Bilang 19 - Hanunuu

Ti Danum Garamitun Panlumpiyu

¹ Magkun ti Panginuun sa kan Muysis hanggan sa kan Aarun,

² “Inda waya ti usa ka surundanun kang gustu tupadun niyu: Sabiha niyu sa manga Israilita darahi nida kamu usa ka maragang pag baka unman may alangan ag udwaya nagamit sa mag-aradu.

³ Iayaw niyu inda sa kan Iliyasar sa manughandug, ag daran-un sa luwas kampu bag-u iyawun sa kay atubangan.

⁴ Pagkatapus, isawsaw ni Iliyasar kay ituturu sa dugu ag iwidwisik makapitu ka ulit sa atubangan Turda Taragbuan.

⁵ Sa paghilingan ni Iliyasar, sunugun ti bilug baka — kay paknul, nayi, dugu hanggan puna.

⁶ Bag-u mam-ul si Iliyasar usa ka pulud kayu sidru, usa ka sanga tanum isupu, hanggan maragang pag panhigut, ag iyamut tunda tanan sa magkasunug baka.

⁷ Bag-u kailangan pipian ni Iliyasar kay rutay ag marigus sa malumpiyu kay sadili. Bag-u di sumulud siya sa kampu, dapat kabilang waya siya sa mayagting tugka sa maghugut marukirum.

⁸ Ti tawu nagsunug baka kailangan pipian diman niya kay rutay ag marigus sa malumpiyu kay sadili, ag kilalan-un diman siya mayagting tugka sa maghugut marukirum.

⁹ “Ti malumpiyu pag tawu imaw ti mam-ul dapug baka, ag ipauli niya inda sa usa ka rugar pagkilalan-un malumpiyu sa luwas kampu. Ibutang inda ati hampay gamitun nasakupan Israil panlakay sa danum garamitun sa paglumpiyu. Pagbuwatun inda pag buruwatun hampay mab-ul ti kasalanan.

¹⁰ Ti tawu nagbuul dapug baka kailangan diman pipian niya kay rutay, ag kilalan-un diman siya mayagting tugka sa maghugut marukirum. Inda pag surundanun kailangan tupadun hanggan aban manga Israilita ag manga day-uhan mag-ulian kaibahan nida.”

¹¹ “Una si unu ti mid-ut sa bangkay kilalan-un mayagting sa sulud pitu ka sirang.

¹² Kailangan lumpiyuhun niya kay sadili sa ikatlu ag sa ikapitu pag sirang sa danum paggamitun sa paglumpiyu. Bag-u di kilalan-un siya malumpiyu. Dapat nu unman siya manlumpiyu sa ikatlu ag ikapitu pag sirang, balaw siya kilalan-un malumpiyu.

¹³ Una si unu ti mid-ut sa bangkay unman nakalumpiyu parihu lang ga inuringan niya ti Turda Panginuun. Kailangan tunda pag tawu danga yi pagkilalan-a nasakupan niyu. Dahil balaw siya nawidwisikan danum garamitun sa paglumpiyu, mayagting diman siya.

¹⁴ “Inda ti surundanun nu may namatay sa sulud turda: Una si unu ti sumaka sa turda may namatay ngatay asan yi daan sa sulud sa udas pagkamatay, kilalan-un mayagting sa sulud pitu ka sirang.

¹⁵ Kilalan-un diman mayagting una hintay pag manga sukadan sa turda ti balaw may taklub.

¹⁶ “Kilalan-un diman mayagting sa sulud pitu ka sirang una si unu ti asan sa luwas kampu ti nakahiyaput sa bangkay minatay ngatay namatay lang sa kapaladun pag karamatayun. Katida diman sa nakahiyaput sa but-ul tawu ngatay nid-ut sa kalubngan.

¹⁷ “Hampay mab-ul ti pagkamauring, paulian sa sukadan ti iba ka dapug baka ihinandug sa paglumpiyu ag dugangi danum.

¹⁸ Bag-u ti usa ka tawu malumpiyu pagbuul usa ka sanga tanum isupu ag isugmaw niya inda siti pag danum ag iwidwisik sa turda namatyan hanggan sa tanan pag kagamitan siyun, hanggan sa manga tawu sa sulud turda. Widwisikan diman ti tawu nakahiyaput but-ul tawu, ngatay sa bangkay tawu minatay ngatay namatay lang sa kapaladun pag kamatayan, ngatay nid-ut sa kalubngan.

¹⁹ Sa ikatlu ag ikapitu pag sirang, widwisikan tawu pagkilalan-un malumpiyu ti tawu mayagting. Ag sa ikapitu pag sirang, ti tawu linumpiyu kailangan pipian niya kay rutay ag marigus, sa tunda pag yabi kilalan-un yi siya malumpiyu.

²⁰ Dapat nu ti tawu mayagting balaw manlumpiyu, danga yi pagkilalan-a nasakupan niyu, dahil ga inuringan diman niya ti Turda Panginuun. Ag dahil balaw siya nawidwisikan danum paggamitun sa paglumpiyu, mauring diman siya.

²¹ Inda pag surundanun kailangan tupadun nida hanggan aban. “Ti tawu magwidwisik danum para sa paglumpiyu kailangan pipian diman niya kay rutay, ag una si unu ti makaigpil sa danum panlumpiyu kilalan-un mayagting tugka sa maghugut marukirum.

²² Una si unu ngatay una hintay ti mahiyaptan mayagting pag tawu kilalan-un mayagting diman tugka sa maghugut marukirum.”