Bilang 26 - Hanunuu

Ti Pangadwa pag Sinsus

¹ Pagkalawuy sarut, magkun ti Panginuun sa kan Muysis hanggan sa kan Iliyasar anak ni manughandug Aarun,

² “Sinsusa niyu ti buu nasakupan Israil angay sa kanda magtal-anakan — tanan may idad 20 ka timpu paabwat may kakayahan sumirbi bilang sundalu Israil.”

³ Nakan napakihampang si Muysis hanggan si Manug-asiwa Iliyasar sa manga Israilita ati sa karatagan Muab sa saruy Sapa Hurdan arani sa Hiriku.

⁴ Magkun sida sa kanda, “Sinsusa niyu ti manga tawu may idad 20 ka timpu paabwat, angay sa pag-isugu Panginuun sa kan Muysis.” Inda pag manga Israilita ti nagluwas ginan sa Ihiptu:

⁵ Sa manga lahi ni Rubin, panganay pag anak ni Hakub, ti magtal-anakan nida ni Hanuk, ni Palu,

⁶ ni Hisrun, ag ni Karmi.

⁷ Sida pag manga magtal-anakan ti ginan sa kan Rubin; 43,730 sida tanan.

⁸ Kay anak ni Palu si Ilyab,

⁹ ag kay manga anak ni Ilyab sida ni Nimwil, ni Datan, ag ni Abiram. Inda sida ni Datan ni Abiram imaw ti takinan kadamlan napakampi sa kan Kura sa paglaban sa Panginuun sa paglaban sa kanda ni Muysis ag ni Aarun.

¹⁰ Dapat nilbung sida buhi tag basad daga kaibahan ni Kura ag nairub apuy kay 250 niya ka kaibahan. Ag inda pag nangyari imaw ti paandam sa manga Israilita.

¹¹ Dapat kay manga anak ni Kura ud may namatay.

¹² Kay manga lahi ni Simyun ti manga magtal-anakan nida ni Nimwil, ni Hamin, ni Hakin,

¹³ ni Sira, ag ni Shaul.

¹⁴ Sida pag manga magtal-anakan ti ginan sa kan Simyun; 22,200 sida tanan.

¹⁵ Kay manga lahi ni Gad ti manga magtal-anakan nida ni Sipun, ni Hagi, ni Suni,

¹⁶ ni Usni, ni Iri,

¹⁷ ni Arud ag ni Arili.

¹⁸ Sida ti manga magtal-anakan ginan sa kan Gad; 40,500 sida tanan.

^19-20 Si Huda may duwa ka anak lalaki sida ni Ir ni Unan, imaw ti namatay sa daga Kanaan. Dapat may manga lahi waya gid si Huda imaw ti magtal-anakan ni Sila, ni Paris, ag ni Sira.

²¹ Kay manga lahi ni Paris ti magtal-anakan ni Hisrun ag ni Hamul.

²² Sida ti magtal-anakan ginan sa kan Huda; 76,500 sida tanan.

²³ Kay lahi ni Isakar ti manga magtal-anakan ni Tula, ni Puwa,

²⁴ ni Hasub ag ni Simrun.

²⁵ Sida ti magtal-anakan ginan sa kan Isakar; 64,300 sida tanan.

²⁶ Kay manga lahi ni Sabulun ti manga magtal-anakan ni Sirid, ni Ilun, ag ni Halil.

²⁷ Sida ti magtal-anakan ginan sa kan Sabulun; 60,500 sida tanan.

²⁸ Kay manga lahi ni Husi ginan sa duwa niya ka anak si Manasis ag si Ipraim.

²⁹ Kay manga lahi ni Manasis ti manga magtal-anakan ni Makir hanggan kay anak si Gilyad.

³⁰ Kay manga lahi ni Gilyad ti manga magtal-anakan ni Iyisir, ni Hilik,

³¹ ni Asriyil, ni Sikim,

³² ni Simida ag ni Hipir.

³³ Kay anak ni Hipir si Silupihad unman may anak lalaki, dapat may manga anak siya babayi kanda manga ngaran sida ni Mala, ni Nuwa, ni Hugla, ni Milka ag ni Tirsa.

³⁴ Sida ti manga magtal-anakan ginan sa kan Manasis; 52,700 sida tanan.

