Bilang 6 - Hanunuu

Ti Surundanun tungkul sa Tawu Itinalaga Mansirbi sa Panginuun

¹ Magkun ti Panginuun sa kan Muysis,

² “Sabiha nimu sa manga Israilita nu ti usa ka lalaki ngatay babayi mamuwat usa ka taratu kuntay ipakaun niya kay sadili sa pagsirbi sa kangku bilang Nasariyu,

³ kailangan balaw siya manginum intus ubas ngatay una hintay pag irinmun makalangu. Balaw diman siya mahimu gumamit langgaw ginan sa una hintay pag irinmun makalangu. Balaw diman siya manginum pin-ga ubas ngatay mangaun ubas una pinauga.

⁴ Habang Nasariyu waya siya, kailangan balaw siya mangaun una hintay basta ginan sa ubas, but-ul man ngatay kay lukub.

⁵ “Balaw diman niya ipauguy kay buhuk tugka udwaya matapus kay taratu mansirbi sa Panginuun. Kailangan ipasaman siya para sa Panginuun tugka matapus kay udas niya taratu. Nakan pabay-anan lang niya umaba kay buhuk.

⁶ Tugka sa udwaya matapus kay taratu mansirbi sa Panginuun, balaw siya mahimu makapakarani sa bangkay,

⁷ una waya kay ama ngatay ina una patar-ari pag bangkay. Danga gid niya pag-uringi kay sadili dahil lang sa kanda. Dahil kay buhuk tanda niya pagtalaga kay buhi sa Diyus.

⁸ Nakan sa buu panahun niya pagtalaga kay buhi, ipinablag siya para sa Panginuun.

⁹ “Nu kadaka may namatay sa kay arani, dahil siyun nauringan kay buhuk tanda niya pagtalaga sa Panginuun, kailangan kidkidun niya sa ikapitu pag sirang, tunda ti sirang niya paglumpiyu.

¹⁰ Bag-u sa ikawalu pag sirang, kailangan mandara siya duwa ka kalampati ngatay duwa ka tukmu sa manughandug ati sa sabian Turda Taragbuan.

¹¹ Ihandug manughandug kay usa bilang handug sa paglumpiyu ag kay usa bilang handug pagsunugun. Sa panab-anan inda, patawadun siya sa kay kasalanan dahil sa bangkay. Sa tunda diman pag sirang, italaga maan niya kay sadili ag paabaun maan kay buhuk.

¹² Ti un-an pag manga sirang sa kay pagsirbi sa Panginuun balaw iminsan sa kay pagtupad sa kay taratu, dahil nauringan siya sa panab-anan namatay. Kailangan ipakaun maan niya kay sadili sa Panginuun tugka sa matapus kay taratu, ag mandara siya lalaki karanidu bilang handug bayad sa kay kasalanan.

¹³ “Kaindaay kay buwatun nu natapus yi niya kay Taratu: Kailangan umatag siya sa sabian Turda Taragbuan.

¹⁴ Ati kay ihandug sa Panginuun inda pag manga hayup unman may alangan: usa ka lalaki karanidu kay idad usa ka timpu bilang handug pagsunugun, usa ka babayi karanidu kay idad usa ka timpu diman bilang handug sa paglumpiyu ag usa ka gurangun lalaki karanidu bilang handug para sa mayad pag pakiusa.

¹⁵ Bukud waya siyun, manhandug diman siya manga handug pasalamat sa Panginuun, manga handug irinmun, ag usa ka alat tinapay unman may pamadaka binwat ginan sa marinu pag kalasi arina. Kay iba ka tinapay madamul may lakay lana ag kay iba waydi manipis pinayidan lana.

¹⁶ “Manug-asiwa ti manhandug inda sa Panginuun: Ihandug niya ti handug paglumpiyu hanggan ti handug pagsunugun;

¹⁷ bag-u ihandug diman niya ti lalaki pag karanidu handug para sa mayad pag pakiusa kaibahan ti usa ka alat tinapay unman may pamadaka. Ihandug diman niya ti manga handug para sa pagkilala sa Panginuun hanggan ti manga handug irinmun.

¹⁸ “Kidkidun Nasariyu kay buhuk, ti tanda niya pagtalaga kay buhi sa Panginuun, ati sa Turda Taragbuan. Sunugun niya inda sa apuy sinunugan handug para sa mayad pag pakiusa.

¹⁹ Bag-u ipahiyaput manughandug sa kamang Nasariyu ti labay linauya karanidu hanggan ti manipis ag madamul pag tinapay unman may pamadaka ginan sa alat.

²⁰ Pagkatapus, bul-un inda manughandug ag ipaabwat sa atubangan Panginuun bilang handug pag-ipaabwat. Banal inda pag bahagi handug, ag para inda sa manughandug, hanggan ti dubdub ag lulud karanidu ipinaabwat diman sa Panginuun. Pagkatapus inda, mahimu yi makainum intus ti Nasariyu.

²¹ “Inda ti surundanun para sa usa ka Nasariyu. Dapat nu mantaratu ti usa ka Nasariyu kuntay manhandug siya sa Panginuun subra sa ipinatupad sa kay taratu, kailangan gid niya inda buwatun.”

Ti Papalad sa manga Manug-asiwa

²² Magkun ti Panginuun sa kan Muysis,

²³ “Sabiha nimu sa kan Aarun hanggan sa manga anak niya lalaki kaindaay kanda sabihun nu magpapalad sida sa manga Israilita:

²⁴ ‘Papaladan kamu Panginuun ag giyahan niya kamu.

²⁵ Pagsa kanyu mana ti kaayadan hanggan ti pangaawa Panginuun.

²⁶ Makabaya mana ti Panginuun sa kanyu ag pakan-an niya kamu mayad pag kahamtangan.’

²⁷ “Sa katida pag paraan maipaburayhaw nida sa manga Israilita nu si unu aku, ag papaladan niku sida.”