Bilang 22 - Hanunuu

Ipinatawag ni Hari Balak si Balaam

¹ Nagparargu ti lakaw manga Israilita tugka sa nakaras-ug sida sa karatagan Muab, ag nagkampu sida sa butlakan baliwa Sapa Hurdan, maatubang sa Hiriku.

² Naalaman ni Hari Balak taga Muab, anak ni Sipur, ti tanan binwat manga Israilita sa manga Amuriyu.

³ Nadala siya hanggan ti manga Muabita dahil sa kayamuun manga Israilita.

⁴ Magkumun ti manga Muabita sa manga manugpamahala Midyan, “Pihu rurisun nida kita, parihu sa paghirut manga baka sa ilamnun.” Nakan si Balak anak ni Sipur, hari sa Muab sa tunda pag udas,

⁵ pinmasugu manga manugpadakit hampay ipatawag si Balaam anak ni Biyur mag-uli sa Pitur. Siyun sa Pitur pag ilinusad si Balaam, arani sa Sapa Iyupratis. Inda ti ipinabilin ni Balak: “May manga tawu ginan sa Ihiptu, mayamu sida mag-ulian sa kanmi arani.

⁶ Nakan pagsitay kawu ag saadi nimu inda pag manga tawu, dahil makapangyarihan man sida sa kanmi. Barang ngani matalu niku sida ag mapaighit ginan sa kang daga. Dahil naalaman niku una si unu kanmu pag-idarangin pagpapaladan, ag ti pag saadan nimu mag-idamhak.”

⁷ Nakan linmakaw ti manga takinan Muab hanggan Midyan may dara pamayad sa kan Balaam. Itinultul nida sa kanya ti ibinilin ni Balak.

⁸ Magkun si Balaam sa kanda, “Sitay yi lang kamu pag katurug kainda pag yabi, ag itultul niku sa kanyu aldaw nu hintay ti sabihun Panginuun sa kangku.” Nakan siyun ngani pag naturug ti manga takinan Muab.

⁹ Nagpaingana ti Diyus sa kan Balaam, “Si unu tunda kanmu kaibahan pag manga tawu?”

¹⁰ Sinmagut si Balaam sa Diyus, “Sida ti manga manugpadakit ipinadara ni Hari Balak taga Muab, anak ni Sipur. Kaindaay kay ipinadakit:

¹¹ ‘May manga tawu ginan sa Ihiptu mayamu gid sida. Nakan pag-ataytag kawu saadi inda pag manga tawu para sa kangku. Barang abi matalu niku sida ag mapaighit tag sa arayu.’ ”

¹² Dapat magkun ti Diyus sa kan Balaam, “Danga kawu magkuyug sa kanda. Ag danga pagsaadi ti pagsabihun nida pag manga tawu, dahil pagpapaladan niku sida.”

¹³ Pagka nimata si Balaam sa surip, sinabihan niya ti manga takinan ni Balak, “Pag-uli yi lang kamu sa kanyu nasyun dahil balaw magpasnu ti Panginuun kumuyug aku sa kanyu.”

¹⁴ Nakan binmalik ti manga takinan Muab tag sa kan Balak ag magkun, “Dayu manguyug si Balaam sa kanmi.”

¹⁵ Nakan pinmadara maan si Balak manga takinan mas mayamu ag mas kagalang-galang man kaysa kabag-u.

¹⁶ Nag-atag sida kan Balaam ag magkun: “Inda ti pagsabihun ni Balak anak ni Sipur: ‘Danga nimu pagpasnui may umampara sa kanmu mag-ataytag.

¹⁷ Bayadan niku kawu una mahal ag buwatun niku una hintay kanmu pagkaibgan. Pag-ataytag yi kawu, saadi inda pag manga tawu para sa kangku.’ ”

¹⁸ Dapat nagsagut si Balaam sa kanda, “Una ipakaun waya ni Balak sa kangku kay balay hari punu pilak ag gintu, balaw niku mahimu labagun ti sugu Panginuun niku Diyus, una sa daka ngatay sa diit lang pag bagay.

¹⁹ Dapat sitay lang dap kamu pag kiturug taynguna pag yabi parihu sa binwat niyu kaibahan, barang may tuhay waya sabihun ti Panginuun sa kangku.”

