Bilang 33 - Hanunuu

Ti Linakawan manga Israilita ginan sa Ihiptu Tabug sa Muab

¹ Inda ti manga rugar linakawan manga Israilita katpung nighit kanda manga ginurang ginan sa Ihiptu, sa pagpangulu ni Muysis ag ni Aarun.

² Angay sa sugu Panginuun, ilinista ni Muysis kanda nalakawan pag manga rugar ginan sa kanda gininanan.

³ Ginminan sida sa Ramisis sa ika-15 pag sirang sa un-an pag bulan pagkalawuy Pista Pag-alaala sa Karibrihan. Nagginan sida may matutum pag naisipan madi maghiling ti manga Ihipsiyu

⁴ maglubung sa tanan nida panganay lalaki minatay Panginuun, dahil kay pinarusahan sida sa kanda magsamba sa diyus-diyusan.

⁵ Ginan sa Ramisis nagkampu sida sa Sukut.

⁶ Ginan sa Sukut nagkampu sida sa Itam, sa saruy pangawakawaan.

⁷ Ginan sa Itam, nagbalik sida atag sa Pi Hahirut ati sa butlakan Baal Sipun, ag nagkampu sida arani sa Migdul.

⁸ Ginan sa Pi Hahirut nagdipay sida sa dagat ag nag-atag sa pangawakawaan. Naglakaw sida sa sulud tulu ka sirang sa pangawakawaan Itam, ag nagkampu sida sa Mara.

⁹ Ginan sa Mara, nagkampu sida sa Ilim, sa may 12 ka bulbugan ag 70 ka puun palma.

¹⁰ Ginan sa Ilim, nagkampu sida sa saruy Dagat Marara.

¹¹ Ginan sa Dagat Marara, nagkampu sida sa pangawakawaan Sin.

¹² Ginan sa pangawakawaan Sin, nagkampu sida sa Dupka.

¹³ Ginan sa Dupka, nagkampu sida sa Alus.

¹⁴ Ginan sa Alus, nagkampu sida sa Ripidim, sa unman may mainum danum ti manga tawu.

¹⁵ Ginan sa Ripidim, nagkampu sida sa pangawakawaan Sinai.

^16-36 Inda waya gid ti manga rugar kanda kinampuhan katpung maglakaw sida ginan sa pangawakawaan Sinai atag sa Kadis sa pangawakawaan Sin: Kibrut Hataaba, Hasirut, Ritma, Rimun Paris, Libna, Risa, Kihilata, Bantud Sipir, Harada, Tahat, Makilut, Tira, Mitka, Hasmuna, Musirut, Bini Haakan, Hur Hagidgad, Hutbata, Abruna, Isyun Gibir, ag tugka sa nakaaput sida sa Kadis sa pangawakawaan Sin.

³⁷ Ginan sa Kadis, nagkampu sida sa Bantud Hur, sa katugkaan daga Idum.

^38-39 Sa sugu Panginuun nagtukad si Aarun sa Bantud Hur, ag ati siya pag namatay sa idad 123 ka timpu. Nangyari tunda sa un-an pag sirang sa ikalima pag bulan sa ika-40 pag timpu ginan sa pag-ighit manga Israilita sa Ihiptu.

⁴⁰ Sa tunda pag timpu, ti Kananiyu hari Arad, mag-uli sa Nigib, nakabarita sa pagras-ug nasakupan Israil.

^41-48 Ginan sa Bantud Hur, nagparargu ti manga Israilita sa kanda maglakaw. Inda pag manga rugar kanda kinampuhan: Salmuna, Punun, Ubut, Iyi Abarim, ati sa katugkaan daga Muab, Dibun Gad, Almun Diblataim, sa manga bantud Abarim arani sa Nibu, ag tugka sa nakaaput sida sa karatagan Muab sa saruy Hurdan arani sa Hiriku.

⁴⁹ Nagkampu sida ati sa saruy Hurdan ginan sa Bit Hisimut tugka sa Abil Sitim, sakup diman karatagan Muab.

⁵⁰ Katpung sa kanda magkampu ati sa karatagan Muab, sa saruy Hurdan arani sa Hiriku, naghampang ti Panginuun sa kan Muysis,

⁵¹ “Sabihi ti manga Israilita nu mandipay sida sa Sapa Hurdan atabug sa Kanaan,

⁵² paighita nida ti tanan manga mag-uli ati bag-u dauta ti tanan-tanan nida manga diyus-diyusan binwat ginan sa manga batu, mital, hanggan ti tanan-tanan nida manga simbahan sa abwat pag manga rugar.

⁵³ Sakupa niyu tunda pag daga bag-u ati yi kamu pag-uli, dahil pag-ipakaun yi niku tunda sa kanyu.

⁵⁴ Huray-huraya niyu ti daga angay sa lunggungan, angay sa kayamu kada lahi. Ti mayamu kay lahi ayawi waydi kadaka, ag ti lahi pira-pira ayawi waydi kadiit. Nakan una hintay kanda mabunut imaw yi gid inda kanda kahuray. Sa kainda pag paraan, mahuray nida ti daga sa kada lahi.

⁵⁵ “Dapat nu balaw niyu paighitun ti manga mag-uli ati, ti manga nasawad sa kanda bumaliw pakuri ga paruk sa kanyu manga mata ag ga dugi sa kanyu manga tululnan. Pumakaun ngap sida manga kakurian sa kanyu magpangulian ati.

⁵⁶ Ag buwatun niku sa kanyu ti para mana sa kanda pag parusa.”