Bilang 14 - Hanunuu

Naglaban ti manga Israilita

¹ Ati katpung pag yabi, nanlulumian gid masyadu ti tanan nasakupan Israil.

² Nagriklamu sida sa kan Muysis hanggan sa kan Aarun. Magkun sida, “Mayad waya nagkaramatay yi lang kita sa Ihiptu ngatay sitay sa pangawakawaan.

³ Hayga nguna daran-un waya kita Panginuun sa ati pag daga? Hampay lang aw magkaramatay kita sa girahan ag bihagun kanta manga asawa hanggan manga anak? Mayad waya siguru bumalik yi lang kita sa Ihiptu.”

⁴ Ag nanharampangan sida sa usa kag sa usa, “Mamili kita takinan ag bumalik sa Ihiptu!”

⁵ Bag-u linmuhud si Muysis hanggan si Aarun sa atubangan tanan nasakupan Israil.

⁶ Ginisi ni Huswi anak ni Nun hanggan ni Kalib anak ni Hipuni kanda manga rutay sa karukuan. Inda sida duwa kaibahan sa nagtiid sa daga.

⁷ Magkun sida sa tanan nasakupan Israil, “Mayad gid kanmi inatihan pag daga.

⁸ Nu magbaya ti Panginuun sa kanta, ibahan niya kita atabug sa tunda pag daga — marinu ag abunda sa ani, ag iayaw niya inda sa kanta.

⁹ Danga lang kamu maglaban sa Panginuun. Ag danga kamu magkadala sa manga tawu taga ati dahil matalu di nita sida. Unman may mangawat sa kanda, dapat ti Panginuun ti mangawat sa kanta. Nakan danga kamu magkadala sa kanda.”

¹⁰ Bintukun mana sida tanan nasakupan, dapat kadaka lang napakakit sa kanda ti kadayawan Panginuun sa tungud Turda Taragbuan.

¹¹ Magkun ti Panginuun sa kan Muysis, “Tugka kapira waya magdayu inda pag manga tawu sa kangku? Tugka kapira waya sida unman magpaniwala sa kangku lang madi ti tanan makadululaw binwat niku sa kanda?

¹² Padarahan niku sida sarut ag rurisun, dapat kawu bay buwatun niku usa ka makapangyarihan pag nasyun ag mapag-un kaysa kanda.”

¹³ Magkun si Muysis sa Panginuun, “Unu yi lang ti sabihun manga taga Ihiptu nu mabaritaan nida inda? Unman aw alam diman nida bin-ul nimu ti manga Israilita ginan sa kanda sa panab-anan nimu kamaskihan?

¹⁴ Nu rurisun nimu kanmu nasakupan, itultul inda manga taga Ihiptu sa manga mag-uli sa Kanaan. Nadnugan yi manga Kananiyu kawu, Panginuun mag-iba sa manga Israilita, ag magpakakit sa kanda sa panab-anan rurum maggiya sa kanda. Pagpangunahan nimu sida nu sirang sa panab-anan rurum ga tulduk, ag nu yabi sa panab-anan apuy ga tulduk.

¹⁵ Taynguna, nu matyun nimu inda pag nasakupan sa usa lang ka udas, ti manga nakadnug pag nasyun tungkul sa kanmu kabantugan sumabi,

¹⁶ ‘Balaw kaya darahun Panginuun ti manga Israilita sa kay itinaratu pag daga sa kanda, nakan minatay yi lang niya sida sa pangawakawaan.’

¹⁷ “Nakan kainda, Panginuun, ipakakit mana nimu kanmu kamaskihan angay sa kanmu pagsabihun kuntay

¹⁸ magmahal kawu ag balaw madali magkagalit, mapinatawadun sa kasalanan ag paglabag manga tawu. Dapat pagparusahan nimu ti manga nagkasala tugka sa ikatlu ag ikap-at pag sinulput.

¹⁹ Angay sa kanmu daka pag pagmahal, patawada duy inda pag manga tawu sa kanda kasalanan, parihu sa pagpatawad nimu sa kanda ginan sa ipinalwas sida sa Ihiptu.”

²⁰ Nagsagut ti Panginuun, “Patawadun niku sida angay sa kanmu paghagadun.

²¹ Dapat magsumpa aku, ti Panginuun buhi, habang talaptap sa buu kalibutan kang kadayawan,

^22-23 unman una di usa sa kanda ti makaslud sa itinaratu niku pag daga sa kanda manga ginurang. Dahil una nakitan nida kang kadayawan hanggan ti manga makadululaw pag binwat niku sa Ihiptu ag sa pangawakawaan, pirmi diman nida aku pagsubukan ag unman sida magsunud sa kangku. Nakan balaw gid makaslud sa tunda pag daga ti manga magdayu sa kangku.

