Bilang 16 - Hanunuu

Naglaban si Kura hanggan Kay manga Kaibahan

^1-2 Naglaban sa kan Muysis si Kura anak ni Isar, ginan sa lahi ni Kuhat anak ni Libi. Kaibahan niya naglaban si Datan ag si Abiram anak ni Ilyab, ag si Un anak ni Pilit ginan sa lahi ni Rubin. May kaibahan waya sida 250 ka lalaki Israilita kilala ag pinili manga takinan ginan sa nasakupan Israil.

³ Nag-atag sida tanan sa kan Muysis hanggan sa kan Aarun ag magkun, “Masyadu yi inda kanyu pagbuwatun sa kanmi! Hayga pag-ipalabaw gid niyu kanyu sadili sa nasakupan Panginuun nu sa ungud kami tanan pinili diman Panginuun sumirbi sa kanya ag pag-ibahan diman niya?”

⁴ Pagka nadnugan inda ni Muysis, nagluhud siya nandarangin sa Panginuun.

^5-6 Bag-u magkun siya sa kan Kura hanggan sa tanan niya tagasunud, “Aldaw surip, ipaburayhaw Panginuun nu si unu ti tutuu pinili sumirbi sa kanya bilang manga manughandug, dahil ipakarani niya sa kay kadayawan kay pinili. Nakan kaindaay kanyu buwatun aldaw: pagbuul kamu manga sukadan kamangyan,

⁷ bag-u paulii niyu baga hanggan kamangyan, ag daraha sa atubangan Panginuun. Bag-u makitan nita nu si unu ti piliun Panginuun banal hampay sumirbi sa kanya. Kamu pag manga Libita, labis yi kanyu pagbuwatun!”

⁸ Magkun waya gid si Muysis sa kanda ni Kura, “Pagpatingi kamu, kamu pag manga Libita.

⁹ Udwaya aw lugud kang-ud sa kanyu sa tanan Israilita kamu ti pinili Diyus Israil ti makapakarani sa kay atubangan hampay mansirbi sa kay Turda, ag mansirbi sa kayamuan?

¹⁰ Pinili niya kawu hanggan ti iba manga Libita hampay makapakarani sa kay atubangan, ag kainda kamu magkaibug waya gid bumaliw manga manughandug?

¹¹ Kawu hanggan kanmu manga tagasunud maglaban sa Panginuun balaw sa kan Aarun.”

¹² Bag-u ipinatawag ni Muysis si Datan hanggan si Abiram, kay manga anak ni Ilyab. Dapat magkun sida, “Balaw kami asantag!

¹³ Balaw waya aw lugud kang-ud kami kanmu bin-ul ginan sa Ihiptu, sa marinu ag abunda pag daga hampay matyun lang sitay sa pangawakawaan? Ag kainda gustu waya nimu humari sa kanmi.

¹⁴ Ag usa waya, balaw nimu kami dinara sa marinu ag abunda pag daga ngatay ayawan manga tanman taranuman ubas kanmi maapu. Kainda, gustu waya aw gid nimu kami lukuhun? Dayu kami asantag sa kanmu!”

¹⁵ Nagalit si Muysis, magkun siya sa Panginuun, “Danga pagtanggapa kanda manga handug. Unman aku may kasalanan una sa kantapu sa kanda; unman aku may bin-ul sa kanda una lang usa ka asnu.”

¹⁶ Magkun si Muysis sa kan Kura, “Aldaw, kawu hanggan kanmu manga tagasunud pag-atag sa atubangan Panginuun sa Turda Taragbuan, si Aarun hanggan mangatag diman.

¹⁷ Ti 250 ka tagasunud nimu padaran-a sukadan kamangyan, pag may sukad inda kamangyan ihandug sa Panginuun. Kamu ni Aarun pagdara diman sukadan kamangyan.”

¹⁸ Nakan ti kada usa nagbuul kanda sukadan kamangyan ag pinaulian baga hanggan kamangyan, nagtindug sida kaibahan ni Muysis ag ni Aarun sa may sabian Turda Taragbuan.

¹⁹ Ti ginarya ni Kura pag manga nasakupan laban sa kan Muysis ag kan Aarun nagtipun diman ati sa sabian Turda Taragbuan. Bag-u ipinakakit Panginuun kay kadayawan sa buu nasakupan.

²⁰ Magkun ti Panginuun sa kan Muysis hanggan sa kan Aarun,

²¹ “Pagpakarayu kamu siyun ginan pag manga tawu hampay matyun yi niku sida.”

²² Dapat linmuhud si Muysis hanggan si Aarun ag magkun, “Diyus, ti gimpuunan buhi sa tanan tawu, magalit aw kawu sa buu nasakupan dahil sa usa lang ka tawu nagkasala?”

²³ Magkun ti Panginuun sa kan Muysis,

²⁴ “Sabiha nimu sa manga nasakupan pagpakarayu sida sa Turda nida ni Kura, ni Datan, ag ni Abiram.”

²⁵ Inatihan ni Muysis si Datan hanggan si Abiram, ag nagdasun sa kanya ti manga paggurangunun sa Israil.

