Bilang 15 - Hanunuu

Ti manga Turupadun tungkul sa manga Handug

¹ Sinugu Panginuun si Muysis

² Kuntay sabiha inda sa manga Israilita: “Nu rumas-ug yi kamu sa pag-iayaw niku pag daga sa kanyu ti ulianan niyu,

³ paghandug kamu sa kangku sa panab-anan niyu manga hayup. Paghandug kamu manga handug pag sunugun, handug sa pagtupad sa usa ka taratu, handug buluntad, ngatay manga handug sa udas manga pista. Kay hungaw inda pag manga handug sa panab-anan apuy makapasulung sa kangku.

^4-5 Ti manhandug anak karanidu bilang handug pag sunugun sa kangku maghandug diman handug pasalamat. Inda pag handug pasalamat kailangan duwa ka kilu marinu pag kalasi arina may lakay usa ka litru lana. Ag may kaibahan waya gid inda handug irinmun usa ka litru intus.

⁶ Nu tudu karanidu ti ihandug, paibahan inda handug pasalamat upat ka kilu marinu pag kalasi arina may lakay usa may tunga ka litru lana.

⁷ Ag paibahan waya gid inda handug irinmun usa may tunga ka litru intus. Kay hungaw inda pag handug makapasulung sa kangku.

⁸ “Ti manhandug turiti baka bilang handug pag sunugun ngatay handug sa pagtupad sa usa ka taratu, ngatay handug para sa mayad pag pakiusa,

⁹ kailangan manhandug diman handug pasalamat unum ka kilu marinu pag kalasi arina may lakay duwa ka litru lana.

¹⁰ Ag paibahan waya gid inda handug irinmun duwa ka litru intus. Kay hungaw inda pag handug sa panab-anan apuy makapasulung sa kangku.

¹¹ Kainda kanyu buwatun nu maghandug kamu usa ka tudu baka ngatay tudu karanidu ngatay anak pag karanidu una kambing.

¹² Katida kanyu buwatun sa kada hayup kanyu ihandug.

¹³ “Ti tanan tinubu manga Israilita manhandug manga handug sa panab-anan apuy bilang mabanglu pag handug makapasulung sa kangku kailangan magsunud sa tunda pag manga surundanun.

¹⁴ Nu ti manga day-uhan magpangulian kaibahan niyu, pirmaminti man ngatay unman, magkaibug manhandug handug sa panab-anan apuy bilang mabanglu pag handug makapasulung sa kangku, kailangan magsunud diman sida sa tunda pag manga surudanun.

¹⁵ Kamu pag manga Israilita hanggan ti manga day-uhan magpangulian kaibahan niyu parihu lang sa kang atubangan ag parihu lang pag kasuguan kanyu sundun. Inda pag surundanun kailangan tupadun niyu tugka sa sunud pag manga sinulput tawu.

¹⁶ Parihu lang pag manga sugu hanggan manga surundanun kanyu sundun, tinubu Israilita man ngatay day-uhan magpangulian kaibahan niyu.”

¹⁷ Sinugu waya gid Panginuun si Muysis

¹⁸ kuntay sabiha inda sa manga Israilita: “Nu rumas-ug yi kamu sa pag-ipakaun niku pag daga sa kanyu,

¹⁹ mahimu kamu makakaun manga karan-unun ati. Dapat kailangan ipablag niyu inda kay iba hampay ihandug sa kangku.

²⁰ Paghandug kamu tinapay ginan sa bag-u niyu ginaling pag arina, parihu sa kanyu pagbuwatun sa un-an niyu ani tirigu ginan sa giriukan.

²¹ Inda pag handug ginan sa kabag-u niyu ginaling pag arina, ihandug niyu sa kangku tugka aban.