²⁴ Dapat si Kalib kang suruguun pasuldun di niku sa kay binantayan pag daga, dahil tuhay kay ugali sa iba ag magsunud di siya sa kangku sa buu tagipusuun. Kay manga lahi mangulian diman sa tunda pag daga.

²⁵ Taynguna balaw dapu kamu parargu dahil may manga Kanaanita hanggan manga Amalikita mag-uli sa manga karatagan, nu unman pagbalik dap kamu aldaw sa pangawakawaan, atag sa may Dagat Marara pag dalan.”

²⁶ Magkun ti Panginuun sa kan Muysis hanggan sa kan Aarun,

²⁷ “Tugka waya kapira magriklamu inda pag daut nasakupan sa kangku? Nasaydan niku ti manga riklamu manga marariklamu pag manga Israilita.

²⁸ Nakan sabihun nimu inda sa kanda: ‘Magsumpa aku, ti Panginuun buhi, buwatun niku sa kanyu ti pagsabihun niyu.

²⁹ Magkaramatay kamu sitay sa pangawakawaan. Dahil nagriklamu kamu sa kangku, unman may una usa sa kanyu ti may idad 20 ka timpu paabwat

³⁰ ti makaslud sa kang itinaratu iayaw sa kanyu pag daga kanyu ulian, purya lang sa kan Kalib anak ni Hipuni hanggan sa kan Huswi anak ni Nun.

³¹ Nu tungkul sa kanyu manga anak pagsabihun niyu bihagun, daran-un niku sida sa kanyu binugyahan pag daga ag kanda yi tunda.

³² Dapat kamu magkaramatay sitay sa pangawakawaan.

³³ Kanyu manga anak bumaliw ga manga manug-alaga karanidu magpalibut-libut sitay sa pangawakawaan sa sulud upatpulu ka timpu. Sa inda pag pagpalakaw, makurian sida dahil sa kanyu nagdayu sa kangku tugka sa mamatay kamu tanan.

³⁴ Ti 40 ka sirang pagpirmaminti manga manugtiid sa ati pag daga tumbasan niku 40 ka timpu kakurian dahil sa kanyu kasalanan, hampay maalaman niyu nu kabitay aku magkagalit sa manga maglaban sa kangku.

³⁵ Aku, ti Panginuun, ti magsabi inda ag pihu gid buwatun niku inda pag manga bagay sa daut nasakupan nagkausa naglaban sa kangku. Mamatay sida tanan sitay sa pangawakawaan.’ ”

^36-37 Ti manga sinugu ni Muysis pag manga tawu hampay mantiid, nagbarita daut tungkul sa daga, imaw kay dahilan pagriklamu manga Israilita nagkaramatay sa sarut sa atubangan Panginuun.

³⁸ Sa 12 sida ti nagtiid, si Huswi kay anak ni Nun ag si Kalib kay anak ni Hipuni lang ti unman mamatay.

Natalu ti manga Israilita sa Kanda Paggira sa Kanaan

³⁹ Pagka itinultul ni Muysis ti binagaw Panginuun sa tanan Israilita, nanhimanglaw gid sida.

⁴⁰ Ag sa sunud pag sirang, surip waya gid sida nagbangun hampay tumukad sa kabantudan Kanaan. Magkun sida, “Naisip nimi nagkasala kami, ag kainda alistu yi kami atabug sa rugar itinaratu Panginuun.”

⁴¹ Dapat magkun si Muysis, “Hayga paglabagun niyu ti sugu Panginuun bumalik dapu kamu sa pangawakawaan? Balaw kamu manalu!

⁴² Danga kamu maglakaw, dahil ti Panginuun unman kaibahan niyu, ag matalu kamu niyu manga kalaban.

⁴³ Sa udas lumaban sa kanyu ti manga Kananiyu hanggan ti manga Amalikita, magkaramatay kamu; balaw kuyug sa kanyu ti Panginuun dahil kanyu binugyahan siya.”

⁴⁴ Dapat linmakaw gid sida sa kabantudan Kanaan una unman nagkuyug sa kanda si Muysis hanggan ti Kaban Kasunduan Panginuun.

⁴⁵ Rargu ginira sida manga Amalikita ag manga Kanaanita mag-uli ati sa kabantudan, ag natalu sida, binukad waya sida tugka sa Hurma.