Bilang 4 - Hanunuu

Kay manga Linahi ni Kuhat

¹ Magkun ti Panginuun sa kanda ni Muysis ag ni Aarun,

² “Sinsusa niyu ti manga lahi ni Kuhat sakup lahi ni Libi, angay sa kanda magtal-anakan.

³ Minsanan sa bilang ti tanan lalaki may idad 30 tugka 50 ka timpu may kaya magsirbi sa Turda Taragbuan.

⁴ “Ti buruwatun manga lahi ni Kuhat sa Turda Taragbuan mag-asikasu sa pinakabanal pag manga bagay.

⁵ Nu umighit yi kamu sa kanyu pagkampuhan, si Aarun hanggan kay manga anak mansulud sa Turda ag bul-un nida ti limbun sa sulud bag-u itabun inda sa Kaban Kasunduan.

⁶ Ag takluban waya nida inda marinu pag kalasi lukub ag rutay marutum, bag-u ipasulung nida sa kay talinga ti manga yayungan.

⁷ “Sapinan diman nida marutum pag rutay ti lamisa burugtangan tinapay pag-ihandug sa atubangan Diyus; ag ipauli nida sa lamisa ti manga pinggan, manga tasa, manga ungut, manga siburan pagsukadan manga handug irinmun, ag ti manga tinapay pirmi sa lamisa.

⁸ Bag-u takluban nida rutay marara, ag takluban waya gid marinu pag kalasi lukub ag ipasulung sa manga talinga ti yayungan.

⁹ “Ti palaulian sulu saputun nida rutay marutum, hanggan ti manga sulul-an, ti manga pangilpit, ti manga sukadan ayum ginan sa sulul-an ag ti manga siburan sukadan lana sulul-an.

¹⁰ Saputun waya gid nida inda tanan marinu pag kalasi lukub ag ihigut sa tukud yayungan.

¹¹ “Takluban diman nida rutay malatuy ti gintu pag harandugan, ag takluban waya manga marinu pag kalasi lukub, bag-u ipasulung nida sa manga talinga ti yayungan paras-anan.

¹² Ti manga nasawad pag kagamitan Turda paggamitun sa pagsirbi sa Balay Diyus saputun diman nida rutay marutum ag takluban marinu pag kalasi lukub bag-u ihigut sa tukud yayungan.

¹³ “Kailangan bul-un ti dapug sa harandugan ag takluban rutay kulay dungun.

¹⁴ Bag-u ipauli nida sa harandugan ti tanan manga kagamitan: ti burugtangan baga, ti daraka pag panubuk para sa taguban, ti manga pala ag ti manga malukung. Takluban nida inda marinu pag kalasi lukub bag-u ipasulung nida sa talinga ti yayungan.

¹⁵ “Pagka natakluban ni Aarun hanggan niya manga anak ti Turda Taragbuan ag ti tanan kagamitan, daran-un inda magtal-anakan ni Kuhat nu umighit yi kamu sa kanyu pagkampuhan. Dapat balaw gid nida hiyaptan ti manga banal pag bagay hampay balaw sida magkaramatay. “Tunda ngani ti manga kagamitan Turda Taragbuan daran-un manga magtal-anakan ni Kuhat.

¹⁶ “Si Iliyasar kay anak ni Manug-asiwa Aarun ti may katungkulan sa lana para sa manga sulul-an, sa kamangyan, sa sirang-sirang pag handug bilang pagpasalamat sa kangku hanggan sa lana pamayid. Siya ti mangasikasu sa buu banal pag Turda ag sa tanan manga kagamitan siyun.”

¹⁷ Magkun ti Panginuun sa kanda ni Muysis ag ni Aarun,

¹⁸ “Danga niyu pabay-anan madura ti magtal-anakan ni Kuhat sa manga lahi ni Libi.

