Bilang 13 - Hanunuu

Ti manga Manugtiid

¹ Magkun ti Panginuun sa kan Muysis,

² “Pagsugu kawu manga tawu mantiid sa Kanaan — ti pag-iayaw niku pag daga sa kanyu sa manga Israilita. Kanmu suguun pag manga tawu ti manga takinan kada linahi Israil.”

³ Sinunud ni Muysis ti pag-isugu Panginuun sa kanya. Ginan sa pangawakawaan Paran ipinaati niya sa Kanaan ti manga takinan manga Israilita.

^4-15 Inda kanda manga lahi hanggan manga ngaran: Lahi Takinan Rubin Samwa kay anak ni Sakur Simyun Sapat kay anak ni Huri Huda Kalib kay anak ni Hipuni Isakar Igal kay anak ni Husi Ipraim Husyas kay anak ni Nun Binhamin Palti kay anak ni Rapu Sabulun Gadyil kay anak ni Sudi Manasis kay anak ni Husi Gadi kay anak ni Susi Dan Amyil kay anak ni Gimali Asir Situr kay anak ni Mikail Niptali Nahabi kay anak ni Bapsi Gad Giwil kay anak ni Maki

Lahi Takinan

¹⁶ Sida pag manga tawu ti sinugu ni Muysis hampay mantiid sa Kanaan. (Huswi pag ngaran ti iinilis ni Muysis sa kan Husyas anak ni Nun.)

¹⁷ Bag-u sida ipinalakaw ni Muysis hampay mantiid sa Kanaan, magkun siya sa kanda, “Lakaw kamu sa kanaway ag pag-atag sa Nigib, rargu sa kabantudan.

¹⁸ Bantayi niyu nu kabitay ati pag daga, nu mabisug aw ngatay malumuy ati kay manga tawu, ag nu mayamu aw sida ngatay pira-pira lang.

¹⁹ Bantayi niyu nu kabitay kay kalasi pag daga ati kanda pag-ulian, nu mayad aw ngatay unman. Bantayi niyu kanda manga banwa nu sangput aw alad batu ngatay unman.

²⁰ Bantayi diman niyu nu abunda aw sa ani pag daga ngatay unman, ag nu may manga kayu aw ngatay unman. Ag sikapun niyu makadara manga burak kayu sa kanyu pagbalik.” (Ati katpung tiglulutu ubas.)

²¹ Nakan linmakaw ngani sida ag binantayan nida ti daga umpisa sa pangawakawaan Sin tugka sa Rihub arani sa Libu Hamat.

²² Nag-umpisa sida sa Nigib tugka nakaras-ug sida sa Hibrun, nu naan mag-uli sida ni Ahiman, ni Sisay, ag ni Talmay, manga lahi ni Anak. (Inda pag Hibrun ipinatindug pitu ka timpu bag-u ipinatindug ti Suan sa Ihiptu.)

²³ Pagka rinmas-ug sida sa Luung Iskul, nanrapas sida usa ka buligan ubas. Mabuyat masyadu inda nakan ipinauli nida sa yayungan ag yinayung duwa ka tawu. Nandara diman sida manga burak kayu pumigranata hanggan igus.

²⁴ Ati pag rugar iningarnan Luung Iskul dahil sa buligan ubas rinapas manga Israilita.

²⁵ Pagkalawuy 40 ka sirang pagtiid sa daga, nagbalik sida

²⁶ sa kan Muysis hanggan sa kan Aarun ag nasakupan Israil sa Kadis, ati sa pangawakawaan Paran. Itinultul nida sa buu nasakupan kanda nakitan, ag ipinakakit nida kanda dara manga burak kayu.

²⁷ Magkun sida sa kan Muysis, “Nag-atag kami sa kanmu pag-isugu pag rugar, mayad inda ag abunda sa ani pag daga. Inda ngani ti manga burak kayu.

²⁸ Dapat ay makapangyarihan pag manga tawu ti mag-uli ati, daraka gid kanda manga banwa ag sangput manga alad batu. Nakitan waya ngani nimi ati kay manga lahi ni Anak.

²⁹ Ti manga Amalikita mag-uli sa Nigib; ti manga Hitiyu, manga Hibusiyu, ag manga Amuriyu mag-uli sa manga kabantudan; ag ti manga Kanaanita mag-uli arani sa dagat ag sa saruy Sapa Hurdan.”

³⁰ Sinabihan ni Kalib ti manga tawu sa atubangan ni Muysis kuntay danga mag-ingay, ag magkun siya, “Lumakaw kita taynguna ag agawun nita ti daga, dahil pihu gid maagaw nita tunda.”

³¹ Dapat magkun ti manga tawu nagkuyug kan Kalib sa pagtiid, “Balaw nita kayahun man-gira sa kanda, dahil mas mabisug sida kaysa kanta.”

³² Ag ilinantag nida sa manga Israilita ti balaw mayad pag barita tungkul sa kanda binantayan pag daga. Kaindaay kanda sinabi, “Kanmi binantayan pag daga balaw mayad, magmatay sa kay manga nasakupan, ag balaw lang tida, ti nakitan nimi pag manga tawu ati arabwat.

³³ May nakitan waya ngani kami manga daragangan, kay manga lahi ni Anak. Ga manga tipung lang kanmi pamantay sa kanmi sadili nu ipaparihu sa kanda, ag katunda diman kanda magbantay sa kanmi.”