Bilang 31 - Hanunuu

Ti Paglaban manga Israilita sa manga Midyanita

¹ Magkun ti Panginuun sa kan Muysis,

² “Balusi ti manga Midyanita sa kanda binwat sa manga Israilita. Nu mabwat yi nimu inda, mamatay yi kawu miminsan sa kanmu manga ginurang nagkaramatay yi.”

³ Nakan magkun si Muysis sa manga tawu, “Pag-alistu ti iba sa kanyu hampay sa paglaban sa manga Midyanita dahil gustu Panginuun balusan nita sida.

⁴ Ti kada lahi pagpadara tig 1,000 tawu sa girahan.”

⁵ Nakan 12,000 tawu ginan sa 12 ka linahi Israil ti nag-alistu hampay lumaban.

⁶ Ipinadara ni Muysis sida tag sa labanan, 1,000 ginan sa kada lahi, pagpangunahan ni Piniis anak ni manughandug Iliyasar. Nandara si Piniis manga kagamitan ginan sa Balay Diyus hanggan manga turumpita hampay pamasandam.

⁷ Ginira nida ti manga Midyanita, angay sa isinugu Panginuun sa kan Muysis ag pinanmatay nida ti tanan lalaki.

⁸ Kaibahan sa minatay nida ti lima ka hari Midyan sida ni Ibi, ni Rikim, ni Sur, ni Hur, ag ni Riba. Minatay diman nida si Balaam kay anak ni Biyur sa panab-anan baladaw.

⁹ Binihag nida ti manga babayi hanggan ti manga anak Midyanita, ag pinanbuul nida kanda manga hayup hanggan manga kasiyunan.

¹⁰ Inirub nida ti tanan banwa hanggan ti tanan kampu manga Midyanita.

¹¹ Dinara nida ti tanan nida naagaw, una tawu hanggan manga hayup,

¹² tag sa kan Muysis hanggan sa kan manughandug Iliyasar, ag sa nasakupan Israil ati sa kanda kampu sa karatagan Muab, sa saruy Hurdan sa may arani Hiriku.

¹³ Sinulang sida nida ni Muysis, ni manughandug Iliyasar, hanggan manga takinan manga nasakupan Israil ati sa luwas kampu.

¹⁴ Nangisug si Muysis sa takinan manga sundalu ginan sa labanan.

¹⁵ Magkun si Muysis sa kanda, “Hayga unman niyu minatay ti manga babayi?

¹⁶ Sida ti sinmunud sa tudlu ni Balaam sa paggarya sa manga Israilita tungkul sa maglaban sa Panginuun ati sa Piyur, nakan rinmas-ug ti sarut sa manga nasakupan Panginuun.

¹⁷ Nakan panmatya niyu ti tanan pag anak lalaki hanggan ti tanan naulid yi pag manga babayi.

¹⁸ Dapat pablagan niyu para sa kanyu ti manga babayi balaw waya naulid.

¹⁹ Ti tanan sa kanyu nakaigpil sa namatay kailangan pagpatayak sa luwas kampu sa sulud pitu ka sirang. Sa ikatlu ag sa ikapitu pag sirang, kailangan paglumpiyu kamu hanggan kanyu manga bihag.

²⁰ Pipii niyu ti tanan niyu manga rutay, hanggan ti tanan niyu manga kagamitan buwat sa paknul aw ngatay sa bulbul kambing ngatay kayu.”

²¹ Bag-u magkun si Manug-asiwa Iliyasar sa manga sundalu nakaati sa labanan, “Inda ti surundanun pag kasuguan ti ipinakaun Panginuun sa kan Muysis:

^22-23 Una hintay pag bagay ti balaw magkairub parihu sa gintu, pilak, galang, baul, aw ngatay timga kailangan gid niyu isawug sa apuy, hampay malumpiyu inda. Bag-u ugasi inda sa danum garamitun panlumpiyu. Una hintay ti unman magkairub ugasi lang sa inda pag danum.