²² “Nu abi kamu pag manga nasakupan, nakalabag balaw tikis sa usa sa inda pag manga sugu kang ipinakaun sa kan Muysis,

²³ (kailangan niyu sundun kang ipinakaun pag sugu sa kanyu sa panab-anan ni Muysis, ginan sa udas kang nagpakaun hanggan sa manga sunud pag sinulput)

²⁴ nu nalabag ngani inda balaw tikis, ag balaw diman alam buu nasakupan kuntay nalabag maaw inda, buu nasakupan ti manhandug usa ka turiti baka bilang handug pagsunugun sa udas maalaman niyu kanyu paglabag. Ti mabanglu pag hungaw handug makapasulung sa kangku. Iminsan diman niyu ti manga kailangan pag handug para sa pagkilala sa kangku hanggan manga handug irinmun ag usa ka lalaki kambing bilang handug paglumpiyu.

²⁵ Ihandug inda manughandug hampay malukat ti buu nasakupan sa kanda kasalanan. Patawadun di niku sida dahil balaw waydi inda tikis, ag manhandug diman sida sa kangku manga handug sa panab-anan apuy hanggan handug panlumpiyu.

²⁶ Ungud, patawadun niku ti buu nasakupan Israil, hanggan ti manga day-uhan magpangulian kaibahan nida, dahil ti tanan nadamay sa kasalanan balaw tikis.

²⁷ “Dapat nu usa lang ka tawu ti nagkasala balaw tikis, mandara siya usa ka tinday kambing usa ka timpu kay idad, bilang handug panlumpiyu.

²⁸ Ihandug inda manughandug sa kang atubangan hampay malukat siya sa kay kasalanan balaw tikis, bag-u patawadun yi niku siya.

²⁹ Usa lang ka surundanun para sa tanan nagkasala balaw tikis, tinubu Israilita man ngatay day-uhan magpangulian kaibahan niyu.

³⁰ “Dapat una si unu ti nagkasala tinikis, tinubu Israilita man ngatay day-uhan, maglapastangan sa kangku, danga yi pagkilalan-a nasakupan niyu,

³¹ dahil binugyahan niya kang bagaw ag linabag niya kang sugu. Danga yi siya pagkilalan-a kasimanwa niyu. May saragtun siya sa kay kasalanan.”

Ti Parusa sa Balaw Pagtupad sa Sirang Pamahari

³² Habang ati sa pangawakawaan ti manga Israilita, may nakitan sida tawu magkayu sa Sirang Pamahari.

³³ Dinara siya manga tawu nakakit sa kanya tag sa kan Muysis hanggan sa kan Aarun ag sa buu nasakupan.

³⁴ Pinirisu nida siya, dahil unman nida siguradu nu hintay ti kailangan buwatun sa kanya.

³⁵ Bag-u magkun ti Panginuun sa kan Muysis, “Kailangan matyun tunda pag tawu; bintukun siya buu nasakupan ati sa luwas kampu.”

³⁶ Nakan dinara siya buu nasakupan tag sa luwas kampu ag binintuk tugka sa namatay, angay sa isinugu Panginuun sa kan Muysis.

Ti Paraway-raway sa Rutay manga Israilita

³⁷ Sinugu waya gid Panginuun si Muysis

³⁸ kuntay sabiha inda sa manga Israilita: “Pagbuwat kamu manga paraway-raway sa sidsid niyu manga rutay ag paulian niyu inda panhigut malatuy. Kailangan sundun niyu inda tugka aban.

³⁹ Inda pag manga paraway-raway imaw ti pumaala-ala sa kanyu sa tanan niku manga sugu hampay tupadun niyu inda ag balaw kanyu lang pag kagustuhan ti pagbuwatun niyu.

⁴⁰ Sa panab-anan inda pag manga paraway-raway, alalahanun niyu ti pagtupad sa tanan niku kasuguan, ag kangku yi kamu.

⁴¹ Aku ti Panginuun niyu Diyus, ti nagpalwas sa kanyu sa Ihiptu hampay kanyu Diyus. Ungud, aku ti Panginuun niyu Diyus.”