Bilang 3 - Hanunuu

Kay manga Lahi ni Libi

¹ Inda ti tultulanun magtal-anakan nida ni Aarun ag ni Muysis katpung naghampang ti Panginuun sa kan Muysis ati sa Bantud sa Sinai.

² Kay manga anak ni Aarun sida ni Nadab, ni Abihu, ni Iliyasar ag ni Itamar. Si Nadab ti panganay.

³ Pinili sida ag itinalaga sa pagsirbi bilang manga manughandug.

⁴ Dapat sida ni Nadab ni Abihu namatay sa atubangan Panginuun pagka naggamit sida apuy balaw paggamitun sa paghandug sa Panginuun ati sa pangawakawaan Sinai. Namatay sida unman may anak, nakan sida ni Iliyasar ni Itamar lang ti nagsirbi bilang manga manughandug habang buhi si Aarun.

⁵ Magkun ti Panginuun sa kan Muysis,

⁶ “Paataytaga ti lahi ni Libi, daran-a sida sa manughandug, sa kan Aarun hampay mangawat sa kanya.

⁷ Mansirbi sida sa kan Aarun ag sa nasakupan Israil sa panab-anan pag-asikasu sa manga buruwatun sa Turda Tiripnan pag-ingarnan diman Turda Taragbuan.

⁸ Sida diman ti mangalaga sa tanan kagamitan sa Turda, ag mansirbi sa Turda para sa manga Israilita.

⁹ Intirgahan ti lahi ni Libi sa kan Aarun ag sa kay manga anak lalaki hampay mangawat sa kanda.

¹⁰ Si Aarun ag kay manga anak ti pilia nimu mansirbi bilang manga manughandug. Una si unu ti bumuwat sa manga buruwatun manughandug sa Turda bukun lahi ni Libi panmatyun.”

¹¹ Magkun waya ti Panginuun sa kan Muysis,

¹² “Pinili niku ti lahi ni Libi bilang kailis sa manga panganay lalaki taga Israil. Kangku ti tanan lahi ni Libi,

¹³ dahil kangku ti manga panganay. Pagka pinanmatay niku ti tanan panganay lalaki manga Ihipsiyu, ipinablag niku para sa kangku ti tanan panganay lalaki Israilita, tawu man ngatay hayup. Nakan kangku sida. Aku ti Panginuun.”

¹⁴ Magkun ti Panginuun sa kan Muysis ati sa pangawakawaan Sinai,

¹⁵ “Bilanga nimu ti manga lalaki lahi ni Libi ginan sa idad usa ka bulan paabwat, angay sa kanda magtal-anakan.”

¹⁶ Nakan binilang ngani sida ni Muysis, angay sa pag-isugu Panginuun sa kanya.

¹⁷ Inda kay manga anak ni Libi: sida ni Girsun, ni Kuhat ag ni Mirari.

¹⁸ Kay manga anak ni Girsun sida ni Libni ni Simaya.

¹⁹ Kay manga anak ni Kuhat sida ni Amram, ni Isar, ni Hibrun ag ni Usyil.

²⁰ Kay manga anak ni Mirari sida ni Mali ni Musi. Sida ti manga lahi ni Libi, angay sa kanda magtal-anakan.

²¹ Kay manga lahi ni Girsun ti manga magtal-anakan ginan sa kanda ni Libni ag ni Simaya.

²² Ti bilang nida tanan lalaki ginan usa ka bulan kay idad paabwat 7,500.

²³ Kanda pagkampuhan pag rugar ati sa dayu Turda Tiripnan sa isalpan baliwa.

²⁴ Kanda takinan si Iliyasap kay anak ni Lail.

²⁵ Sida ti pinakan-an katungkulan mag-asikasu sa inda pag manga kagamitan sa Turda Taragbuan: ti manga panaklub, ti limbun sabian Turda,

²⁶ ti manga limbun sugkadan sangput sa Turda hanggan sa harandugan, hanggan ti limbun sa sabian sugkadan, ag ti manga higut. Sida ti may katungkulan sa tanan manga buruwatun may kinalaman sa tunda pag manga kagamitan.

²⁷ Kay manga lahi ni Kuhat ti manga magtal-anakan ginan sa kanda ni Amram, ni Isar, ni Hibrun ag ni Usyil.

²⁸ Ti bilang tanan nida lalaki ginan usa ka bulan kay idad paabwat 8,600. Pinakan-an sida katungkulan asikasuhun ti banal pag Turda.