²⁴ Sa ikapitu pag sirang, kailangan pipian niyu kanyu manga rutay, ag malumpiyu yi kamu, mahimu yi makaslud sa kampu.”

Ti Paghuray-huray manga Inagaw

²⁵ Magkun ti Panginuun sa kan Muysis,

²⁶ “Bilanga niyu ni manughandug Iliyasar kaibahan ti manga takinan kada magtal-anakan nasakupan ti tanan manga tawu hanggan hayup kanyu nabihag.

²⁷ Huraya niyu inda tag sa manga sundalu naglaban hanggan tag sa nasakupan Israil.

²⁸ Ginan sa huray manga sundalu, pagbuul kawu para sa Panginuun tig usa sa kada 500 ka manga nabihag, tawu man ngatay baka, una asnu ngatay karanidu, una kambing.

²⁹ Pakan-an tunda sa kan manughandug Iliyasar bilang kahuray Panginuun.

³⁰ Ginan sa huray manga Israilita, pagbuul kawu tigus-a sa kada 50 ka nabihag, tawu man ngatay baka, una asnu ngatay karanidu, una kambing ag iba waya pag manga hayup. Pakan-an niyu tunda sa manga Libita dahil sida ti manug-asikasu sa pagbantay sa Turda Panginuun.”

³¹ Nakan binwat nida ni Muysis ni manughandug Iliyasar ti isinugu Panginuun sa kan Muysis.

^32-35 Inda ti nab-ul manga sundalu sa labanan: 675,000 karanidu, 72,000 baka, 61,000 asnu, ag 32,000 babayi balaw waya naulid.

^36-40 Inda ti katunga huray manga sundalu naglaban: 337,500 karanidu kay 675 tunda ipinakaun tabug sa Panginuun; 36,000 baka kay 72 tunda ipinakaun tabug sa Panginuun; 30,500 ka asnu kay 61 tunda ipinakaun tag sa Panginuun, bag-u 16,000 ka daraga kay 32 tunda ipinakaun tag sa Panginuun.

⁴¹ Ipinakaun ni Muysis sa kan manughandug Iliyasar ti kabahagi Panginuun angay sa pag-isugu Panginuun sa kanya.

^42-46 Imaw inda ti kabahagi manga Israilita ipinakaun sa kanda ni Muysis, ti katunga pag bahagi manga sundalu naglaban: 337,500 ka karanidu, 36,000 baka, 30,500 ka asnu, ag 16,000 ka tawu.

⁴⁷ Ginan sa siti pag kabahagi manga Israilita, nagbuul si Muysis usa sa kada 50 ka tawu ngatay hayup angay sa pag-isugu Panginuun sa kanya. Ag ipinakaun niya inda sa manga Libita imaw ti may katungkulan mag-asikasu sa Turda Panginuun.

⁴⁸ Bag-u nag-ati sa kan Muysis ti manga takinan manga sundalu

⁴⁹ ag magkun sa kanya, “Binilang nimi kanmi sakup pag manga sundalu ag unman gid may nadura una lang usa.

⁵⁰ Nakan ipinakaun nimi sa Panginuun ti manga gintu pag manga kayamanan kanmi nab-ul sa girahan — manga ugsung, manga singsing, manga kulintas, ag manga aritus, hampay malukat kanmi buhi sa Panginuun.”

⁵¹ Tinanggap ni Muysis ag ni Iliyasar inda tanan pag gintu manga pamarinu.

⁵² Kay kabuyat tunda pag manga gintu dinara manga takinan ag ihinandug nida ni Muysis ni Iliyasar sa Panginuun manga 200 ka kilu.

⁵³ Ginan inda sa manga nab-ul kada sundalu sa labanan.

⁵⁴ Pagka natanggap ni Muysis ag ni Iliyasar ti manga gintu ginan sa manga takinan, dinara nida inda sa Turda Taragbuan hampay alalahanun Panginuun ti manga Israilita.