ka baka sa manga magtal-anakan ni Girsun para sa kanda buruwatun.

⁸ Ag ti upat ka karitun bag-u walu ka baka ipinakaun niya sa manga magtal-anakan ni Manug-asiwa Aarun.

⁹ Dapat unman pinakan-an ni Muysis karitun ngatay baka ti manga magtal-anakan ni Kuhat dahil sida ti may katungkulan sa pagdara manga banal pag bagay Turda.

¹⁰ Nandara diman ti manga takinan kanda manga handug para sa pagtalaga sa harandugan katpung itinalaga inda.

¹¹ Magkun ti Panginuun sa kan Muysis, “Kailangan sa kada sirang, may usa ka takinan mandara kay handug para sa pagtalaga harandugan.”

^12-83 Inda sida ti manga nandara kanda manga handug: Sa un-an pag sirang, si Nasun kay anak ni Aminadab, ti takinan lahi ni Huda. Sa ikadwa pag sirang, si Natanyil kay anak ni Suwar, ti takinan lahi ni Isakar. Sa ikatlu pag sirang, si Ilyab kay anak ni Hilun, ti takinan lahi ni Sabulun. Pagka ikap-at pag sirang, si Ilisur kay anak ni Sidiyur, ti takinan lahi ni Rubin. Sa ikalima pag sirang, si Silumyil kay anak ni Surisaday, ti takinan lahi ni Simyun. Sa ikan-um pag sirang, si Iliyasap kay anak ni Diyuwil, ti takinan lahi ni Gad. Sa ikapitu pag sirang, si Ilisama kay anak ni Amihud, ti takinan lahi ni Ipraim. Sa ikawalu pag sirang, si Gamalyil kay anak ni Pidasur, ti takinan lahi ni Manasis. Sa ikasiyam pag sirang, si Abidan kay anak ni Gidyuni, ti takinan lahi ni Binhamin. Sa ikasampulu pag sirang, si Ayisir kay anak ni Amisaday, ti takinan lahi ni Dan. Sa ika-11 pag sirang, si Pagiyil kay anak ni Ukran, ti takinan lahi ni Asir. Sa ika-12 pag sirang, si Ahira kay anak ni Inan, ti takinan lahi ni Niptali. Ti kada usa sa kanda nagdara manga handug: usa ka bandihadu binwat sa pilak usa ka kilu may tunga kay buyat, ag usa ka malukung binwat sa pilak 800 ka guhit kay buyat angay sa kiluhan paggamitun manga manughandug. Ti kada usa inda punu marinu pag kalasi arina linibugan lana para handug sa pagkilala sa Panginuun. Nandara diman ti kada usa sa kanda tig usa ka pinggan binwat sa gintu may buyat manga 120 ka guhit punu kamangyan; usa ka turiti baka, usa ka tudu karanidu ag usa ka turiti karanidu handug pagsunugun; usa ka tudu kambing handug sa paglumpiyu; duwa ka baka, lima ka tudu karanidu, lima ka lalaki kambing ag lima ka turiti karanidu handug para sa mayad pag pakiusa.

⁸⁴ Inda ti tanan manga handug 12 ka takinan manga Israilita para sa pagtalaga harandugan: 12 ka pilak bandihadu, 12 ka pilak malukung, ag 12 ka gintu pag tasa.

⁸⁵ Ti kada bandihadu pilak may buyat usa ka kilu may tunga, ag ti kada malukung pilak may buyat 800 guhit. Ti kabuuhan timbang tunda 28 ka kilu angay sa timbangan paggamitun manga manughandug.

⁸⁶ Ti 12 ka gintu pag tasa punu kamangyan may buyat 120 ka guhit ti kada usa angay sa buyat timbangan paggamitun manga manughandug. Kay kabuuhan timbang inda 1,440 ka guhit.

⁸⁷ Inda pag manga hayup ti ipinakaun para sa handug pagsunugun: 12 ka turiti baka, 12 ka tudu karanidu ag 12 ka turiti karanidu, kaibahan yi sitay ti manga handug pagkilala sa Panginuun. Ag ti handug sa paglumpiyu: 12 ka lalaki kambing.

⁸⁸ Ti manga hayup handug para sa mayad pag pakiusa: 24 ka tudu baka, 60 ka tudu karanidu, 60 ka lalaki kambing ag 60 ka turiti karanidu. Inda ti tanan manga handug katpung itinalaga ti harandugan.

⁸⁹ Nu magsulud si Muysis sa Turda Taragbuan para manhampang sa Panginuun, mag-adnugan niya ti busis maghampang sa kanya ginan sa karaw-an duwa ka kirubin, sa babaw taklub Kaban Kasunduan, ti Ulian Pangaawa. Ati pag maghampang ti Panginuun sa kan Muysis.