Bilang 25 - Hanunuu

Nansamba ti manga Israilita sa kan Baal

¹ Katpung makampuhan ti manga Israilita sa Sitim, ti manga lalaki nag-umpisa nangululid sa manga babayi Muabita.

² Ginarya sida manga babayi manhandug sa kanda manga diyus-diyusan, nangaun sida sa tunda pag manga handug ag nansamba sa tunda pag manga diyus-diyusan.

³ Nakan ti manga Israilita nadara nansamba sa kan Baal Piyur. Nakan masyadu gid nagalit ti Panginuun sa kanda.

⁴ Magkun ti Panginuun sa kan Muysis, “Bul-a ti tanan takinan sa tunda pag manga tawu, ag matya sida sa kang atubangan sa paghilingan manga tawu, hampay madura kang masyadu pag pangagalit sa Israil.”

⁵ Nakan magkun si Muysis sa manga manughusay sa Israil, “Kailangan matyun niyu kanyu manga kaibahan magsamba sa kan Baal Piyur.”

⁶ Bag-u may usa ka Israilita nagtaban babayi Midyanita tag sa kay magtal-anakan. Maghiling si Muysis hanggan ti buu kadamlan Israil habang mag-amiraw sida siyun sa may sabian Turda Taragbuan.

⁷ Pagka nakitan ni Piniis anak ni Iliyasar laki ni manughandug Aarun, ginminan siya ginan sa kadamlan ag nagbuul bangkaw.

⁸ Inusig niya ti tawu atag sa sulud turda, ag tinuhug niya bangkaw sida duwa. Bag-u di nag-apas ti sarut sa Israil,

⁹ dapat 24,000 ti namatay dahil sa sarut.

¹⁰ Magkun ti Diyus sa kan Muysis,

¹¹ “Bin-ul ni Piniis anak ni Iliyasar laki ni manughandug Aarun ti pangagalit niku sa manga Israilita, dahil parihu siya sa kangku magkagalit gid sa kasalanan. Nakan unman niku tinabu minatay ti manga Israilita, buwatun mana niku tunda sa kanda dahil sa kang pangagalit.

¹² Nakan sabihi siya mamuwat aku kasunduan sa kanya kuntay papaladan niku siya.

¹³ Sa tunda pag kasunduan, siya hanggan kay manga lahi buwatun manughandug hanggan waya aban, dahil ipinakakit niya sa kangku kay magkagalit sa kasalanan, linukat niya ti manga Israilita sa kanda kasalanan.”

¹⁴ Ti namatay pag Israilita kaibahan babayi Midyanita si Simri anak ni Salu, takinan usa ka magtal-anakan lahi ni Simyun.

¹⁵ Ti babayi Midyanita si Kusbi anak ni Sur. Si Sur usa ka takinan sa magtal-anakan Midyanita.

¹⁶ Magkun ti Diyus sa kan Muysis,

¹⁷ “Baliwun niyu kalaban ti manga Midyanita, ag panmatya niyu sida,

¹⁸ dahil kamu binaliw diman nida kalaban ati sa Piyur, ag dahil diman sa kan Kusbi pag babayi anak usa ka takinan Midyanita. Minatay inda pag babayi katpung nagras-ug ti sarut sa Piyur.”