Bilang 21 - Hanunuu

Natalu ti manga Kananiyu

¹ Pagka nabaritaan Kananiyu hari Arad mag-uli sa Nigib, kuntay magras-ug ti manga Israilita lakaw sa dalan Atarim, ginira niya sida ag binihag ti iba sa kanda.

² Bag-u nagsumpa ti manga Israilita sa Panginuun, “Nu ipabahala nimu inda pag manga tawu sa kanmi manga kamang, rurisun nimi lubus kanda manga banwa bilang handug sa kanmu.”

³ Pinatingihan Panginuun ti pakiawa manga Israilita ag ipinakaun niya sa kanda ti manga Kananiyu. Rinuris sida lubus manga Israilita hanggan kanda manga banwa, nakan iningarnan Hurma ati pag rugar.

Ti Ulay Galang

⁴ Ginan sa Bantud Hur, linmakaw ti manga Israilita lakaw sa dalan atag sa Dagat Marara hampay makaibay sida sa daga Idum. Dapat magkagasa yi ti manga tawu sa kanda maglakaw,

⁵ nakan nagriklamu sida sa Diyus hanggan sa kan Muysis. Magkumun sida, “Hayga ipinalwas waya nimu kami ginan sa Ihiptu hampay magkaramatay lang sitay sa pangawakawaan? Unman sitay may kang-ud karan-unun hanggan danum! Balaw yi kami makaagwanta magkaun inda pag mana.”

⁶ Nakan pinadaran-an sida Panginuun madalit pag manga ulay ag pinangagat sida, mayamu ti nagkaramatay sa kanda.

⁷ Nag-ati sa kan Muysis ti manga tawu ag magkun, “Nagsalan kami sa pagbagaw nimi laban sa Panginuun hanggan sa kanmu. Idarangin nimu sa Panginuun bul-un niya sa kanmi inda pag manga ulay.” Nakan nandarangin si Muysis para sa manga tawu.

⁸ Magkun ti Panginuun sa kan Muysis, “Pagbuwat kawu ulay galang bag-u itur-ug inda sa suru usa ka tulduk. Una si unu ti kinagat ulay pagbantay lang sa inda pag ulay galang balaw siya mamatay.”

⁹ Nakan nanmuwat si Muysis ulay galang ag itinur-ug sa suru usa ka tulduk. Ag una si unu ti kinagat ulay nagbantay lang sa ulay galang balaw namatay.

Ti Lakawanun Tabug sa Muab

¹⁰ Nagparargu sa paglakaw ti manga Israilita, ag nagkampu sida sa Ubut.

¹¹ Ginan sa Ubut, linmakaw maan sida ag nagkampu sa Iyi Abarim, sa pangawakawaan baliwa sa butlakan Muab.

¹² Siyun ginan, linmakaw sida ag nagkampu sa Luung Sirid.

¹³ Ginan sa Sirid linmakaw maan sida ag nagkampu sa dipay Luung Arnun, ati sa pangawakawaan arani sa daga sakup manga Amuriyu. Ti Arnun tab-anan daga Muab ag daga manga Amuriyu.

¹⁴ Nakan nisurat sa Ribru Paglaban Panginuun ti banwa Wahib sakup Supa, ti luung Arnun,

¹⁵ hanggan ti manga saruy luung aput sa banwa Ar asan sa katugkaan Muab.

¹⁶ Ati ginan sa Arnun, nag-atag ti manga Israilita sa Biir nu naan pag bulbugan ti sinabi Panginuun sa kan Muysis, “Tipuna ti manga tawu kang pakan-an sida danum.”

