Bilang 32 - Hanunuu

Kay manga Linahi sa Butlakan Sapa Hurdan

¹ Ti manga lahi ni Rubin hanggan ni Gad mayamu gid kanda manga hayup. Nakan pagka nakitan nida mayad pag daga ti Hasir hanggan ti Gilyad para sa manga hayup,

² nag-ati sida sa kan Muysis, hanggan sa kan Iliyasar, ag sa manga takinan linahi Israil, bag-u magkun,

³ “Ti Atarut, Dibun, Hasir, Nimra, Hisbun, Ilali, Sibam, Nibu, hanggan Biyun —

⁴ ti manga rugar nasakup Panginuun sa panab-anan manga Israilita — mayad pag rugar para sa manga hayup, ag kami kanyu suruguun mayamu hayup.

⁵ Nakan nu magbaya kamu sa kanmi, ipakaun niyu inda pag manga daga sa kanmi bilang kahuray nimi. Danga yi kami pagtabana atag sa dipay Sapa Hurdan.”

⁶ Magkun si Muysis sa manga lahi ni Gad ag ni Rubin, “Hintay kanyu ibug sabihun, patayak lang aw kamu sitay una kanyu kaparihu manga Israilita atabug sa girahan?

⁷ Pagpalumuyun lang niyu ti manga Israilita atabug sa ipinakaun Panginuun pag daga sa kanda.

⁸ Katida diman ti binwat niyu manga ginurang kaybi pagka ipinadara niku sida tag sa Kadis Barnia hampay usisaun tunda pag daga.

⁹ Pagka rinmas-ug sida sa Luung Iskul, nakitan nida ti daga, pinalumuy nida ti manga Israilita sa pag-ati sa ipinakaun Panginuun pag daga sa kanda.

¹⁰ Subra gid ti pangagalit Panginuun ati katpung pag sirang ag nanumpa siya:

¹¹ ‘Dahil unman sida nagsunud sa kang kagustuhan, unman gid una di usa sa kanda ti ginan sa Ihiptu may idad 20 ginan ka timpu paabwat ti makakit sa itinaratu niku pag daga sa kan Abraham, sa kan Isaak, hanggan sa kan Hakub

¹² purya lang sa kan Kalib anak ni Hipuni usa ka Kiniyu ag sa kan Huswi anak ni Nun, dahil nagsunud sida sa kang kagustuhan.’

¹³ Masyadu gid ti pangagalit Panginuun sa manga Israilita, nakan pinabuyung-buyung niya sida sa pangawakawaan sa sulud upatpulu ka timpu, tugka sa nagkaramatay ti tanan sinulput nagbuwat daut sa kay pamantay.

¹⁴ “Taynguna, kamu pag manga lahi makasalanan ti inmilis sa kanyu manga ginurang, dinugangan waya gid niyu ti pangagalit Panginuun sa manga Israilita.

¹⁵ Nu balaw kamu sumunud sa Panginuun, pabay-anan maan niya kamu pag manga nasakupan sitay sa pangawakawaan, ag kamu ti mabangdanan sa pagkaruris manga Israilita.”

¹⁶ Dapat nagpakarani waya sida sa kan Muysis ag magkun, “Mamwat lang duy kami sitay manga tudir para sa kanmi manga hayup, hanggan manga banwa para sa kanmi manga asawa ag manga anak.

¹⁷ Dapat alistu duy kami manguna sa kanmi kaparihu Israilita sa paggira tugka sa maitibu nimi sida sa kanda manga rugar. Habang maglaban kami, sitay lang kanmi manga asawa hanggan manga anak pag muli sa may alad batu pag manga banwa kanmi ibungsud, agud ribri sida sa manga mag-ulian sa inda pag daga.

¹⁸ Balaw kami muli tugka sa ud maapu tanan Israilita ti maranahun nida pag daga.

¹⁹ Dapat balaw kami mangapu daga maranahun kaibahan nida sa dipay Hurdan. Dahil ti daga sitay sa butlakan baliwa Hurdan imaw ti kanmi manahun.”

