Bilang 5 - Hanunuu

Ti Paglumpiyu sa Kampu

¹ Magkun ti Panginuun sa kan Muysis,

² “Sugua nimu ti manga Israilita palwasan nida sa kampu una si unu ti may dilikadu pag sakit sa lukub, ngatay may amumutul ngatay gaway dahil sa sakit, ngatay mayagting siya dahil nakahiyaput bangkay.

³ Palwasan niyu sida, lalaki man ngatay babayi hampay balaw nida mauringan ti kampu, nu naan aku mangulian kaibahan niyu.”

⁴ Nakan ipinalwas manga Israilita ti manga katida pag tawu sa kampu angay sa pag-isugu Panginuun sa kan Muysis.

Ti Bayad sa Binwatan Daut

⁵ Bag-u magkun ti Panginuun sa kan Muysis,

⁶ “Sabiha nimu sa manga Israilita, nu ti usa ka lalaki ngatay babayi lumabag sa kagustuhan Panginuun sa panab-anan pagbuwat kadautan sa kay kaparihu, nagkasala tunda pag tawu.

⁷ Kailangan akuun niya kay nabwat kasalanan, ag kailangan bayadan niya buu ti nabwatan niya kadautan, ag dugangan waya 20 ka bahagi kay ibayad.

⁸ Dapat nu ti nabwatan kasalanan namatay yi ag unman siya may katawuhan tumanggap sa tunda pag bayad, ti kabaydanan tabug yi sa Panginuun ag kailangan ipakaun inda sa manughandug kaibahan ti manga karanidu pag-ihandug manughandug hampay lukatun ti kasalanan tawu nagkasala.

⁹ Ti tanan banal pag pakaun pagdarahun manga Israilita sa manga manughandug kanda yi pagkahuray.

¹⁰ Hu, sa magkaapu yi manga manughandug tunda ti banal pag manga handug.”

Ti Parusa sa Babayi Magpanlalaki

¹¹ Magkun waya ti Panginuun sa kan Muysis,

^12-13 “Sabiha nimu inda sa manga Israilita: Nangus may usa ka babayi paghantupun niya asawa nangulid sa kay katagbu, dapat balaw niya mapatutuuhanan dahil unman may nakakit sa kay asawa sa aktu,

^14-15 kailangan darahun siya niya asawa sa manughandug, una balaw tutuu yinagtingan niya kay sadili sa panab-anan panguragin. Ag kailangan mandara ti lalaki handug duwa ka kilu arina sibada para sa kay asawa. Kailangan balaw niya tunda lakayan lana ngatay kamangyan, dahil handug tunda bilang pasalamat kay ihandug sa kay paghantup sa kay asawa. Usa inda ka handug sa pag-alam nu ngatay nagkasala kay asawa ngatay unman.

¹⁶ “Darahun manughandug ti babayi sa atubangan niku,

¹⁷ bag-u manigis ti manughandug banal pag danum sa ungut buwat sa lutuk, ag paulian niya inda galbuk ginan sa salug Turda Tiripnan.

¹⁸ Nu naipatindug yi manughandug ti babayi sa kang atubangan, ipawayung manughandug ti buhuk babayi ag ipauli sa kay kamang ti handug pasalamat para sa pag-alam nu ngatay nagkasala siya ngatay unman. Isinagda inda niya asawa dahil sa kay paghantup sa kanya. Bag-u hiyaptan manughandug ti ungut may mapait pag danum magdara manga saad,

¹⁹ pasumpaun niya ti babayi ag sabihun sa kanya, ‘Nu balaw nimu inuringan kanmu sadili sa panab-anan pagpagamit sa iba lalaki, balaw kawu dultan kakurian dara tunda pag mapait danum.

²⁰ Dapat nu inuringan nimu kanmu sadili sa panab-anan pagpagamit sa iba lalaki balaw nimu asawa,

²¹ magsumpa aku bumaliw halimbawa sa manga tawu ti saad Diyus sa kanmu, ag balaw yi kawu magkaanak.

²² Mana inda pag danum may dara saad sumulud sa kanmu bilug hampay udyi kawu magkaanak.’ Bag-u sabihun babayi, ‘Matupad mana inda.’

²³ “Bag-u inda pag saad isurat manughandug sa usa ka sururatan ag ugasan niya sa ungut may mapait danum.

²⁴ (Nu naipainum yi sa babayi ti mapait pag danum may dara saad, bumaliw inda dahilan niya masyadu pag pag-agwanta nu may kasalanan siya.)

²⁵ Pagkatapus, bul-un manughandug ginan sa kamang babayi ti handug pasalamat, ti ihinandug niya asawa dahil sa kay paghantup, bag-u ipaabwat inda manughandug sa kang atubangan ag darahun sa harandugan.

²⁶ Bum-ul ti manughandug usa ka akup sa tunda pag handug hampay maalaman nu nagkasala ngani ti babayi ngatay unman, ag sunugun inda sa harandugan. Pagkatapus, ipainum niya sa babayi ti danum.

²⁷ Nu tutuu inuringan niya kay sadili sa panab-anan pagpudil sa kay asawa, mahigpit pumakuri sa kanya ti danum kay ininum magdara saad. Balaw yi siya manganak ag bumaliw halimbawa sa manga tawu ti saad Diyus sa kanya.

²⁸ Dapat nu bukun niya inuringan kay sadili balaw siya dultan, ag manganak di siya.

²⁹ “Inda ti kasuguan tungkul sa lalaki maghantup sa kay asawa. Nu nauringan babayi kay sadili sa panab-anan pamudil sa kay asawa,

³⁰ ngatay maghantup ti lalaki sa kay asawa nanguragin, kailangan patindugun manughandug tunda pag babayi sa kang atubangan ag ipatupad inda pag kasuguan sa kanya.

³¹ Unman may labut ti lalaki dapat may saragtun ti babayi nu nagkasala siya, ag mangagwanta siya sa kay kasalanan.”