¹⁷ Ag ati kinanta manga Israilita inda pag karantahun: “Parargu pumakaun danum inda pag bulbugan! Manganta kita tungkul sa inda pag bulbugan

¹⁸ ipinakutkut manga takinan hanggan manga garalangun pag manga tawu sa panab-anan nida kapangyarihan.” Ginan sa pangawakawaan nag-atag sida sa Matana;

¹⁹ ginan sa Matana nag-atag sida sa Nahalyil; ginan sa Nahalyil nag-atag sida sa Bamut;

²⁰ ag ginan sa Bamut nag-atag sida sa karatagan Muab, nu naan pag makitan ti pangawakawaan sa lawud katayungtungan Pisga.

Dinaug si Hari Sihun ag si Hari Ug

²¹ Taynguna, nagpadara manga manugpadakit ti Israil tag sa kan Sihun hari manga Amuriyu. Kaindaay kanda ipinadakit:

²² “Nu mahimu pasnui kami lumawuy sa kanyu daga. Balaw kami manlawuy sa manga tanman ngatay taranuman ubas niyu ngatay manginum sa kanyu bulbugan. Lumawuy lang kami sa kanyu baklayan pag dalan tugka sa makalwas kami sa kanyu sakup pag daga.”

²³ Dapat ud nagpasnu si Sihun manlawuy ti manga Israilita sa kay sakup pag daga. Bagkus ngap, tinipun niya kay buu sundalu ag nag-atag sida sa pangawakawaan hampay girahun ti manga Israilita. Pagras-ug nida sa Yahas, ginira nida ti manga Israilita.

²⁴ Dapat pinanmatay sida manga Israilita ag inagaw kanda daga ginan sa Arnun tugka sa Sapa Habuk. Dapat tugka lang ti manga Israilita sa tab-anan daga manga Amunita, dahil kanda tab-anan may mapag-un pag alad batu.

²⁵ Nakan naagaw manga Israilita ti tanan banwa manga Amuriyu ag inulianan nida, hanggan ti Hisbun ag ti tanan sakup nida pag baryu.

²⁶ Inda pag Hisbun kaybi banwa ni Sihun hari Amuriyu. Tinalu niya kaybi ti usa ka hari Muab, inapu niya ti tanan nida daga tugka sa Arnun.

^27-28 Imaw ngani ti pagsabihun manga maragaday, “Pag-atag kamu sa Hisbun, sa banwa ni Sihun, patindugan maan niyu tunda. Kaybi, maggira ti manga sundalu Hisbun parihu sa maglabdaban apuy, imaw ti nag-irub sa banwa Ar sakup Muab hanggan nagdaut sa arabwat pag rugar taga Arnun.

²⁹ Kaawaawa kamu pag manga taga Muab! Naruris kamu pag manga magsamba sa Kimus pag diyus. Pinabay-anan niya kay manga anak lalaki malagiw, ag kay manga anak babayi binihag ni Sihun hari Amuriyu.

³⁰ Dapat kainda, naruris yi ti manga Amuriyu. Nagkaradaut yi ti banwa Hisbun, hanggan ti Dibun, Nupa, ag Midiba.”

³¹ Nakan nangulian ti manga Israilita sa daga manga Amuriyu.

³² Pagkatapus, nagpadara si Muysis manga manugtiid sa Hasir, ag inagaw diman nida inda hanggan ti manga baryu sa kay sangput. Pinaighit nida ti manga Amuriyu mag-ulian ati.

³³ Bag-u nag-atag sida sa Basan, dapat ginira sida ni Ug hari sa Basan hanggan niya sundalu ati sa Idriy.

³⁴ Magkumun ti Panginuun sa kan Muysis, “Danga kawu magkadala sa kanya, dahil pihu ipakaun niku siya sa kanmu, hanggan kay buu nasakupan ag kay daga. Buwata sa kanya ti binwat nimu sa kan Sihun hari manga Amuriyu, hari sa Hisbun.”

³⁵ Nakan minatay ngani manga Israilita si Ug, hanggan kay manga anak ag ti tanan niya nasakupan, unman gid may nasawad sa kanda. Bag-u inapu manga Israilita ti sakup ni Ug pag daga.