²⁶ Bag-u pinaandaman niya ti nasakupan, “Pagpakarayu kamu sa tunda pag turda manga daut pag tawu! Danga kamu mag-igpil una hintay pag kasiyunan nida, dahil nu buwatun niyu tunda parusahan kamu kaibahan nida dahil sa tanan nida kasalanan.”

²⁷ Nakan nagpakarayu ti manga tawu sa manga turda nida ni Kura, ni Datan, ag ni Abiram. Taynguna, nagluwas si Datan ag si Abiram, bag-u tinmindug sa sabian nida manga turda kaibahan kanda manga asawa hanggan manga anak.

²⁸ Magkun si Muysis sa manga tawu, “Sa panab-anan inda maalaman niyu ti Panginuun ti nagsugu sa kangku hampay buwatun inda pag manga bagay, ag balaw kang sadili kagustuhan.

²⁹ Nu mamatay inda pag manga tawu sa kanda kapaladun pag kamatayan, balaw aku ipinadara Panginuun.

³⁰ Dapat nu bumuwat ti Panginuun kalalingutan pag bagay, ag manggil-ang ti daga, ag milbung sida buhi kaibahan ti tanan nida kasiyunan, ag umatag sida sa sirung, ati sa ulian manga namatay, maalaman niyu inda pag manga tawu naglaban sa Panginuun.”

³¹ Pagkatapus bagaw ni Muysis, nabka ti pagtindugan nida ni Datan ag ni Abiram pag daga,

³² hinalun sida daga hanggan kanda magtal-anakan, hanggan ti tanan tagasunud ni Kura ag ti tanan nida kasiyunan.

³³ Hinalun sida tanan buhi hanggan ti tanan nida kasiyunan. Bag-u naghirum ti daga ag nadura sida sa kadamlan.

³⁴ Ti tanan Israilita ati sa kanda sangput nagpinalagiw pagka nadnugan nida ti riringgitan, dahil kanda isip barang halunun diman waydi sida daga.

³⁵ Bag-u nagpadara ti Panginuun apuy, ag inirub ti 250 ka tagasunud ni Kura maghandug kamangyan.

³⁶ Magkun ti Panginuun sa kan Muysis,

³⁷ “Sabihi si Iliyasar, kay anak ni manughandug Aarun, bul-a niya ti manga sukadan kamangyan sa manga bangkay nagkarasunug, dahil banal inda pag manga sukadan. Sabihi diman siya wayakun niya sa arayu ti manga baga

³⁸ sa inda pag sukadan ginan sa manga tawu nagkaramatay dahil sa kanda manga kasalanan. Bag-u ipapilpig ti manga sukadan tugka sa man-nipis ag ihaklup sa harandugan dahil ihinandug inda sa Panginuun ag banal inda. Inda pag panhaklup sa harandugan usa ka paandam sa manga Israilita.”

^39-40 Nakan angay sa isinugu Panginuun sa panab-anan ni Muysis, pinanbuul ni Iliyasar ti galang pag manga sukadan kamangyan ti pinandara katpung nagkarasunug, ag pinamilpig niya hampay ipahaklup sa harandugan. Usa inda ka paandam sa manga Israilita, unman may makapakarani una si unu sa harandugan hampay mansunug kamangyan sa Panginuun purya lang sa manga lahi ni Aarun, hampay balaw mangyari sa kanya ti nangyari sa kan Kura ag sa kay manga tagasunud.

⁴¹ Dapat sa sunud pag sirang, nagriklamu maan ti buu nasakupan Israil sa kan Muysis hanggan sa kan Aarun. Magkun sida, “Pinanmatay niyu ti nasakupan Panginuun.”

⁴² Habang magriklamu sida sa kan Muysis hanggan sa kan Aarun, nangaliwliw sida sa Turda Taragbuan ag nakitan nida kadaka lang sinaput rurum ti Turda ag ipinakakit Panginuun kay kadayawan.

⁴³ Nag-atag si Muysis hanggan si Aarun sa atubangan Turda

⁴⁴ ag magkun ti Panginuun sa kan Muysis,

⁴⁵ “Pagpakarayu kamu sa tunda pag nasakupan dahil rurisun niku sida.” Susun linmuhud sida duwa.

⁴⁶ Bag-u magkun si Muysis sa kan Aarun, “Bul-a kanmu sukadan kamangyan ag paulii inda baga ginan sa harandugan. Bag-u paulii inda kamangyan ag kadali kawu atag sa nasakupan, buwata ti buruwatun hampay malukat sida sa kanda manga kasalanan, dahil nangisug yi ti Panginuun ag mag-umpisa yi ti sarut.”

⁴⁷ Nakan sinunud ngani ni Aarun ti pag-isugu ni Muysis, ag nalagiw siya sa karaw-an nasakupan. Mag-umpisa yi ti sarut sa manga tawu, dapat sinunug ni Aarun ti kamangyan hampay malukat ti manga tawu sa kanda manga kasalanan.

⁴⁸ Tinmindug siya sa tab-anan manga tawu namatay yi ag manga buhi waya, bag-u di nag-apas ti sarut.

⁴⁹ Dapat 14,700 ti namatay, balaw kaibahan ti namatay dahil sa kan Kura.

⁵⁰ Bag-u nagbalik si Aarun sa kan Muysis sa sabian Turda Taragbuan, dahil nag-apas yi ti sarut.