Bilang 20 - Hanunuu

Ti Binmulus sa Batu pag Danum

¹ Katpung sa un-an pag bulan, rinmas-ug ti tanan nasakupan Israil sa pangawakawaan Sin, nagkampu sida sa Kadis. Ati pag namatay si Miryam hanggan pag ilinbung.

² Unman may danum siyun, nakan nagtipun maan ti manga tawu laban sa kan Muysis hanggan sa kan Aarun.

³ Nanriklamu sida sa kan Muysis magkun, “Mayad waya namatay yi lang kami kaibahan nimi kasimanwa nagkaramatay kaybi sa atubangan Panginuun.

⁴ Hayga dinara waya nimu ti manga nasakupan Panginuun sitay sa pangawakawaan? Hampay aw magkaramatay kami kaibahan nimi manga alaga hayup?

⁵ Hayga ipinalwas waya nimu kami sa Ihiptu ag dinara sitay sa ud may kapulsanan pag rugar? Ud may tirigu, igus, ubas ngatay pumigranata. Hanggan unman diman may mainum!”

⁶ Nakan ginminan sa kadamlan si Muysis hanggan si Aarun, nag-ati sida sa Turda Taragbuan ag linmuhud hampay mandarangin. Bag-u napakakit sa kanda ti kadayawan Panginuun.

⁷ Magkun ti Panginuun sa kan Muysis,

⁸ “Bul-a kanmu sugkud ag tipuna niyu ni Aarun ti buu nasakupan. Habang magbantay sida, sugua nimu ti batu pagbulus ti danum, ag bumulus inda. Sa kainda pag paraan, mapakan-an niyu danum ti nasakupan hampay makainum sida hanggan kanda manga hayup.”

⁹ Nakan bin-ul ni Muysis ti sugkud sa atubangan Panginuun, ati sa Kaban Kasunduan, angay sa sugu Panginuun sa kanya.

¹⁰ Bag-u tinipun nida ni Aarun ti buu nasakupan sa arani batu, ag magkun si Muysis sa kanda, “Pagpatingi kamu pag manga malaban, kailangan aw pakan-an nimi kamu danum ginan sa inda pag batu?”

¹¹ Bag-u ipinaabwat ni Muysis kay sugkud, binakul niya kadwa ginan ti batu, ag binmulus ti danum, nanginum ti manga nasakupan hanggan kanda manga hayup.

¹² Dapat magkun ti Panginuun sa kan Muysis hanggan sa kan Aarun, “Dahil balaw kamu nagpaniwala sa kangku sa kanyu pagpakakit kang kadayawan sa atubangan Israilita, balaw kamu ti mandumara sa inda pag nasakupan atag sa daga kang ipakaun sa kanda.”

¹³ Inda pag rugar pag-ingarnan bulbugan Miriba dahil nanlaban ti manga Israilita sa Panginuun sa inda pag rugar, ag sitay diman pag ipinakakit Panginuun sa kanda kay kadayawan.

Balaw Pinasnuan manga taga Idum Lumawuy ti manga Israilita

¹⁴ Katpung ati di waya ti manga Israilita sa Kadis, nagpadara si Muysis manga manugpadakit tag sa hari Idum. Inda kay ipinadakit, “Inda ti padakit ginan sa kanmu manga katawuhan nasakupan Israil: Alam nimu ti tanan kakurian kanmi nalakawan.

¹⁵ Kanmi manga ginurang nag-atag sa Ihiptu, dugay kanmi nangulian ati. Inihid kami manga taga Ihiptu, katunda diman hanggan kanmi manga ginurang,

¹⁶ dapat nanhagad kami awat sa Panginuun ag pinatingihan niya kami. Nagpadara siya anghil ag ipinalwas kami sa Ihiptu. “Kainda, atay kami sa Kadis, sa banwa sa katugkaan nimu sakup pag daga.

¹⁷ Nu mahimu, pasnui kami lumawuy sa kanmu daga. Balaw kami manlakaw sa manga tanman ngatay taranuman ubas, ngatay manginum sa manga bulbugan. Lumawuy lang kami sa kanmu baklayan pag dalan ag balaw kami lumakaw sa tuhay pag manga dalan tugka sa makalwas kami sa kanmu sakup pag daga.”

¹⁸ Dapat kaindaay kay sagut hari Idum: “Balaw kamu lumawuy sitay sa kanmi. Nu lumawuy kamu, girahun nimi kamu ag matyun.”

¹⁹ Sinmagut ti manga Israilita, “Lumawuy lang kami lakaw sa baklayan pag dalan; ag nu makainum kami hanggan kanmi manga hayup kanyu danum, bayadan nimi inda. Palawuya lang kami.”

²⁰ Nagsagut utru ti hari Idum: “Basta balaw kamu mahimu lumawuy sitay.” Bag-u tinipun hari Idum kay makapangyarihan ag marabisug pag manga sundalu hampay lumaban sa manga Israilita.

²¹ Dahil balaw magpalawuy ti manga taga Idum sa kanda magkaapu pag daga, nag-ibay yi lang ti manga Israilita.

Namatay si Aarun

²² Nighit ti buu nasakupan Israil sa Kadis, ag nag-atag sa Bantud Hur.

²³ Ati sa Bantud Hur, arani sa tab-anan Idum, magkumun ti Panginuun sa kan Muysis hanggan sa kan Aarun,

²⁴ “Udas yi darahun kawu Aarun sa kanmu manga katawuhan nagkaramatay yi. Balaw kawu makaslud sa pag-iayaw niku pag daga sa manga Israilita dahil naglabag kamu duwa ni Muysis sa kang sugu ati sa bulbugan Miriba.

²⁵ Kainda, Muysis, tabana si Aarun hanggan kay anak si Iliyasar tag sa Bantud Hur.

²⁶ Bag-u lukasa kan Aarun rutay panmanughandug ag pasulungan nimu sa kay anak sa kan Iliyasar, dahil mamatay yi si Aarun ati sa bantud.”

²⁷ Sinunud ni Muysis ti isinugu Panginuun sa kanya. Nagtukad sida sa Bantud Hur habang magbantay ti buu nasakupan.

²⁸ Bag-u inuba ni Muysis kay rutay ni Aarun ag ipinasulung niya sa kan Iliyasar. Ag namatay ati si Aarun sa babaw bantud. Siyun ginan naglus-ug si Muysis hanggan si Iliyasar gin sa bantud.

²⁹ Pagka naalaman buu nasakupan tigbak yi si Aarun, nanhimanglaw sida sa kanya sa sulud tatlumpulu ka sirang.