²⁹ Ti rugar nida pagkampuhan baliwa sa kanaway Turda.

³⁰ Kanda takinan si Ilsapan kay anak ni Usyil.

³¹ Sida ti may katungkulan mag-asikasu sa Kaban Kasunduan, sa lamisa, sa burugtangan sulul-an, sa harandugan, sa manga kagamitan paggamitun manga manughandug sa kanda magsirbi hanggan sa limbun. Sida ti may katungkulan sa tanan manga buruwatun may kinalaman sa tunda pag manga kagamitan.

³² Ti takinan manga lahi ni Libi, si Iliyasar kay anak ni Aarun manughandug. Siya ti pinili mamahala sa manga pinakan-an katungkulan mag-asikasu sa banal pag Turda.

³³ Kay manga lahi ni Mirari ti manga magtal-anakan ginan sa kanda ni Mali ag ni Musi.

³⁴ Ti bilang nida manga lalaki ginan sa usa ka bulan kay idad paabwat 6,200.

³⁵ Kanda takinan si Suryil kay anak ni Abihail. Sa may salatan baliwa Turda Tiripnan kanda pagkampuhan pag rugar.

³⁶ Sida ti pinakan-an katungkulan sa pag-asikasu sa manga tabla panlingub sa Turda, manga balayan, manga tulduk hanggan manga patakinan. Sida ti may katungkulan sa tanan manga buruwatun may kinalaman sa tunda pag manga kagamitan.

³⁷ Sida diman ti pinakan-an katungkulan sa pag-asikasu manga tulduk sa sangput sugkadan hanggan kay manga patakinan, kaibahan yi ti manga pamatuk hanggan kay manga higut.

³⁸ Ti rugar pagkampuhan nida ni Muysis ni Aarun hanggan kay manga anak ati sa may atubangan Turda Taragbuan, baliwa sa may butlakan. Sida ti pinakan-an katungkulan hampay pamahalaan ti manga buruwatun sa Turda para sa manga Israilita. Una si unu ti bumuwat manga buruwatun manughandug sa Turda balaw lahi ni Libi panmatyun.

³⁹ Ti kabuuhan bilang manga lalaki ginan sa lahi ni Libi ginan sa usa ka bulan paabwat 22,000 tanan. Sida ni Muysis ni Aarun ti nagbilang sa kanda, angay sa sugu Panginuun.

⁴⁰ Magkun ti Panginuun sa kan Muysis, “Bilanga nimu ag listahan ti manga ngaran tanan panganay lalaki manga Israilita, ginan sa idad usa ka bulan paabwat.

⁴¹ Italaga sa kangku ti manga lahi ni Libi kailis tanan panganay lalaki manga Israilita. Handugan diman sa kangku ti manga hayup manga lahi ni Libi kailis tanan panganay hayup manga Israilita. Aku ti Panginuun.”

^42-43 Nakan binilang ni Muysis ti tanan panganay lalaki manga Israilita may idad usa ka bulan paabwat, angay sa sugu Panginuun sa kanya. Kanda bilang 22,273.

⁴⁴ Magkun ti Panginuun sa kan Muysis,

⁴⁵ “Italaga sa kangku ti manga lahi ni Libi kailis manga panganay lalaki manga Israilita. Handugan diman sa kangku ti manga hayup manga lahi ni Libi kailis manga panganay hayup manga Israilita. Kangku ti manga lahi ni Libi. Aku ti Panginuun.

⁴⁶ Ag dahil subra 273 ti panganay lalaki manga Israilita sa manga lahi ni Libi, kailangan lukatun sida.

⁴⁷ Ti ibayad sa paglukat sa kada usa sa kanda lima ka bilug pilak angay sa buyat pilak sa timbangan paggamitun manga manughandug.

⁴⁸ Pakan-an nimu sa kan Aarun hanggan sa kay manga anak lalaki ti kuwarta ilinukat sa subra bilang manga panganay.”

⁴⁹ Nakan bin-ul ni Muysis ti kuwarta ipinanlukat sa manga panganay anak manga Israilita subra sa bilang manga lahi ni Libi.

⁵⁰ Kay nab-ul 1,365 ka bilug pilak, angay sa buyat pilak sa timbangan paggamitun manga manughandug.

⁵¹ Ag ipinakaun niya inda sa kan Aarun hanggan sa kay manga anak lalaki angay sa sugu Panginuun sa kanya.