²⁰ Magkun si Muysis sa kanda, “Nu katida gid waydi kanyu buwatun sa atubangan Panginuun alistu kamu lumaban,

²¹ ag dumipay kanyu manga sundalu sa Hurdan tugka sa matabug Panginuun kay manga kalaban,

²² ag maapu yi ti daga, mahimu yi kamu makauli sitay tag dahil nabuwat yi niyu kanyu saragtun sa Panginuun ag sa kaparihu niyu Israilita. Ag inda pag daga maapu yi niyu sa atubangan Panginuun.

²³ “Dapat nu balaw katida kanyu buwatun, magkasala kamu sa Panginuun, ag pihu gid bayadan niyu kanyu kasalanan.

²⁴ Hu, pagbungsud kamu manga banwa para sa kanyu asawa ag manga anak, bag-u pagbuwat manga tudir para sa kanyu manga hayup, dapat kailangan niyu tupadun kanyu itinaratu.”

²⁵ Nagsagut ti manga lahi ni Gad ag ni Rubin sa kan Muysis, “Tupadun nimi kanmu manga sugu.

²⁶ Matayak di sitay sa manga banwa Gilyad kanmi manga asawa, manga anak, hanggan manga hayup.

²⁷ Dapat kami ti may kakayahan yi lumaban dumipay tag sa Hurdan hampay manlaban angay sa sugu nimu sa kanmi.”

²⁸ Nakan nagsugu si Muysis sa kan manughandug Iliyasar, sa kan Huswi anak ni Nun, ag sa manga takinan manga linahi Israil.

²⁹ Magkun siya, “Nu handa gid waydi sa atubangan Panginuun ti manga lahi ni Gad ag ni Rubin mandipay sa Hurdan hampay manlaban, ag nu maagaw yi niyu tunda pag daga, ipakaun niyu sa kanda ti daga Gilyad agud kanda maranahun.

³⁰ Dapat nu dayu sida mandipay hampay manlaban kaibahan niyu, kanda manahun pag daga ati diman minsan sa kanyu sa daga Kanaan.”

³¹ Magkun ti manga lahi ni Gad ag ni Rubin, “Tupadun nimi nu hintay ti sinabi Panginuun.

³² Handa kami sa atubangan Panginuun mandipay sa Hurdan atag sa Kanaan hampay manlaban, dapat kanmi maranahun pag daga inda di baliwa sa butlakan sa arani Hurdan.”

³³ Nakan ipinakaun ni Muysis sa manga lahi ni Gad, ni Rubin, ag sa katunga lahi ni Manasis anak Husi, ti kaharian ni Sihun, hari manga Amuriyu, hanggan ti kaharian ni Ug, hari sa Basan — ti kabuuhan daga hanggan ti manga banwa ag manga rugar sa kay sangput siyun.

³⁴ Ibinungsud maan lahi ni Gad ti Dibun, Atarut, Aruwir,

³⁵ Atrut, Supan, Hasir, Hugbiha,

³⁶ Bit Nimra ag Bit Haran. Inda pag manga banwa sinangput nida alad batu. Nagbuwat diman sida manga tudir sa kanda manga hayup.

³⁷ Ag ipinatindug maan manga lahi ni Rubin ti Hisbun, ti Ilali ag ti Kiryataim

³⁸ hanggan ti manga rugar pag-ingarnan kaybi Nibu, Baal Miyun, ag Sibma. Inilisan nida kay manga ngaran ti banwa kanda ipinatindug.

³⁹ Ginira manga lahi ni Makir anak ni Manasis ti Gilyad, ag naagaw nida inda, bag-u tinabug nida ti manga Amuriyu mag-ulian ati.

⁴⁰ Nakan ipinakaun ni Muysis ti Gilyad sa manga lahi ni Makir, manga lahi diman ni Manasis, ag ati sida pag nangulian.

⁴¹ Si Hair lahi diman ni Manasis, nakaagaw diman siya manga baryu sa Gilyad ag iningarnan niya inda “Manga Banwa ni Hair.”

⁴² Naagaw ni Nuba ti Kinat hanggan ti manga baryu sa kay sangput siyun ag iningarnan niya inda “Nuba” angay sa kay ngaran.