Bilang 28 - Hanunuu

Ti Handug sa Sirang-sirang

¹ Magkun ti Panginuun sa kan Muysis,

² “Sabiha sa manga Israilita kailangan manhandug sida sa kangku manga handug sa panab-anan apuy sa nakatagka pag udas. Inda pag manga handug imaw kang pinagka karan-unun, kay hungaw tunda makapasulung sa kangku. Nakan sabiha inda sa manga Israilita:

³ Inda ti handug sa panab-anan apuy kanyu ihandug sa Panginuun sirang-sirang: duwa ka karanidu usa ka timpu kay idad ag unman may alangan.

⁴ Kay usa ka handug pansurip ag kay usa sa mag-isalup init,

⁵ kaibahan handug pagdayaw sa Panginuun ti duwa ka kilu mayad pag arina linakayan usa ka litru lana ulibu.

⁶ Inda ti handug pagsunugun sirang-sirang, ti pag-isugu Panginuun kaybi sa kanyu ati sa Bantud Sinai. Kay hungaw tunda pag handug sa panab-anan apuy makapasulung gid sa Panginuun.

⁷ Ti handug irinmun iminsan sa kada karanidu, usa ka litru intus ag ibuhus sa banal pag rugar para sa Panginuun.

⁸ Katunda diman kanyu buwatun sa ikadwa pag karanidu kanyu ihandug sa mag-isalup init. Lakayan diman niyu inda usa ka handug pagdayaw sa Panginuun hanggan handug irinmun. Inda handug sa panab-anan apuy, kay hungaw makapasulung gid sa Panginuun.

Ti manga Handug sa Sirang Pamahari

⁹ “Sa Sirang Pamahari, paghandug kamu duwa ka karanidu usa ka timpu kay idad ag unman may alangan, kaibahan ti handug irinmun hanggan ti handug pagdayaw sa Panginuun upat ka kilu mayad pag arina may lakay lana.

¹⁰ Inda ti handug pagsunugun kada Sirang Pamahari, tuhay waya ti sa sirang-sirang pag handug minsan sa kanyu handug irinmun.

Ti Binulan pag Handug

¹¹ “Sa kada un-an pag sirang bulan, paghandug kamu sa Panginuun handug pagsunugun. Kanyu ihandug duwa ka turiti baka, usa ka tudu karanidu ag pitu ka bilug turiti karanidu. Inda tanan kailangan unman may alangan.

^12-13 Lakayan niyu inda handug pagdayaw sa Panginuun marinu pag kalasi arina may lakay lana — unum ka kilu sa kada turiti baka, upat ka kilu sa tudu karanidu, ag duwa ka kilu arina sa kada turiti karanidu. Handug inda pagsunugun, kay hungaw makapasulung gid sa Panginuun.

¹⁴ Ti kada turiti baka may kaibahan handug irinmun duwa ka litru. Ti tudu karanidu paibahan usa may tunga ka litru intus. Ag ti kada turiti karanidu paibahan usa ka litru irinmun. Inda ti binulan pag handug pagsunugun kanyu buwatun sa kada umpisa pag sirang kada bulan sa buu timpu.

¹⁵ Paghandug waya kamu sa Panginuun usa ka lalaki kambing bilang handug sa paglumpiyu kasalanan. Buwatun niyu inda tuhay di sa pansirang-sirang pag handug pagsunugun hanggan sa handug irinmun.

Ti manga Panagda sa Udas Kapistahan

¹⁶ “Tupada niyu ti Pista Pag-alaala sa Karibrihan sa ika-14 pag sirang sa un-an pag bulan.

¹⁷ Sa ika-15 pag sirang umumpisa ti pitu ka sirang pag pista. Ag sa sulud pitu ka sirang kailangan kanyu kan-un pag tinapay, unman may pamadaka.

¹⁸ Sa un-an pag sirang sa tunda pag pista, danga kamu magtarabahu nu unman pagtiripun kamu pagsamba sa Panginuun.

¹⁹ Paghandug kamu sa Panginuun handug pagsunugun duwa ka turiti baka, usa ka tudu karanidu ag pitu ka turiti karanidu. Inda tanan kailangan unman may alangan.

²⁰ Lakayi niyu inda mayad pag arina may lakay lana — unum ka kilu arina sa kada turiti baka, ag upat ka kilu arina sa tudu karanidu

²¹ bag-u duwa ka kilu arina sa kada turiti karanidu.

²² Paghandug diman kamu usa ka lalaki kambing bilang handug sa paglumpiyu hampay mapatawad kanyu manga kasalanan.

²³ Ihandug niyu inda pag manga handug tuhay waya sa pansirang-sirang pag handug pagsunugun kada surip.

²⁴ Sa katunda pag paraan ihandug niyu inda pag manga handug sa panab-anan apuy bilang karan-unun Panginuun. Buwata niyu inda sirang-sirang sa sulud pitu ka sirang. Kay hungaw tunda pag manga handug makapasulung gid sa Panginuun. Ihandug niyu inda tuhay di sa pansirang-sirang pag handug pagsunugun ag sa handug irinmun.

²⁵ Sa ikapitu pag sirang, danga kamu magtarabahu nu unman pagtiripun kamu pagsamba sa Panginuun.

Ti Handug sa Pista Tig-arani

²⁶ “Sa un-an pag sirang Pista Tig-arani, sa udas manhandug kamu sa Panginuun manga bag-u pag uyas, danga kamu magtarabahu nu unman pagtiripun kamu pagsamba sa Panginuun.

²⁷ Paghandug kamu handug pagsunugun: duwa ka turiti baka, usa ka tudu karanidu ag pitu ka turiti karanidu. Kay hungaw tunda pag handug makapasulung gid sa Panginuun.

²⁸ Paibahan niyu inda handug pasalamat mayad pag arina may lakay lana ulibu — unum ka kilu arina sa kada turiti baka, upat ka kilu arina sa tudu karanidu,

²⁹ ag duwa ka kilu arina sa kada turiti karanidu.

³⁰ Paghandug diman kamu usa ka lalaki kambing hampay sa kapatawadan niyu manga kasalanan.

³¹ Ihandug niyu inda kaibahan ti manga handug irinmun, tuhay di ti pansirang-sirang pag handug pagsunugun hanggan tunda pag handug bilang pagdayaw sa Panginuun. Kailangan tunda pag manga hayup unman may alangan.