Bilang 36 - Hanunuu

Ti Nakatanggap Daga pag manga Babayi

¹ Taynguna, ti manga takinan magtal-anakan ni Gilyad anak ni Makir ag laki ni Manasis, anak ni Husi, nag-ati sa kan Muysis hanggan sa manga takinan Israil,

² bag-u magkun, “Duy, kabay nagsugu sa kanmu ti Panginuun tungkul sa paghuray daga hampay manahun manga Israilita sa panab-anan lunggungan, nagsugu diman siya pakan-an ti kada huray nimi patar-ari si Silupihad sa kay manga anak babayi.

³ Dapat nu abi mangasawa sida sa iba pag manga lahi, ti minana nida pag daga miatag sa kanda naasawa pag lahi. Nakan ti kahuray nimi lahi pag daga, miatag yi sa iba.

⁴ Sa pagras-ug Timpu Pagpalpas ag Pag-urulian, kanda daga miatag yi sa lahi nida naasawa, bag-u madura yi inda sa lahi nimi manga ginurang.”

⁵ Nakan angay sa sugu Panginuun, magkun si Muysis sa manga Israilita, “Tutuu ti pagbagawun lahi manga sinulput ni Husi.

⁶ Nakan inda ti pagsabihun Panginuun tungkul sa manga anak babayi ni Silupihad: Mahimu nida asawan-un una si unu kanda pagkaibgan dapat ginan lang sa kanda kalahi.

⁷ Ti daga maranahun kada lahi balaw mahimu miatag sa iba pag manga lahi, dahil kailangan pagsa kanda lang lahi ti minana nida pag daga ginan sa kanda ginurang.

⁸ Ti tanan babayi nakamana daga sa kanda lahi kailangan mag-asawa ginan lang sa kanda pag lahi, hampay balaw madura sa kada Israilita ti minana nida pag daga sa kanda ginurang.

⁹ Ti daga minana kada lahi balaw mahimu miatag sa iba pag lahi, dahil kailangan pagsa kanda lang gid lahi ti minana nida pag daga.”

¹⁰ Nakan sinunud ngani manga anak babayi ni Silupihad ti sinabi Panginuun sa kan Muysis.

¹¹ Kay manga anak babayi ni Silupihad sida ni Mala, ni Tirsa, ni Hugla, ni Milka ag ni Nuwa. Bag-u kanda inasawa baliwa sa pinsan nida ama,

¹² manga lahi ni Manasis anak ni Husi. Nakan kanda minana pag daga asan di sa kanda magtal-anakan hanggan lahi nida ama.

¹³ Tunda ngani ti manga sugu hanggan manga surundanun ipinakaun Panginuun sa manga Israilita sa panab-anan ni Muysis habang ati sida sa karatagan Muab sa saruy Hurdan sa may arani Hiriku.