Bilang 30 - Hanunuu

Ti manga Surundanun sa Taratu

¹ Magkun si Muysis sa manga takinan linahi Israil, “Inda ti sugu Panginuun:

² Nu ti usa ka lalaki manaratu ngatay manumpa sa Panginuun, danga niya pagdauta kay taratu. Kailangan tupadun ti kada binagaw niya.

³ “Nu ti usa ka daraga mag-uli waya sa balay niya ama manaratu ngatay manumpa sa Panginuun,

⁴ sa mag-adnugan niya ama bag-u balaw siya inampara, kailangan tupadun niya tunda.

⁵ Dapat nu inampara niya ama pagka naalaman niya tunda, balaw kailangan tupadun niya. Patawadun di siya Panginuun dahil inmampara kay ama.

⁶ “Nu ti usa ka daraga manaratu ngatay manumpa buwatun niya ngatay unman ti usa ka bagay, bag-u nangasawa siya, una nadaldalian lang ngatay unman kay nanaratu,

⁷ ag naalaman inda niya asawa dapat balaw nag-ampara, kailangan gid tupadun di niya kay taratu.

⁸ Dapat nu nag-ampara sa kanya kay asawa pagka naalaman niya tunda, balaw kailangan tupadun niya, una waya nadaldalian ngatay unman, ag patawadun di siya Panginuun.

⁹ “Nu ti usa ka babayi buranday ngatay tinayakan niya asawa mantaratu ngatay manumpa buwatun niya ngatay unman ti usa ka bagay, kailangan gid tupadun niya inda.

¹⁰ “Nu ti usa ka babayi may asawa manataratu ngatay manumpa buwatun niya ngatay unman ti usa ka bagay,

¹¹ ag naalaman inda niya asawa dapat unman may iningay ag balaw nag-ampara, kailangan tupadun di niya tunda.

¹² Dapat nu umampara kay asawa pagka naalaman tunda, balaw yi niya kailangan tupadun. Patawadun di siya Panginuun dahil inmampara kay asawa.

¹³ Kay asawa may karampatan magpasnu ngatay mag-ampara sa una hintay pag itinaratu niya ngatay isinumpa.

¹⁴ Dapat nu balaw nag-ampara kay asawa sa tunda gid ngap pag sirang pagka naalaman niya tunda, pasnu kay asawa tupadun niya.

¹⁵ Dapat nu pinalawuy waya niya asawa ti manga pira ka sirang bag-u di nag-ampara, kay asawa ti parusahan sa kay kasalanan.”

¹⁶ Tunda ngani pag manga surundanun ti ipinakaun Panginuun sa kan Muysis tungkul sa babayi ag sa kay asawa, sa ama ag sa kay anak babayi sunu waya sa kay balay.