²⁰ Ati pag yabi magkumun ti Diyus sa kan Balaam, “Nagsitay gid waydi inda pag manga tawu magbuul sa kanmu, pagkuyug kawu sa kanda, dapat nu hintay lang ti sabihun niku sa kanmu imaw ti sunda.”

Kan Balaam Asnu

²¹ Nakan pagkasurip, inalistu ni Balaam kay asnu ag nagkuyug sa manga takinan Muab

²² kaibahan kay duwa ka suruguun. Dapat habang magbaklay si Balaam masakyan sa kay asnu, nagalit ti Diyus, nakan inampara siya anghil Panginuun sa dalan.

²³ Pagka nakitan asnu matindugan ti anghil Panginuun sa dalan may hiyaput baladaw, napalipas sa dalan ti asnu ag inmatag sa tanman. Nakan pinitusan ni Balaam ti asnu ag ipinabalik sa dalan.

²⁴ Bag-u tinmindug ti anghil Panginuun sa apiki pag dalan sa tab-anan duwa ka alad batu manga taranuman ubas.

²⁵ Pagka nakakit ti asnu sa anghil Panginuun, nangalubaybay siya sa alad batu ag nailpit kay lulud ni Balaam. Nakan pinitusan maan ni Balaam kay asnu.

²⁶ Bag-u napaagap sa unahan ti anghil Panginuun ag tinmindug sa apiki pag dalan sa balaw yi gid makapalisud sa wala una sa sikun.

²⁷ Pagka nakakit ti asnu sa anghil Panginuun nilagpi lang ti asnu, nangisug gid si Balaam ag binakul niya sugkud.

²⁸ Bag-u pinabagaw Panginuun ti asnu, ag magkun sa kan Balaam, “Unu lugud kang nabwat sa kanmu nakan binakul nimu aku katlu ginan?”

²⁹ Sinmagut si Balaam sa asnu, “Binwat nimu aku ga luku-luku! Nu may baladaw lang aku, matyun niku kawu kainda.”

³⁰ Magkun ti asnu sa kan Balaam, “Unman aw aku pag asnu ti pirmi nimu pagsakyan? May ugali aw aku maglukub parihu sa kainda?” Sinmagut si Balaam, “Unman.”

³¹ Bag-u ipinakakit Panginuun sa kan Balaam kay anghil matindugan sa dalan may bitbit baladaw. Nakan linmuhud si Balaam sa daga.

³² Namaingana sa kanya ti anghil Panginuun, “Hayga binakul nimu kanmu asnu katlu ginan? Aku inda ti mag-ampara sa kanmu dahil kanmu ugali balaw mayad sa kang magbantay.

³³ Nakitan aku nimu asnu napaiwas siya sa kangku katlu ginan. Nu balaw siya napaiwas, minatay yi mana niku kawu ag kanmu asnu pabay-anan niku mabuhi.”

³⁴ Magkun si Balaam sa anghil Panginuun, “Nagsalan gid aku! Balaw niku alam matindugan maaw kawu asan sa dalan mag-ampara sa kangku. Taynguna, nu daut kang binwat, para sa kanmu muli yi lang aku.”

³⁵ Magkun ti anghil Panginuun sa kan Balaam, “Pagkuyug kawu sa tunda pag manga tawu, dapat bumagaw lang kawu angay sa kang gustu ipabagaw sa kanmu.” Nakan kinmuyug ngani si Balaam sa manga takinan ni Balak.

³⁶ Pagka naalaman ni Balak arani yi si Balaam, sinulang niya siya ati sa usa ka banwa sa Muab arani sa Arnun, sa katugkaan niya sakup pag daga.

³⁷ Magkun si Balak sa kan Balaam, “Kabay madaldali kawu kang ipinab-ul? Hayga bag-u di kawu nag-ataytag? Mag-isip aw kawu barang balaw kawu kang bayadan?”

³⁸ Sinmagut si Balaam, “Inda yi aku. Dapat aku balaw may bagawun nu unman ti ipabagaw lang Diyus sa kangku.”

³⁹ Bag-u nagkuyug si Balaam sa kan Balak atag sa Kiryat Husut.

⁴⁰ Ati naghandug si Balak baka hanggan karanidu. Ipinakaun niya ti iba ka taguban sa kan Balaam hanggan sa kay kaibahan manga takinan.

⁴¹ Pagkasurip, dinara ni Balak si Balaam sa Bamut Baal, ag ati nakitan niya sa lawud ti iba ka nasakupan Israil.