¹⁹ Kaindaay kanyu buwatun hampay balaw sida mamatay nu pumakarani sida sa pinakabanal pag manga bagay: Ibahan ni Aarun sida hanggan niya manga anak nu mansulud sida sa Turda, ag sabihan sida nu hintay ti dapat nida buwatun ag nu hintay kanda daran-un.

²⁰ Dahil nu balaw sida ibahan, danga gid sida magsulud una ngalay lang agud bantayan ti banal pag manga bagay, hampay balaw sida mamatay.”

Kay manga Linahi ni Girsun

²¹ Magkun ti Panginuun sa kan Muysis,

²² “Sinsusa ti manga lahi ni Girsun angay sa kanda magtal-anakan.

²³ Iminsan sa sinsus ti tanan lalaki may idad 30 tugka 50 ka timpu may kaya magsirbi sa Turda Taragbuan.

²⁴ “Inda ti manga buruwatun manga lahi ni Girsun ti pagdara manga dararan-un:

²⁵ manga limbun Turda Tiripnan (pag-ingarnan diman Turda Taragbuan), ti tanan pantaklub siyun, ti manga limbun sa sabian,

²⁶ ti manga limbun sa sugkadan masangputan sa Turda hanggan sa harandugan, ti limbun sa sabian sugkadan, ti manga panhigut ag ti tanan manga kagamitan paggamitun sa pagsirbi sa Turda. Sida ti bumuwat tunda pag manga buruwatun may kinalaman sa inda pag manga kagamitan.

²⁷ Si Aarun hanggan kay manga anak ti mandumara sa manga lahi ni Girsun tungkul sa kanda manga buruwatun, mandara man manga kagamitan aw ngatay mamuwat iba manga buruwatun. Kamu ni Aarun ti sumabi nu hintay kanda daran-un.

²⁸ Tunda ngani ti manga buruwatun manga lahi ni Girsun sa Turda Taragbuan. Patigayunun sida ni Itamar kay anak ni manughandug Aarun.”

Kay manga Linahi ni Mirari

²⁹ “Sinsusa diman nimu ti manga lahi ni Mirari angay sa kanda magtal-anakan.

³⁰ Iminsan sa sinsus ti tanan lalaki may idad 30 tugka 50 ka timpu may kaya magsirbi sa Turda Taragbuan.

³¹ Inda kanda manga buruwatun sa Turda Taragbuan: sida ti mandara manga tabla panlingub sa Turda, manga balayan, manga tulduk hanggan manga patakinan.

³² Sida diman ti mandara manga tulduk sad-angan manga limbun sa sugkadan nakapalibut sa Turda. Sida diman ti mandara manga sad-angan, manga patuk, hanggan manga higut. Sida ti bumuwat tanan buruwatun may kinalaman sa inda pag manga garamitun. Kamu ni Aarun ti sumabi sa kada usa sa kanda nu unu kanda daran-un.

³³ Inda ti manga buruwatun manga magtal-anakan ni Mirari sa Turda Taragbuan. Pangunahan sida ni Itamar kay anak ni manughandug Aarun.”

Ti Pagsinsus sa Lahi ni Libi

^34-48 Bilang pagsunud sa sugu Panginuun, sininsus nida ni Muysis ni Aarun hanggan manga takinan Israil ti manga lahi nida ni Kuhat, ni Girsun ag ni Mirari angay sa kada magtal-anakan nida. Sininsus nida ti tanan lalaki may idad 30 tugka 50 ka timpu may kaya magsirbi sa Turda Taragbuan, ag inda kanda bilang: Magtal-anakan Bilang Kuhat 2,750 Girsun 2,630 Mirari 3,200 Kanda kabuuhan bilang 8,580.

Magtal-anakan Bilang

⁴⁹ Angay sa sugu Panginuun sa kan Muysis, binilang ti kada usa sa kanda ag pinatukahan kanya-kanya buruwatun bag-u binilinan nu hintay kanda daran-un.