³⁵ Kay manga lahi ni Ipraim ti manga magtal-anakan ni Sutila, ni Bikir, ni Tahan,

³⁶ ag kay anak ni Sutila si Iran.

³⁷ Sida ti manga magtal-anakan ginan sa kan Ipraim; 32,500 sida tanan. Inda pag manga magtal-anakan ti ginan sa kan Manasis hanggan sa kan Ipraim pag manga lahi ni Husi.

³⁸ Kay manga lahi ni Binhamin ti manga magtal-anakan ni Bila, ni Asbil, ni Ahiram,

³⁹ ni Supam, ag ni Hupam.

⁴⁰ Kay manga lahi ni Bila ti manga magtal-anakan ni Ard ag ni Naaman.

⁴¹ Sida ti magtal-anakan ginan sa kan Binhamin; 45,600 sida tanan.

⁴² Kay lahi ni Dan ti magtal-anakan ni Suham.

⁴³ Ti tanan lahi ni Dan ti manga Suhamita; 64,400 sida tanan.

⁴⁴ Kay lahi ni Asir ti manga magtal-anakan ni Imna, ni Isbi ag ni Birya.

⁴⁵ Kay lahi ni Birya ti manga magtal-anakan ni Hibir ag ni Malkiyil.

⁴⁶ (May anak babayi si Asir kay ngaran si Sira.)

⁴⁷ Sida ti magtal-anakan ginan sa kan Asir; 53,400 sida tanan.

⁴⁸ Kay lahi ni Niptali ti manga magtal-anakan ni Hasiil, ni Guni,

⁴⁹ ni Hisir ag ni Silim.

⁵⁰ Sida ti manga magtal-anakan ginan sa kan Niptali; 45,400 sida tanan.

⁵¹ Nakan ti kabuuhan bilang manga lalaki Israilita sininsus 601,730.

⁵² Bag-u magkun ti Panginuun sa kan Muysis,

⁵³ “Huraya nimu sa kanda ti daga bilang kanda mana angay sa kayamuun kada lahi.

⁵⁴ Ti mayamu pag lahi, ayawi ka daka, ag ti pira-pira pag lahi ayawi una lang diit.

^55-56 Kailangan manlunggungan nu naan pag bahagi ti mab-ul manga mayamu pag lahi ag pira-pira pag lahi angay sa sinsus.”

⁵⁷ Kay lahi ni Libi ti manga magtal-anakan ni Girsun, ni Kuhat ag ni Mirari.

⁵⁸ Ag ginan sa kanda ti manga magtal-anakan ni Libni, ni Hibrun, ni Mali, ni Musi ag ni Kura. Si Kuhat kay panganay ni Amram;

⁵⁹ bag-u kay asawa ni Amram si Hukabid lahi diman ni Libi. Ati pag-inanak si Hukabid sa Ihiptu. Sida ni Amram ni Hukabid kay gurang nida ni Aarun, ni Muysis ag ni Miryam.

⁶⁰ Si Aarun kay ama nida ni Nadab, ni Abihu, ni Iliyasar ag ni Itamar.

⁶¹ Dapat ay namatay sida ni Nadab ni Abihu katpung ginmamit sida apuy balaw dapat nida gamitun sa kanda maghandug sa Panginuun.

⁶² 23,000 ti kayamuan pag manga lalaki lahi ni Libi may idad usa ka bulan paabwat. Balaw sida imininsan sa kabuuhan kayamuan Israilita dahil unman sida may tinanggap daga minana manga Israilita.

⁶³ Tunda ngani ti tanan Israilita sininsus ni Muysis hanggan ni manughandug Iliyasar ati sa karatagan Muab sa saruy Hurdan arani sa Hiriku.

⁶⁴ Unman yi gid may nasawad buhi ginan sa manga niamut sa un-an pag sinsus binwat ni Muysis hanggan ni Aarun ati sa pangawakawaan Sinai.

⁶⁵ Nakan naghampang ati katpung ti Panginuun sa kanda pihu gid mamatay sida ati sa pangawakawaan, ag unman gid may lumuwas sa kanda purya lang sa kan Kalib imaw ti anak ni Hipuni ag sa kan Huswi kay anak ni Nun.